2 Corinthians 8

Gaelic (Scottish) (An Tiomnadh Nuadh anns an Eadar-Theangachadh Ùr Gàidhlig 2017 )

← Chapter 7 Jump to: Chapter 9 →

1A‑nis, a bhràithrean, tha sinn a' toirt fios dhuibh air gràs Dhè a chaidh a thoirt do dh'eaglaisean Mhacedònia,

2gun robh — ann am mòr‑dhearbhadh cruadail — pailteas an toileachais‑san agus doimhne am bochdainn‑san gan dòrtadh thairis ann an saidhbhreas am fialaidheachd.

3Oir tha mi a' toirt fianais gun robh iad, a rèir an comais 's thar an comais, a' tairgsinn len toil fhèin,

4a' guidhe oirnne gu dùrachdach, gun gabhamaid an tiodhlac agus co‑roinn an fhrithealaidh dha na naoimh,

5agus seo, cha b' ann mar a bha dùil againne, ach thug iadsan iad fhèin an toiseach dhan Tighearna 's às dèidh sin dhuinne, a rèir toil Dhè.

6Mar sin, chuir sinn ìmpidh air Tìtus, dìreach mar a bha e air tòiseachadh roimhe, gum bu chòir dha cuideachd an obair ghràsmhor seo a choileanadh annaibhse san aon dòigh.

7Ach dìreach mar a tha sibh pailt sa h‑uile sìon — ann an creideamh, ann am bruidhinn, ann an eòlas, sa h‑uile dìcheall, agus sa ghràdh a th'againne dhuibh — bithibh barraichte sa ghràs seo cuideachd.

8Chan ann mar àithne a tha mi ag ràdh seo, ach airson dearbhaidh, tro dhùrachd dhaoine eile is treibhdhireas ur gràidh‑se cuideachd.

9Oir is aithne dhuibh gràs ar Tighearna Ìosa Crìosd, ged a bha e saidhbhir, a dh'aindeoin sin gun deach a dhèanamh bochd air ur son‑se, airson 's gum fàsadh sibhse saidhbhir tro a bhochdainn‑san.

10Agus san nì seo tha mi a' toirt mo bheachd, oir tha seo gu buaidh dhuibhse, a thòisich an toiseach bliadhna air ais, chan ann a‑mhàin air seo a dhèanamh, ach cuideachd a bhith a' miannachadh a dhèanamh.

11Mar sin a‑nis coileanaibh cuideachd a bhith ga dhèanamh, airson 's dìreach mar a bha sibh deiseil a bhith ga mhiannachadh, mar sin cuideachd gum biodh a choileanadh ann.

12Oir ma tha an deisealachd ann, tha e airidh air gabhail ris a rèir na th' aig neach, cha ann a rèir na tha a dhìth air.

13Oir chan eil seo airson cofhurtachd dhaoine eile 's sibhse a chur fo àmhghar, ach airson co‑ionnanachd —

14aig an àm seo fhèin tha ur pailteas‑se na cho‑leasachadh air an dìth acasan, airson 's gum bi am pailteas‑san na choileanadh air ur dìth‑se, gus am bi co‑ionnanachd ann.

15Mar a tha e sgrìobhte, “Ge b' e cò a chruinnich mòran, cha robh cus aige, agus ge b' e cò a chruinnich beagan, cha robh dìth air.”

16Ach taing do Dhia, a chuir an aon dùrachd air ur son‑se ann an cridhe Thìtuis.

17Oir cha b' e a‑mhàin gun do ghabh e ri ar tagradh, ach cuideachd le bhith fìor dhùrachdach e fhèin, chaidh e dhe thoil fhèin thugaibh.

18Chuir sinne còmhla ris, am bràthair a tha cliùiteach san t‑soisgeul air feadh nan eaglaisean gu lèir.

19Agus chan e seo a‑mhàin, ach chaidh a shuidheachadh leis na h‑eaglaisean cuideachd airson siubhal còmhla rinne san obair ghràsmhoir seo, a tha ga cur an gnìomh leinn airson glòir an Tighearna fhèin, agus airson sealltainn cho deiseil 's a tha sinn,

20faiceallach nach toir neach sam bith mì‑chliù dhuinn airson an tiodhlac fialaidh seo a fhrithealadh;

21oir tha sùil againn ri na tha onarach, chan ann a‑mhàin ann an sealladh Dhè, ach cuideachd ann an sealladh dhaoine.

22Agus leothasan chuir sinn ar bràthair, a dhearbh sinn gu tric agus a fhuair sinn dùrachdach ann an tòrr rudan, ach a‑nis nas dùrachdaiche buileach air sgàth a mhòr chinnt annaibhse.

23A thaobh Thìtuis, is esan mo chompanach 's mo cho‑obraiche nur measg‑se; a thaobh ar bràithrean, is iadsan teachdairean nan eaglaisean, glòir Chrìosd.

24Mar sin, seallaibh dhaibhsan dearbhadh ur gràidh‑se agus ar n‑uaill‑ne annaibh, mu choinneamh nan eaglaisean.

← Chapter 7 Jump to: Chapter 9 →