Amos 2

Guarani 2015 (Ñanderuete Ñe’ẽ Porã 2015)

← Chapter 1 Jump to: Chapter 3 →

1Péicha he’i pende Ruete: Mbohapy Moab angaipaguasu rupi, ha opoi rãngue hembiapo vaígui ojapove uvei pe irundyha, upévare Che naperdonamo’ãi ichupekuéra, Ha’ekuéra ohapýgui Edom retã ruvicha kanguekue itanimbupa peve.

2Upévare Che ajatapýta Moab rehe, ha pe tata ombokusuguepáta Queriot rogaguasukuéra, ha Moab retãygua omanóta mba’e ryapu apytépe, mba’e pararã ha turupúpe.

3Ha ijapyteguikuéra aipe’áta hetã ruvicha ha hendive ajukapáta avei mayma imburuvichakuérape, he’i pende Ruete.

4Péicha he’i pende Ruete: Mbohapy Juda angaipaguasu rupi, ha opoi rãngue hembiapo vaígui ojapove uvei ohóvo pe irundyha, upévare Che naperdonamo’ãi ichupekuéra, omboyke hikuái Itúva rembipota, ha ndojapovéi hikuái hembiapoukapykuéra, ha oñembotavypa hikuái ijára gua’u japu rupi ituvakuéraicha.

5Upévagui ajatapýta Juda rehe, ha pe tata ombokusuguepáta Jerusalen rogaguasukuéra.

6Péicha he’i pende Ruete: Mbohapy Israel angaipaguasu rupi, ha opoi rãngue hembiapo vaígui ojapove uvei ohóvo pe irundyha, upévare Che naperdonamo’ãi ichupekuéra. Ha’ekuéra ovende umi heko potĩvape ha umi imboriahúvape mokõi sapatu repy rehe.

7Opyrũmba ityre’ỹva akãnguéra rehe ha omboyke mboriahukuérape hapégui. Pe túva ha ita’ýra oiko peteĩ kuña reko vai ndive, ha upéicha omongy’a che réra porãite.

8Ijára gua’u rógape oñeno hikuái ijahoja’ỹva ári, oipe’amava’ekue imboriahukuéragui, ha’e omyengoviakuaa’ỹ haguére pe pirapire oiporumava’ekue, ha ho’u hikuái avei upépe pe víno oipe’ava’ekue avei pe mboriahu rógagui, ha’e ndaikatúigui omyengovia pe pirapire oiporumava’ekue.

9Che ahundíta katu henonderãme umi Amor retãyguápe, ha’ekuéra ituicha cédroicha ha imbarete urunde’ýicha, Che katu ambyai hi’a ijyvyra rakãre ha hapo yvy guýpe.

10Che pogueruva’ekue Egípto retãgui, ha poisãmbyhy desiérto tuichaitéva rehe 40 áño pukukue, peike peve ha peñemomba’e hag̃ua Amor retã yvy rehe.

11Pende apytépe amopu’ãkuri profetakuéra, ha pene mitãrusukuéra apytégui umi Nazaréo oñemboheko potĩ ha oñemboykéva Ñanderuetépe g̃uarã. Ndaupéichai piko Israel ra’ykuéra, he’i pende Ruete.

12Ha peẽ katu pe’uka víno umi Nazaréope, ha umi profétape katu peje: Ani peprofetiza oréve umi mba’e oikótava.

13Pema’ẽ porã, Che pojopy peimeháme, ku trígo háse ojejopy háicha pe mba’yrujere omono’õvape (trilladérape).

14Ni upe iñakuãva ndaikatumo’ãi okañy, ha upe imbaretévape noipytyvõmo’ãi imbaretekue, ha upe ipy’aguasúva jepeve oñehundíta.

15Upe oiporúva pe guyrapa ndaipu’akamo’ãi, ha upe iñakuãitéva jepeve nokañykuaamo’ãi, ha upe kavaju ári oikóva jepeve ho’áta hese ija’e’ỹva pópe.

16Upe ára upévape pe hetia’evéva umi ipy’aguasúva apytépe okañýtante opioite katu, he’i pende Ruete.

← Chapter 1 Jump to: Chapter 3 →