Song of Solomon 2

Dagbani Bible (Naawuni Kundi Kasi)

← Chapter 1 Jump to: Chapter 3 →

1N ŋmanila Sharɔn tutuɣu din pum viɛli pam, ka ŋmani vinvamli ni Paɣiviɛligakushihikom.

2Paɣiviɛligakushihikom ni ʒe go’ tihi sunsuuni shɛm, lala ka n yura be paɣisara sunsuuni.

3Apil tia ni be nyɔŋ tihi sunsuuni shɛm la, lala ka n yura be nachimba sunsuuni. N yur’ o mahim ʒinibu ka o wala nyaɣisi pam n sani.

4O daa zaŋ ma kpe o bindira dibu duu, ka o ni daa lo shɛm zaŋ chaŋ m polo nyɛla o bɔri ma mi.

5Chɛ ka n di wain tiwala n-nya kpiɔŋ, ka di apil ka n nini neei, dama doo bɔbu chɛmi ka n ni chɔɣisi zaa.

6O zaŋla o nuzaa gbaai n zuɣu mali, ka zaŋ o nudirigu bɔbindi ma.

7Jɛrusalɛm paɣiba, pomiya saŋkpalima bee muli zaɣ’ nyama ni yi ku chɛ ka ti tab’ bɔbu kɔre yiɣisi bee n-kpaŋsi li, ka di saha na bi paai.

8N wumla n yura kukoli. Nyama, o yila zoya zuɣu zɔrina. O zɔrimi duri kunkuna kani n sanna.

9N yura ŋmanila molifu bee saŋkpaliŋ polli. Nyama, ŋuna n-ʒe ti gooni nyaaŋa n-vɔbisiri lihiri ti takɔriti ni, ka lihiri dari din puli gabi tab’ voya ni ŋɔ.

10N yura yɛli ma, N ni yuri so pam, ŋun viɛli pam n sani, Yiɣisim’ ka n sanna.

11Dama saa ŋmaaya, ka kikaa gba gari.

12Tihi pum puma mɔɣu ni. Noonsi kumbu saha paaya, ka ti wumdi ŋmambihi kumsi ti tiŋgbɔŋ ni.

13Fiig tihi gbaai wolibu, ka wain tihi daai pum, ka di pum maa nyo kaman tulaale la. N yura ŋun nyɛ n ni yuri so pam, Yiɣisim’ ka n sanna.

14A ŋmanila ŋmani ŋun be tampima voya ni. Chɛ ka n nya a ninni tampima voya maa ni. Chɛ ka n wum a kukoli, dama a kukoli viɛli pam, ka a ninni viɛli pam.

15Gbahim’ ŋɔri mini bɛ bihi bɛn saɣindi ti wain tihi puri la. Dama ti wain tihi maa daari pum.

16N yura nyɛla n ni su so, ka n gba nyɛ o ni su so. O zaŋd’ o biŋkɔbbaligu chani ka bɛ ti ŋubiri mɔri Paɣiviɛligakushihikom puuni.

17Biɛɣu ti yɛn neei ka zibisim zo la, n yura, nyin’ ŋmaligim’ niŋ kaman molifu bee saŋkpaliŋ la n-zo n-yi Bɛtɛr zoya zuɣu na.

← Chapter 1 Jump to: Chapter 3 →