Amos 9

Guarani 2015 (Ñanderuete Ñe’ẽ Porã 2015)

← Chapter 8 Jump to:

1Ahecha Ñanderuete oñembo’y kuave’ẽmby renda oĩháme ha he’i chéve: Einupã pe okẽ pyruha rehe ha eity umi okẽ jokoha, tojeka iñakãnguéra, ha umi hembýva kyse pukúgui, Che voi ajukáta, ha ndaiporimo’ãi peteĩnte jepe oñani térã okañýtava.

2Oike ramojepe hikuái umi omanomava’ekue retã meve, upégui che po oguenohẽta ichupekuéra; ha ojupi ramo jepe hikuái yvága peve, upégui amboguejýta ichupekuéra.

3Ha okañy ramo hikuái Carmel cérro ru’ãme, upépe ahekáta ichupekuéra ha agueru jevýta, ha jepevémo okañy hikuái che renondégui pe yguasu ruguaite peve, upépe amondóta mboikuéra oisu’u hag̃ua ichupekuéra.

4Ha oho ramo hikuái ñeñapytĩháme tetã mombyrýpe, upépe amondóta kyse puku ha ajukáta ichupekuéra, che resa oma’ẽta hesekuéra ombyai hag̃ua ha ndaha’éi osalva hag̃ua ichupekuéra.

5Pende Ruete, Yvagaygua Atykuéra Jára, opoko ramo yvýre, oryrýita ha oñemondyipáta mayma oikóva guive ipype, ha pe yvy opu’ã ha oguejy pe Egípto pegua ysyryguasúicha.

6Ha’e ojapo umi arai ha ombyaty umi y ára pegua oñohẽ hag̃ua pe yvy ape ári. Ha’e ohenói umi yguasu, oñeñohẽ hag̃ua yvy apére, Ha’etéva térã Jahve ningo héra, pende Ruete.

7Israel retãygua, peẽ piko ndaha’éi chéve g̃uarã ku Etiopiayguakuéraicha, he’i pende Ruete. Ndachéi piko aguenohẽva’ekue Israélpe Egípto retãgui, ha Filisteayguakuéra, Caftórgui; ha umi Siriayguápe, Kírgui.

8Peikuaa porãke, pende Ruete, pe Jaraitéva resa, oñemoĩma umi tetã hembiapo vaíva rehe, ha Che ahundíta ichupekuéra ko yvy apégui, Che nahundipamo’ãi katu Jacóbo ñemoñarépe, he’i pende Ruete.

9Pema’ẽ porãke, Che amosarambíta Israel retãyguakuéra opaite ambue tetãnguéra apyte rupi, ku trígo ra’ỹingue oñembokuchu háicha peteĩ yrupẽme, ha ndo’ái ichugui peteĩ ha’ỹiguemi jepe yvýpe, upeichaite Che ambokuchúta ichupekuéra.

10Opaite hembiapo vaíva omanóta kyse pukúpe che retãme, he’i ramojepe: Noñemo’ag̃uimo’ãi ni nañanderupitymo’ãi ko mba’evaiete oikótava.

11Upe ára upévape katu Che amopu’ã jevýta David róga ho’amava’ekue, ha ambotypáta ikuára ha amopu’ã jevýta umi óga ho’apava’ekue, ha aheja jevýta ymaguaréicha,

12ikatu hag̃uáicha David ñemoñarenguéra oñemomba’e Edom yvy rembyre rehe ha ambue tetãnguéra rehe, che réra oñehenói haguépe, he’i pende Ruete, ha katuete oikopáta (Che ha’emava’ekue guive).

13Peikuaa porãke ouhína upe ára, he’i pende Ruete, umi yvy mbovohára omba’apóta umi kóga mono’õhára ndive, ha pe parral’a rykue’ohára omba’apóta umi ñemitỹhára ndive, ha umi cérro tuichágui otykýta parral rykuere, ha mayma cerro oñemongu’íta.

14Agueru jevýta Israelguakuéra umi tetã mombyrýgui omopu’ã hag̃ua hikuái umi táva ojeityva’ekue oiko hag̃ua ipype, oñotỹva’erã iparralty ha ho’úta ivíno, ha oñemitỹta ho’u hag̃ua hi’akue.

15Amoĩta ichupekuéra ijyvyteépe ha araka’evéma ndaipe’aveimava’erã ijyvýgui, Che ame’ẽva’ekue ichupekuéra, he’i Jahve, pende Ruete.

← Chapter 8 Jump to: