Amos 5

Guarani 2015 (Ñanderuete Ñe’ẽ Porã 2015)

← Chapter 4 Jump to: Chapter 6 →

1Pehendúke ko purahéi ñembyasy asy pegua che apurahéitava penderehe, nde, Israel retã.

2Ho’a Israel retã, ha ndaikatumo’ãi opu’ãve, ojeheja upe yvy ho’a haguépe, ha ndaiporivéima omopu’ãtava ichupe.

3Péicha he’i pende Ruete: 1.000 ñorãirõhára osẽ peteĩ távagui, 100 mante ojevýta, ha ambue távagui osẽ ramo 100, 10 mante ojevýta Israel retãme.

4Upévare pende Ruete he’iuka peẽme: Upe cherekáva katuete oikovéta.

5Ani peheka Betélpe, ani peikétei Gilgálpe, ani pehasátei Beersebápe, Gilgal ojegueraháta jepokuapyhápe, ha Betel oñembyaipáta.

6Peheka katu pende Ruetépe ha peikovéta, ỹrõ tatáicha oko’íta Jose róga rehe ha ombokusuguepáta, ha Betélpe ndaipóri avave ikatúva ombogue.

7Pembojovake porã rãngue, pejapo mba’e iróva, peitýgui yvy rehe pe justícia.

8Peheka raẽ mbyja atykuéra apoharépe ha pe mbyja hesakã mbaretéva Jára, Ha’e ningo ojapo pyharégui ko’ẽ porã, ha pe ára hesakãvagui pyhare pytũ, Ha’e ohenói pe y oĩva yguasúpe ha omyasãi yvy apére, Jahve ningo héra.

9Ha’e voi ome’ẽ pu’aka ikatu hag̃uáicha oñembopoguy imbaretévape, ha Ha’e oityukáta umi táva tápia ijyvatevéva.

10Peẽ katu napehenduséi umi penembojovakévape ha pemboyke umi he’íva pe añetegua.

11Pejopy haguére mboriahukuérape ha peipe’a reígui itrígo ha pevende peẽ pemopu’ã hag̃ua pende rogaguasu; ndapeikomo’ãi katu ipype ha peñotỹ ramojepe parralty ndetuicháva ndape’umo’ãi ivíno.

12Che aikuaa porã pene rembiapo ivaieteha ha pene angaipa hetaitereiha, pejopy heko potĩvape ha pejapyhy ñemiháme pirapire pemboyke hag̃ua pe añetegua.

13Upévare umi iñakãguapy porãva umi ára umívape okirirĩta, ivaietégui umi ára.

14Peheka mba’eporã, ha ani mba’evai, ikatu hag̃ua peikove, upéicharamo Ñanderuete, pe Yvagay Atykuéra Jára oĩta penendive, peje haichaite.

15Pepoi mba’evaígui, ha pehayhu mba’eporã, peiporu justícia añeteguáva, upéicharamo Ñanderuete, Yvága Atykuéra Jára oiporiahuvereko jevý Jose rembyremíme.

16Upévare péicha he’i pende Ruete, pende Jará: Opa rupiete oikóta jahe’o ha opaite tape rupi oje’éta: Angái, angái, oñehenóita avei pe omba’apóvape kokuépe, ohendu hag̃ua avei umi opuraheikuaáva purahéi ñembyasy ha jahe’o rehegua.

17Opaite parralty rupi oikóta jahe’o, Che ahasátagui pene mbyte rupi pohavira hag̃ua, he’i pende Ruete.

18Angái, angái, umi oha’ãrõva ou hag̃ua pende Ruete ára. Mba’upépa peipota pende Ruete ára og̃uahẽ, péva ningo peteĩ ára iñypytũva, ndaha’emo’ãi ára hesakãva,

19upérõ ojehúta peẽme ku okañývaicha leõgui, oñohuvaitĩ hag̃ua óso ndive, ha vy’apópe oike rire hógape ojejoko hag̃ua ipo reheve hóga tápia rehe, peteĩ mbói oisu’u ichupe.

20Pende Ruete ára, peteĩ ára iñypytũva, ndaha’emo’ãi peteĩ ára hesakãva.

21Ndacha’éi ha chemonguerái pende areteguasukuéra, ha ndachepy’a rorymo’ãi peẽ peñembyaty jave.

22Ha peikuave’ẽ ramojepe chéve pene kuave’ẽmby ojehapypáva ha tembi’u peguáva, peẽ nachembovy’ái ha pene kuave’ẽmby py’aguapy rehegua ndahechasevéima.

23Anive pepurahéi chéve, pende árpa pu jepe nahendusevéima.

24Aipota katu pende justícia osẽ ýicha yvúgui ha tosyry porã arróyoicha oúva cérrogui.

25Peẽ, Israelgua, peikuave’ẽ piko chéve kuave’ẽmby ojehapypáva ha tembi’u reheguáva umi 40 áño pukukue peiko haguépe desiértope.

26Ndaupéichai, pegueraha katu pende jára gua’u Sicut, ha pene mbyja jára gua’u Quiun ra’ãnga, peẽ voi pejapova’ekuépe.

27Upévare poguerahaukáta Damásco mboypýri, he’i pende Ruete, hérava Yvága Atykuéra Jára.

← Chapter 4 Jump to: Chapter 6 →