Zechariah 5

Dagbani Bible (Naawuni Kundi Kasi)

← Chapter 4 Jump to: Chapter 6 →

1Ka n daa ti lan kpuɣi n zuɣu lihi nya gban’ shɛli ka di be pɔhim ni yiɣira.

2Ka malaika maa bɔhi ma, “Bɔ ka a lee nya maa?” Ka n garigi yɛli, “N nyala gbaŋ ka di be pɔhim ni yiɣira, ka di wɔɣilim nyɛ mita awɛi, ka di yɛliŋ mi nyɛ mita anahi ni pirigili.”

3Di saha ka o yɛli ma, “Sabbu din sab’ pa di zuɣu wuhiya ni noli yɛlibu yɛlli n-yɛn go n-gil’ dunia ŋɔ zaa. Gbaŋ maa yaɣ’ yini polo sab’ wuhi ni bɛ ni yihi tayiɣ’ kam tiŋgbani ŋɔ ni; ka yaɣ’ yini polo mi sab’ yɛli ni ŋunkam ŋmari ʒiri m-pɔri pɔri, bɛ ni yih’ o gba.

4Yawɛ yɛliya, ‘N ni chɛ ka di yi n-chaŋ ti kpe tayiɣ’ mini ŋun ŋmari ʒiri m-pɔri n yuli yinsi n-saɣim bɛ binshɛɣukam zaŋ tabili dari mini kuɣa.’ ”

5Ka malaika so ŋun daa yɛli ma yɛtɔɣa maa daa lan kana ti yɛli ma, “Nyama, binshɛl’ lan yina chana.”

6Ka m bɔh’ o, “Bɔ n-lee nyɛ li?” Ka o garigi yɛli, “Di nyɛla piɛɣu, ka nyɛ din ʒe bɛ daalahichi zaani dunia ŋɔ zaa ni.”

7Piɛɣu maa daa malila liŋa. Ka n daa kul lihiri hal ti nya ka di liŋ’ maa wuɣi zuɣusaa, ka paɣa ʒi piɛɣu maa puuni.

8Ka malaika maa yɛli, “Paɣ’ ŋɔ nyɛla tuumbiɛri kɔtomsi.” Ka o daa dihi paɣ’ maa ʒili piɛɣu maa ni ka zaŋ di liŋ’ maa pil’ li.

9Ka n daa kpuɣi n zuɣu lihi nya paɣiba ayi ka bɛ yiɣiri kpari m polo na, ka bɛ kpiŋkpama ŋmani shinshingooro kpiŋkpama. Ka bɛ daa kpuɣ’ piɛɣu maa zuɣusaa n-zaŋ li yiɣi chaŋ.

10Ka m bɔhi malaika so ŋun daa yɛli ma yɛtɔɣa maa, “Ya ka bɛ lee mal’ li chana?”

11Ka o garigi yɛli, “Bɛ mal’ li kunila Babilɔn tiŋgbɔŋ ni ni bɛ ti me di duu zali nimaani. Bɛ yi ti me di duu maa naai, bɛ ni zaŋ piɛɣu maa zali di ni.”

← Chapter 4 Jump to: Chapter 6 →