Judges 17

Dagbani Bible (Naawuni Kundi Kasi)

← Chapter 16 Jump to: Chapter 18 →

1Do’ so daa be Ifriim tiŋgban’ ni zoya zuɣu tinshee ka o yuli booni Maika.

2Ka Maika maa daa ti yɛl’ o ma, “A daanzinfa kpila tuhili ni kɔbiga shɛli bɛ ni daa zu ka a yɛli noli ti ŋun zu li, ka yɛli ma di yɛla la, nyama, di be n sani, mani n-daa kpuɣ’ li.” Ka o ma yɛli, “Yawɛ niŋm’ alibarika niŋ m bia ŋɔ ni.”

3Ka Maika daa labisi anzinfa kpila tuhili ni kɔbiga maa ti o ma. Ka o ma yɛli, “N zaŋ anzinfa maa ti Yawɛ ni n zaŋ li ti m bia ŋɔ ka o zaŋ li mali anzinfa binnani. Dinzuɣu pumpɔŋɔ n ni labisi li ti a.”

4O ni daa zaŋ liɣiri maa labisi ti o ma; ka o ma daa yihi di ni anzinfa kpila kɔbisiyi ti anzinfa doora, ka o daa zaŋ li mali anzinfa binnani. Ka bɛ daa zaŋ li zali Maika yiŋa.

5Maika daa malila binnana jɛmbu duu; ka daa she mukuru laasabu din nyɛ bɛ ni daa lihiri shɛli ni buɣiri baɣa niŋ di ni, ka daa zaŋ o bidib’ yino leeg’ o maligumaana.

6Di saha maa Izraɛlnim’ daa ka naa, dinzuɣu sokam daa kul tumdila o suhu ni yu shɛm.

7Di saha ka nachimbil’ so daa yi Bɛtilihɛm din be Juda tiŋgbɔŋ ni la na. O daa nyɛla Lɛvi zuliya nira m-be nimaani.

8O daa yila Bɛtilihɛm din be Juda tiŋgbɔŋ ni maa n-chani bɔri luɣ’ shɛli ni o ʒini. Ka o daa chaŋchaŋ ti kana ti kpɛla Maika ŋun daa be Ifriim tiŋgban’ ni zoya zuɣu maa yiŋa.

9Ka Maika daa bɔh’ o, “Tiŋkani ka a yina?” Ka o garigi yɛl’ o, “N nyɛla Lɛvi zuliya nira, ka yi Bɛtilihɛm Juda tiŋgbɔŋ ni na. N chani bɔrila luɣ’ shɛli ni n ʒini.”

10Ka Maika yɛl’ o, “Kpalimmi n sani leei m ba ni m maligumaana. N ni tir’ a anzinfa kpila pia yuuni kam, ka tir’ a situra mini bindirigu pahi.”

11Ka Lɛvi zuliya nachimbil’ maa daa saɣi ni o ni be Maika sani m-be kaman o bidibisi ni yino.

12Ka Maika daa zaŋ Lɛvi zuliya nachimbil’ maa leeg’ o maligumaana, ka o daa kpalim be ŋun’ Maika yiŋa.

13Di saha ka Maika daa yɛli, “Pumpɔŋɔ m baŋya ni Yawɛ ni chɛ ka n tɔŋ, n ni zaŋ Lɛvi zuliya nira leei m maligumaana ŋɔ zuɣu.”

← Chapter 16 Jump to: Chapter 18 →