Zechariah 6

Dagbani Bible (Naawuni Kundi Kasi)

← Chapter 5 Jump to: Chapter 7 →

1Ka n daa lan kpuɣi n zuɣu lihi nya chɛchɛbunsi anahi ka di yi daanya zoya ayi sunsuuni na.

2Wɔr’ ʒiɛhi n-daa vɔri chɛchɛbuŋ’ din daŋ tooni, ka wɔr’ sabila vɔri chɛchɛbuŋ’ din pah’ ayi,

3ka wɔr’ piɛla vɔri chɛchɛbuŋ’ din pah’ ata, ka wɔr’ fufuhisi vɔri chɛchɛbuŋ’ din pah’ anahi mi.

4Ka n daa bɔhi malaika so ŋun daa yɛli ma yɛtɔɣa maa, “N dana, ka bɔ ka chɛchɛbunsi ŋɔ lee wuhira?”

5Ka o garigi yɛli ma, “Dimbɔŋɔnim’ maa nyɛla din ʒe pɔhima anahi din yi Yawɛ ŋun su dunia ŋɔ zaa la sanna zaani.”

6Wɔr’ sabila ni daa vɔri chɛchɛbun’ shɛl’ la daa zaŋ kpala nuzaa polo din nyɛ Babilɔn polo la, ka wɔr’ piɛla ni daa vɔri chɛchɛbun’ shɛl’ la zaŋ kpa wulinluhili polo, ka wɔr’ fufuhisi ni daa vɔri chɛchɛbun’ shɛl’ la mi zaŋ kpa nudirigu polo.

7Wɔr’ fufuhisi la ni daa ti yina, bɛ ni’ daa kul ŋmɛrimi ni bɛ kaai gili dunia ŋɔ. Ka malaika maa daa yɛli ba, “Chamiya kaai gili dunia ŋɔ, ka bɛ daa chaŋ.”

8Di saha ka malaika maa daa kuhi yɛli ma, “Nyama, wɔr’ shɛb’ bɛn zaŋ kpa nuzaa polo din nyɛ Babilɔn polo la nyɛla bɛn chɛ ka Yawɛ suhu maai.”

9Ka Yawɛ daa yɛli ma

10“Zaŋm’ anzinfa mini salima din nyɛ pin’ shɛŋa Hɛlidai mini Tɔbija ni Jɛdaya bɛn yi Babilɔn na la ni zaŋ ti la n-chaŋ Zɛfania bia Jɔsia yiŋa yomyom

11ti zaŋ anzinfa mini salima maa m-mali nam zuɣupiligu n-zaŋ li pili Jɛhɔzadak bia Jɔshua ŋun nyɛ maligumaaniba zuɣulan’ la.

12Yɛlim’ o ni Yawɛ ŋun nyɛ Tɔbbihi Naa ŋɔ yɛliya ni ninvuɣ’ so bɛ ni booni Tiwulli la ni zoog’ o biɛhigu shee n-yiɣisi me Yawɛ jɛmbu duu la.

13Ŋuna n-nyɛ ŋun yɛn me Yawɛ jɛmbu duu maa ka nya jilima shɛli din nyɛ naa jilima n-ʒin’ o nam ʒiishee. Ka maligumaana ni ʒe m-baɣ’ o nam ʒiishee maa, ka bɛ niriba ayi maa ni laɣim tumdi ni suhudoo ni naŋgban’ yini.

14Ka bɛ ni teeri nam zuɣupiligu maa yɛla Yawɛ jɛmbu duu maa ni. Hɛlidai mini Tɔbija ni Jɛdaya ni Jɔsia n-yɛn su di fukumsi.”

15Ka ninvuɣ’ shɛb bɛn be katiŋa ni kana nti sɔŋ me Yawɛ jɛmbu duu maa. Ka di yi ti me n-naai, dina n-ni chɛ ka yi baŋ ni Yawɛ ŋun nyɛ Tɔbbihi Naa ŋɔ n-shiri tim ma yi sanna. Ka di mi ni tooi nanila yi yi ni doli Yawɛ ŋun nyɛ yi Naawuni ŋɔ zaligunim’ viɛnyɛliŋga

← Chapter 5 Jump to: Chapter 7 →