Zechariah 3

Dagbani Bible (Naawuni Kundi Kasi)

← Chapter 2 Jump to: Chapter 4 →

1Di saha ka o daa wuhi ma Jɔshua ŋun nyɛ Maligumaaniba Zuɣulan’ la ka o ʒe Yawɛ malaika tooni, ka Sintani ʒe o nudirigu polo ni o fiɣis’ o.

2Ka Yawɛ daa yɛli Sintani, “Nyin’ Sintani, man’ Yawɛ kpahir’ a zuɣu ni! Man’ Yawɛ ŋun pii Jɛrusalɛm la kpahir’ a zuɣu ni! Doo ŋɔ ŋmanila bɛ ni darigi yihi da’ shɛli buɣim ni.”

3Jɔshua daa yɛla binyɛr’ daɣiri ʒe malaika maa tooni.

4Ka malaika maa daa yɛl’ o malaika tab’ bɛn ʒe o tooni, “Yeemiya doo maa ni ye binyɛr’ daɣ’ shɛŋa maa.” Di saha maa ka o daa yɛli Jɔshua, “N yihila a daalahichi, ka yɛn zaŋ binyɛr’ suma yɛl’ a.”

5Ka n daa yɛli, “Zaŋmiya bantab’ viɛlli vil’ o zuɣu.” Ka bɛ daa zaŋ bantab’ viɛlli maa vil’ o zuɣu maa, ka zaŋ binyɛr’ suŋ yɛl’ o; ka Yawɛ malaika maa ʒiɛya.

6Di saha ka Yawɛ malaika maa daa yɛli Jɔshua,

7“Yawɛ ŋun nyɛ Tɔbbihi Naa ŋɔ yɛliya: A yi ni doli n zaligunima ka tumdi n ni zal’ a tuun’ shɛŋa ni a tum, n ni chɛ ka a su n jɛmbu duu tuma, ka ti a zaashee bɛn ʒe kpe ŋɔ sunsuuni.

8Dinzuɣu nyin’ Jɔshua ŋun nyɛ maligumaaniba zuɣulan’ ŋɔ min’ a maligumaanitab’ bɛn ʒiin’ a tooni ka nyɛ binsuma din ti yɛn kana shihirili la, wummiya: N ni yihi n dab’ so bɛ ni booni Tiwul’ polli la palo.

9N ni zaŋ kuɣ’ yini shɛli din mali nina ayopɔin sɔŋ Jɔshua tooni; ka sab’ sabbu shɛli pa di zuɣu yɛli, ‘Dahin yini puuni, n ni ti yihi tiŋgbɔŋ ŋɔ daalahichi bahi.

10Dindali maa yi ni ti boli tab’ na ka yi ti ʒini yi wain tihi mini yi fiig tihi gbini.’ ” Man’ Yawɛ ŋun nyɛ Tɔbbihi Naa ŋɔ n-yɛli lala maa.

← Chapter 2 Jump to: Chapter 4 →