1 John 3

Guarani 2015 (Ñanderuete Ñe’ẽ Porã 2015)

← Chapter 2 Jump to: Chapter 4 →

1Pema’ẽna mba’eichagua mborayhúpa Ñanderuete ome’ẽ ñandéve, ñañembohéra hag̃ua Ñanderuete ra’ykuéra ha rajykuéra, ha umivahína ñande voi. Upévare Ha’érupi ko múndo nañandekuaái, ndoikuaáigui ichupe.

2Che rayhuparakuéra, ko’ág̃a jaikóma ita’ýra ha itajýra ramo, ndojehechaukáigui gueteri upe oikótava ñandehegui. Jaikuaa ningo upe ára Ha’e ojehechaukatahápe ñandéve, ñande jajoguataha ichupe, ha jahecháta Ha’e oĩ haichaite.

3Ha opaite oguerekóva ko esperánza kóva ipype, toñemboheko porã, Ha’e heko porã háicha avei.

4Opaite ojapóva tembiapo vai naiñe’ẽrendúi Ñanderuete rembiapoukapýpe, tembiapo vai ningo he’ise upe oñemoĩva Ñanderuete rembiapoukapy rehe.

5Peẽ ningo peikuaa voi, Hesu Crísto ojehechauka hague oipe’a hag̃ua ñane rembiapo vaikue, ipype ndaipórigui angaipa (tembiapo vai).

6Opaite umi opytáva ipype ndojapói mba’eve ivaíva, umi tembiapo vai apoha katu ndohechái ni ndoikuaái ichupe.

7Che ra’ykuéra ha che rajykuéra, anítei avave penembotavy; pe ojapóva heko peguáva, heko potĩma Hesu Crístoicha.

8Pe hembiapo vaíva katu aña mba’e, pe aña oñemohembiapo vaígui ñepyrũ guive. Upévare ningo Ñanderuete Ra’y ou, ombyai hag̃ua aña rembiapo.

9Opaite onacéva Ñanderuetégui noñemohembiapo vaíri, Ñanderuete semílla (reko porã), (Ipytu Porãmbáva oĩgui ipype), upévare ha’e ndaikatúi oñemohembiapo vai, ha’e oikógui ita’ýra térã itajýra ramo.

10Péicha ojekuaa porã mávapa Ñanderuete ra’y térã itajýra ha mávapa aña ra’y térã itajýra. Opaite umi ndojapóiva pe heko peguáva ha upe ndohayhúiva iñermanokuérape ndaha’éi Ñanderuete ra’y ni itajýra.

11Upévare pehendu ñepyrũ guive ko ñe’ẽ he’íva: Jajohayhuva’erã.

12Anítei jaiko Cain oiko haguéicha, ha’e ojuka ityvyrateépe oikógui aña poguýpe. Mba’érehepa ojuka ityvýrape. Cain ojuka Abélpe, Abel hembiapo porãgui, ha Cain hembiapo vaígui voi.

13Che hermanokuéra ani peñemondýi, pende rapichakuéra ndaija’éi ramo penderehe.

14Ñande ningo jaikuaa, jahasáma hague ñemanógui tekoveteépe, jahayhúgui ñane hermanokuérape. Upe ohayhu’ỹva katu oiko gueteri ñemanóme.

15Oimeraẽ ija’e’ỹva iñermáno rehe ningo oiko porojukahára ramo, ha péicha peikuaa opaite porojukahára ndoguerekoiha ipype pe tekove opa’ỹva.

16Ñande jahechakuaa porã Hesu Crísto mborayhu, Ha’e ome’ẽgui hekove ñanderehehápe, upévare ñande ñame’ẽva’erã avei ñande rekove ñane hermanokuéra rehehápe.

17Oime ramo peteĩ oiko porãva ha ohechárõ iñermáno ohasa asyha ha ombotýrõ ipy’apy ichugui, mba’éichapa upéicharõ Ñanderuete mborayhu opytakuaa ipype.

18Che hermanokuéra ani japorohayhu ñande jurúpente térã ñe’ẽ rei rupínte, japorohayhu katu uvei añetehápe ñane rembiapo porã rupi.

19Upéichamante jaikuaa ñande jaikoha ita’ýra térã itajýra añeteguáva ramo ha upéichamante Ha’e ombopy’aguapýta ñande py’apyñe’ẽ (conciéncia).

20Ñande py’apyñe’ẽ ñanemoĩ vaisérõ Ñanderuete renondépe, imborayhu ituichave ñande py’apyñe’ẽgui, Ha’e oikuaapágui voi ñande py’apýpe oĩva guive.

21Che rayhupára, ñande py’apyñe’ẽ ñanemoĩ porã ramo, ñande jareko esperánza Ha’érupi.

22Upéicha oñeme’ẽ ñandéve ñane rembijerure, ñande jajapógui hembipota ha umi mba’e umíva ombovy’a ichupe.

23Ha hembiapoukapy ningo kóva: Jajeroviava’erã Ita’ýra Hesu Crísto réra rehe ha jajohayhu, upéicha Ha’e voi he’iuka ñandéve.

24Ha upe ojapóva hembiapoukapy, upéva oiko Ñanderuetepype, ha Ha’e ipype. Ha upéi jaikuaa avei Ha’e oikoha ñandepype pe Pytu Porãmbáva rupi, Ha’e ome’ẽmava’ekue ñandéve.

← Chapter 2 Jump to: Chapter 4 →