Galatians 2

Ewe 2014 (EƲEGBE BIBLIA)

← Chapter 1 Jump to: Chapter 3 →

1Le ƒe wui ene megbe la, nye kple Barnaba míegayi Yerusalem, eye mekplɔ Tito hã ɖe asi.

2Mawue ɖee fiam hafi meyi. Meɖe kpɔ ame siwo dzé ame ŋkutawo le wo dome la, eye meƒo nu tso Nyanyui, si megblɔna na ame siwo menye Yudatɔwo o la ŋu na wo. Mewɔ esia, be dɔ si wɔm mele tso ɣe aɖe ɣi ke la, nagazu dzodzro o.

3Togbɔ be Tito, si le ŋunye la nye Helatɔ hã la, ame aɖeke mezi edzi be netso aʋa o.

4Ke hametɔ alakpatɔ aɖewo to ayemɔ dzi ge ɖe hame la me henɔ mɔnu dim be yewoagblẽ ablɔɖe si Kristo Yesu na mí la, awɔ mí míazu kluviwo.

5Esi wònye ɖe míedi be nyateƒe blibo, si le Nyanyui la me nanɔ anyi dedie na mi ta la, míelɔ̃ ɖe woƒe nya la dzi kura o.

6Azɔ la, ame ŋkuta siwo buna be yewonye nane la, meɖo aɖaŋu aɖeke nam o. (Evɔ la, ne woganye nane hã la, nye ya nyemetsɔ ɖeke le eme o, elabe Mawu ya mekpɔa ame ŋkume o.) Mebe ame ŋkuta mawo meɖo aɖaŋu yeye aɖeke nam o.

7Ke boŋ wokpɔe dze sii be dɔ si Mawu de asi nam lae nye be magblɔ Nyanyui la na ame siwo menye Yudatɔwo o la, abe ale si wòdee asi na Petro hã, be eya nagblɔe na Yudatɔwo ene.

8Elabe ame si to Petro dzi wɔ dɔ le Yudatɔwo dome la, eya kee to nye hã dzinye wɔ dɔ le ame siwo menye Yudatɔwo o la dome.

9Yakobo kple Kefas kpakple Yohanes, ame siwo wobuna abe hamea ƒe sɔtiwo ene la, kpɔ dze sii be Mawu ve nunye ŋutɔ, eya ta wona asi nye kple Barnaba, tsɔ fia be yewoxɔ mí alɔ eve. Woɖo kpe edzi be míawo míayi ɖe ame siwo menye Yudatɔwo o la gbɔ, eye yewo hã yewoaɖo ta Yudatɔwo gbɔ.

10Nu si ko wodi tso mía si be míawɔ lae nye be míaɖo ŋku ame dahe, siwo le yewo dome la dzi, evɔ la, esia tututue nye ŋutɔ hã medina be mawɔ.

11Esi Kefas va Antioxia la, metsi tre ɖe eŋu, ŋkume kple ŋkume, hehe nya ɖe eŋu, elabe ewɔ nu masɔmasɔ aɖe.

12Hafi ame aɖewo natso Yakobo gbɔ ava la, Petro ɖua nu kple ame siwo menye Yudatɔwo o la. Ke esi ame siawo va ko la, ehe eɖokui ɖe aga, eye megadi be yeaɖu nu kple ame siwo menye Yudatɔwo o la o, elabe evɔ̃ na ame siwo gblɔ be ele be ame natso aʋa la.

13Hametɔ bubu, siwo nye Yudatɔwo la hã de eƒe alakpanuwɔna sia dzi, ale be Barnaba kekeake hã wɔ alakpanu sia kpli wo.

14Ke esi mekpɔ be nu si wòwɔ mesɔ ɖe nyateƒe si le Nyanyui la me nu o la, megblɔ na Kefas le wo katã ŋkume be: “Nenye be wò, ame si nye Yudatɔ, nànɔ agbe abe ame si menye Yudatɔ o ene la, nu ka ta nàtee ɖe ame siwo menye Yudatɔwo o la ya dzi, be woanɔ agbe abe Yudatɔwo ene?”

15Le nyateƒe me la, Yudatɔwo míenye tso dzɔdzɔme, eye menye ame manye Yudatɔ, nuvɔ̃wɔlawo o.

16Míawo míenya be menye ame si le sea dzi wɔm lae woabu be ele dzɔdzɔe o, ke boŋ ame si xɔ Kristo Yesu dzi se lae. Eya ta míawo gɔ̃ hã míexɔ edzi se, be woabu mí be míele dzɔdzɔe, esi míexɔ edzi se la ta. Menye esi míewɔ sea dzi tae woabu mí be míele dzɔdzɔe o.

17Ke nenye be míele agbagba dzem be woabu mí be míele dzɔdzɔe, elabe míewɔ ɖeka kple Kristo, emegbe wòva dze go be míawo hã míewɔa nuvɔ̃ la, ekema ɖe mefia be Kristo de nuvɔ̃ dzi oa? Gbeɖe!

18Nenye be metu asi sedziwɔwɔ ƒu anyi, eye megagbugbɔe le fɔfɔm ɖe tsitrenu la, ekema nye ŋutɔ meɖe ɖokuinye fia abe sedzidala ene.

19Le se la gome la, mezu ame kuku be manɔ agbe na Mawu boŋ.

20Nye kple Kristoe woklã ɖe atitsoga ŋu. Eya ta azɔ la, meganye nye ŋutɔe le agbe o, ke Kristo ye le agbe le menye. Agbe si mele le ŋutilã me fifia la, Mawu Vi si lɔ̃m, eye wòtsɔ eɖokui na ɖe tanye la dzixɔse mee meli ɖo.

21Nyemeɖe ale si wòvea ame nui la ƒu gbe o, elabe nenye ɖe Mawu bunɛ na ame be esi wòwɔ Mose ƒe se la dzi ta ele dzɔdzɔe la, anye ne Kristo ƒe ku la zu dzodzro.

← Chapter 1 Jump to: Chapter 3 →