1 John 2

Guarani 2015 (Ñanderuete Ñe’ẽ Porã 2015)

← Chapter 1 Jump to: Chapter 3 →

1Che ra’ykuéra ha rajykuéra, ko’ã mba’e ningo ahai peẽme ani hag̃ua pejapo mba’e ivaíva. Opáichavo oimérõ sapy’a peteĩ ñande apytépe ho’ára’e angaipápe, (anítei péva opyta hi’angaipápe), jarekógui ñane pytyvõhára (abogádo) Ñanderuete ndive g̃uarã, Hesu Crísto, Ha’e oñe’ẽta ñanderehe.

2Ha’e ningo pe kuave’ẽmby ñanembopy’apeteĩ jevýva Ñanderuete ndive, oipe’ávo ñane rembiapo vaikue, ha nañaneangaipái año ñanerembiapo vai, opavave yvyarigua hembiapo vai avei.

3Ha péicha rupi ñande jaikuaa añetehápe ichupe, jajapórõ hembipota.

4Oime ramo he’íva che aikuaa ichupe, ha ndojapói hembipota, ijapu ha ipype ndaipóri pe añetegua.

5Upe ojapóva iñe’ẽ katu, ipype oĩ pe añetegua ha Ñanderuete mborayhu oisãmbyhy ichupe. Upéicha ramo jaikuaa ñaĩha Hesu Cristopype.

6Upe he’íva ipype oĩha, oikova’erã Ha’e oiko haguéicha avei.

7Che rayhuparakuéra, che ndahaíri peteĩ tembiapoukapy pyahu, ahai uvei pe tembiapoukapy pehendumava’ekue ñepyrũ guive.

8Upéicharamo jepe ahai peteĩ tembiapoukapy pyahu, kóva hi’añete ipype ha pendepype; pe pytũ ningo ohasáma ha pe tesape añeteguáva ohesapéma, (Juan 13,34).

9Upe he’íva oĩha tesapépe ha ndaija’éiva iñermáno rehe, upéva oiko gueteri pytũmbýpe.

10Pe ohayhúva iñermánope oiko tesapépe ha ha’érupi avave noñepysãngamo’ãi.

11Ha upe iñermáno rehe ija’e’ỹva, oikohína gueteri pytũmbýpe, ha oguata pytũmbýpe ha ndoikuaái mamópa oho, pe pytũ omohesatũgui ichupe.

12Che ahaíma peẽme che ra’ykuéra ha rajykuérape, oñeperdonámagui pene angaipakuéra Hesu Crísto rupi.

13Che ahaíma peẽ tuvakuérape peikuaágui Hesu Crístope ha pejapógui hembipota, oikomava’ekue ñepyrũ guive. Che ahaíma peẽ, kuimba’ekuérape (40 áño rupi), peẽ pembopoguy haguére añáme (Satanáme).

14Che ahaíma peẽ, penaceramóvape (pende pytu porãme), peikuaágui Ñanderuetépe ha pejapógui hembipota. Che ahaíma peẽ, tuvakuérape, peẽ peikuaágui Ñanderuetépe, oikovahína ñepyrũ guive. Che ahaíma peẽme, karia’ykuéra, peẽ peñemombaretégui Ñanderuete ñe’ẽ rupi, ha upévare peẽ pembopoguy añáme.

15Anítei pehayhu ko múndo kóvape, ni ipype oĩva guive. Upe ohayhúva ko múndo kóvape, ndohayhúi Ñanderuetépe.

16Ñande rete rembipota vai, pe envídia ha pe ñembotuicha, ndoúi Ñanderuetégui, ko múndogui uvei ou.

17Ko múndo (univérso) kóva oñehundiva’erã hembipota vai reheve; upe ojapóva Ñanderuete rembipota katu oikovéta ára atyguasukuérape g̃uarãme (tapia g̃uarã).

18Peẽ penaceramóvape ha’ese pe hóra paha og̃uahẽmaha, ha pehendu haguéicha pe crísto gua’u (pe anticrísto) opu’ãtaha; ha oúmagui heta crísto gua’u, ñande jaikuaáma pe hóra paha og̃uahẽmaha.

19Osẽ hikuái ñande apytégui, ndaha’éi ramojepe ñande reheguáva, ñande reheguáva rire, opytava’erãmo’ã ñande apytépe; osẽ uvei hikuái ojehecha hag̃ua ndaopavavéi ñande reheguaha.

20Peẽme Ñanderuete ome’ẽ Pytu Porãmbáva ñemona (uncion del espíritu Sánto) ha pévarupi pehechakuaa mávapa ñande reheguáva ha mávapa ndaha’éi.

21Ndahaíri peẽme peikuaa’ỹrõguáicha pe añetegua, peikuaa porã uvei, ha peikuaa porã avei mba’eveichagua japu nosẽiha pe añeteguágui.

22Mávapa pe ijapúva, ndaha’éirõ pe ombotovéva Hesúpe ha he’íva Ha’e ndaha’eiha pe Crísto. Upéva ningo pe crísto gua’u ombotove pe Túva ha Ita’ýrape.

23Opaite ombotovéva pe Ta’ýrape (Hesu Crístope) ndoguerekói avei pe Túva. Ha pe omboajéva pe Ta’ýrape upéva omoañete avei pe Túvape.

24Umi mba’e pehenduva’ekue ñepyrũ guive topyta pendepype. Pendepype opytárõ pe ñepyrũ guive pehendumava’ekue, peẽ pepytáta avei Ta’ýra ha Tuvapype.

25Kóva ningo pe Ha’e oprometeva’ekue ñandéve: Pe tekove opa’ỹva.

26Ko’ã mba’e che ahai peẽme, peikuaa hag̃ua mba’éichapa umi penembotavyséva oikohína.

27Ha pehupity haguéicha pe Pytu Porãmbáva ñemona Ñanderuetégui pepyta hatãkena ipype, ha napeikotevẽvéima avave penembo’e. Pe Pytu Porãmbáva voi ningo penembo’e opaite mba’e rehe ha hendive oĩ pe añetegua, ha Ha’e ndaijapúi; Ha’e penembo’e haguéicha pévape pepyta, peñemopeteĩvo Hesu Crísto ndive.

28Ha ko’ág̃a, che ra’ykuéra ha rajykuéra, pepyta ipype, ani hag̃ua Ha’e ojehechaukaha árape, ñande ñatĩ henondépe, javy’a rãngue.

29Peẽ ningo peikuaa Hesu Crísto heko porãha, ha upéicha pehechakuaava’erã avei opaite onacéva ichugui oiko avei heko potĩva ramo.

← Chapter 1 Jump to: Chapter 3 →