1 John 4

Guarani 2015 (Ñanderuete Ñe’ẽ Porã 2015)

← Chapter 3 Jump to: Chapter 5 →

1Che rayhupára, anítei peguerovia opaite pytúpe, peha’ã raẽ upe pytúpa ou Ñanderuetégui (térã nahániri), heta proféta japu oñemyasãive ohóvo ko yvy apére.

2Péicha peikuaáta ha’e ouha Ñanderuetégui: Opaite Pytu he’íva Hesu Crísto ou hague kuimba’etee ramo ko yvy apére, upéva ou Ñanderuetégui,

3ha upe pytu he’íva ndaupeichaiha, ndoúi Ñanderuetégui, upéva ningo crísto gua’uha, pe anticrísto pytu voi, pehendúma voi pe crísto gua’u outaha ha oiméma voi ko yvy apére.

4Che ra’ykuéra ha che rajykuéra, peẽ ningo Ñanderuete reheguáva, ha peẽ pembopoguy umi proféta ijapúvape; ituichavégui pe oĩva pendepype, upe oĩva yvy apére.

5Ha’ekuéra ko múndo reheguáva ha upévare oñe’ẽ múndo reheguáva ramo, ha umi yvyariguakuéra ohendu ichupekuéra.

6Ñande katu Ñanderuete reheguáva, ha upévagui pe oikuaáva Ñanderuetépe katuete ñanerendu, ha upe ndaha’éiva Ñanderuete reheguáva nohendumo’ãi ñane ñe’ẽ. Upéicha ñambojuavy porãkuaa pe Pytu Añetegua ha pytu japu apytégui.

7Che rayhupára, jajohayhúkena, mborayhu ningo Ñanderuete mba’e voi. Ha opaite oporohayhúva onace Ñanderuetégui, ha oikuaa ichupe.

8Ha pe oporohayhu’ỹva ndoikuaái Ñanderuetépe, Ha’e ningo mborayhu añetegua.

9Ñanderuete ohechauka imborayhu ñandéve g̃uarã omboúvo Ita’ýra peteĩmívape ko yvy apére, ñande jaikove hag̃ua Ha’érupi tapiaite g̃uarã.

10Pe mborayhu añeteguáva ou Ñanderuetégui, ha péicha ojehechauka ñandéve: Nañande raẽi jahayhu Ñanderuetépe, Ha’e raẽ uvei ñanderayhu, omboúvo Ita’ýra operdona hag̃ua ñane rembiapo vaikue (angaipa).

11Che rayhupára, Ñanderuete ñanderayhúgui, ñande jajohayhuva’erã avei.

12Avave ndohechái araka’eve Ñanderuete rova; ñande jajohayhu ramo, Ñanderuete opyta ñandepype ha imborayhu oĩmbaite hekópe ñandepype.

13Upéichamante jaikuaa ñaĩha ipype ha Ha’e ñandepype, Ha’e ome’ẽ haguére ñandéve Ipytu Porãite.

14Ha ore rohecha ha roikuaaukaroína pe Túva ombou hague Ita’ýrape osalva hag̃ua tetãyguakuérape.

15Oimeraẽ he’íva Hesu Crísto Ñanderuete Ra’yha, ipype opyta Ñanderuete, ha ha’e opyta Ñanderuetepype avei.

16Ha ñande jaikuaa porã ha jaguerovia Ñanderuete ñanderayhuha. Ñanderuete ningo mborayhu añeteguáva ha pe opytáva koichagua mborayhu añeteguáva poguýpe, opyta Ñanderuetepype ha Ha’e opyta ñandepype.

17Péichamante pe mborayhu oĩmba hekópe ñande rekovépe, ha ndajakyhyjevéima, vy’apópe ñaha’ãrõ uvei pe ñembojovake ára paha; ñande reko oñemoambue haguére ha jaikógui Hesu Crísto rekóicha.

18Mborayhupype ndaipóri kyhyje, pe mborayhu oĩmbáva hekópe omosẽ uvei pe kyhyje, pe kyhyje oguerúgui jehasa asy; upévare upe okyhyjéva ne’ĩra gueteri oguereko mborayhu oĩmba heko peguáva.

19Ñande ningo jahayhu ichupe, Ha’e raẽ ñanderayhúgui.

20Oime ramo peteĩ he’íva ohayhuha Ñanderuetépe ha ndaija’éi iñermáno rehe ijapu. Upe ohayhu’ỹva iñermáno ohechávape, mba’éichapa ohayhúta Ñanderuete ndojehecháivape.

21Ha ko tembiapoukapy kóva jaguereko voi ichugui: Pe ohayhúva Ñanderuetépe ohayhuva’erã avei iñermánope.

← Chapter 3 Jump to: Chapter 5 →