Judges 15

Dagbani Bible (Naawuni Kundi Kasi)

← Chapter 14 Jump to: Chapter 16 →

1Ka di daa niŋ daba ayi ha, ka Samsin chaŋ ni o ti puh’ o paɣ’ maa alikama chɛbu saha, ka ʒi bubil’ polli mali ni o ti ti o paɣ’ maa. Ka Samsin daa ti yɛl’ o paɣ’ maa ba, “N ni kpe m paɣ’ sani.” Amaa ka o paɣ’ ba maa bi saɣi;

2ka yɛli Samsin, “Man’ daa tɛhiya ni a lan je o mi, ka zaŋ o ti a daaŋgo zo la. O tizɔbil’ ŋɔ viɛli gar’ o, dinzuɣu jaande, zaŋm’ o tizɔbil’ maa ka chɛ o.”

3Di saha ka Samsin daa yɛli, “Pumpɔŋɔ dina, n yi lan niŋ Filistianim’ zaɣ’ biɛɣu, di pala n taali.”

4Di saha ka Samsin daa chaŋ ti gbahi ŋɔri kɔbisita n-zaŋ bɛ zuya gbin’ taba ka zaŋ buɣim mokpala shɛbisishɛbisi di gbina maa ni.

5Di nyaaŋa ka o daa niŋ buɣim dab’ li; ka zaŋ ba bahi ka bɛ zo nti kpe Filistianim’ kawana ni. Ka buɣim maa taai bɛ kawaan’ puri maa n-di bɛ ni pun ŋahi luɣ’ shɛŋa mini bɛ ni na bi ŋahi shɛŋa n-tabili bɛ olivi tihi puri.

6Ka Filistianim’ maa daa bɔhi, “To, ninvuɣ’ ŋuni n-lee tum tuuni ŋɔ?” Ka ninvuɣ’ shɛb’ yɛli ba, “Samsin ŋun deemba nyɛ Timna nir’ la n-tum lala maa. O ni deeg’ o paɣa n-zaŋ o ti o daaŋgo zo la zuɣu.” Ka Filistianim’ maa daa chaŋ ti niŋ buɣim nyo paɣ’ maa min’ o ba.

7Ka Samsin bɔhi ba, “Yi ni niŋ shɛm ŋɔ zuɣu, M poya ni n ku chɛn ya, faashee ka m bɔhi ya biɛri labisi ka naanyi chɛ.”

8Ka o daa lu bɛ zuɣu ŋ-ŋmɛri kabiri bɛ sakpuri mini bɛ gbalipina n-daa niŋ lala ku ba pam. Di nyaaŋa ka o daa chaŋ Ɛtam ti kpe m-be tampiŋ lɔŋni.

9Di saha ka Filistianim’ daa kana ti dɔni Juda tiŋgbɔŋ ni n-chaŋ ti liri Lɛhinima.

10Ka Judanim’ daa bɔhi ba, “Bɔzuɣu ka yi kana ti liri ti?” Ka bɛ yɛli, “Ti kamina ni ti ti lo Samsin mihi n-zaŋ o chaŋ ti niŋ o o ni niŋ ti shɛm labisi.”

11Ka Judanim’ maa ninvuɣ’ tusaata daa chaŋ Ɛtam tampiŋ lɔŋ maa ni ti bɔhi Samsin, “A bi mi ni Filistianima n-su ti? Ka tuun’ bɔ ka a lee tum ti ŋɔ?” Ka Samsin garigi yɛli ba, “N niŋ ba la bɛ ni niŋ ma shɛm labisi.”

12Ka bɛ yɛli Samsin, “Ti kamina ni ti ti lo a mihi n-zaŋ a ti ti Filistianim’ maa.” Ka Samsin yɛli ba, “Pomiya ni yimaŋmaŋ’ ku ku ma.”

13Ka bɛ yɛl’ o, “Aai, ti ku ku a, ti kul yɛn zaŋ a mi ti ti ba.” Ka bɛ daa zaŋ mi’ pala ayi lo o n-zaŋ o tampiŋ lɔŋ maa ni na ti ti ba.

14Bɛ ni daa zaŋ o ti paai Lɛhi, ka Filistianim’ kul zɔri kani o sanna, ka tahira. Ka Yawɛ Shia daa siɣ’ o zuɣu na pam, ka mi’ shɛŋa din daa lo o maa zaa dii chihichihi; ka di be kaman buɣim ni di gali shɛm la.

15Di saha maa ka Samsin daa nya buŋ yɛno kɔbili kpuɣ’ li n-zaŋ li ku ninvuɣ’ tuhili.

16Ka Samsin daa yɛli, “Buŋ’ yɛno kɔbili ka n zaŋ ku ninvuɣ’ tuhili. Buŋ’ yɛno kɔbili ka n zaŋ ku ba n-laɣim ba sɔŋ gbilligbilli.”

17O yɛtɔɣa ŋɔ nyaaŋa ka o daa zaŋ buŋ’ yɛno kɔbili maa bahi. Ka bɛ daa bol’ o ni zaŋ li bahi luɣ’ shɛli maa yuli Ramatilɛhi.

18Ka kɔnyuri daa gbaai Samsin pam, ka o suhi Yawɛ yɛli, “Nyini n-chɛ ka mani ŋun nyɛ a dabili ŋɔ di nasara ŋɔ, ka kɔnyuri ti yɛn ku ma, ka n lu ninvuɣ’ shɛb’ bɛn bi gundi ŋɔ nuu ni?”

19Ka Naawuni daa chɛ ka Lɛhi tiŋgban’ ni vinvamli tahi bɔɣi, ka kom yi di ni na, ka Samsin nyu ka o ni maai, ka o kpiɔŋ lan labina yaha. Dinzuɣu ka bɛ daa boli kɔbili’ nini maa yuli Ɛnhakɔr. Ka di na kul be Lɛhi hal ni zuŋɔ.

20Samsin daa niŋ Izraɛlnim’ zuɣulana la yuun’ pisi shɛŋa puuni Filistianim’ ni daa su bɛ tiŋgbɔŋ maa la.

← Chapter 14 Jump to: Chapter 16 →