Amos 4

Guarani 2015 (Ñanderuete Ñe’ẽ Porã 2015)

← Chapter 3 Jump to: Chapter 5 →

1Pehendúke ko ñe’ẽ kóva peẽ vaca Basan peguáva (kuñakaraikuéra), peiméva Samária cérrope, pejopy asýva mboriahukuérape ha peipy’apy asýva umi oikotevẽvape, ha peje pene ménape: Pegueru víno ja’u hag̃ua.

2Ñanderuete, pe Jaraitéva, oñe’ẽme’ẽ heko porãtee rehe ha he’i: Péina ápe, ouhína pe ára penderehe ija’e’ỹva pendegueraháta mbaretépe, ha pene ñemoñarenguérape pindáre.

3Tapiakua rupi peẽ pehasa asy peg̃uahẽ meve Harmóna cérro peve, he’i Ñanderuete.

4Tapeho Betélpe pejapo vai hag̃ua ha upéi tapeho Gilgálpe pejapo vaive hag̃ua, ha pegueru meme pyhareve pene kuave’ẽmby ha pende diézmo opaite ára mbohapyhápe.

5Peikuave’ẽ pene pan ojejapopyréva levadúra reheve peagradece hag̃ua pende Ruetépe, peichagua tembiapo peẽ, Israel ra’ykuéra, pehayhu voi, he’i pende Ruete.

6Che poheja peiko hag̃ua tye nandi ha tembi’u’ỹre opaite pende tavakuérape ha aheja opa hag̃ua pe pan pende távagui, upeichavéramo jepe ndapejevýi che rendápe, he’i pende Ruete.

7Che ajoko avei pendehegui pe ama mbohapy jasyjere umi ñemitỹngue oñemono’õ mboyve, ha amongy peteĩ táva ári, ha namongyukái ambue táva ári; peteĩ kokuépe oky, ha ambue kokuépe ndokýigui, ñemitỹnguéra ipirupa.

8Ha mokõi térã mbohapy távagui ou ñembotyryryhápe ambue távape hoy’u hag̃ua, ha nahyg̃uatãi hikuái, ha upeichavéramo jepe, ndapejevýi che rendápe, he’i pende Ruete.

9Che pohavira yvytu aku ha yso karúpe. Pe tuku ho’upa pende ka’avoty hetaitéva, pende parralty, pende higoty ha pende olivoty, upeichavéramo jepe ndapejevýi che rendápe, he’i pende Ruete.

10Amboúta pende ári ñemanoguasu (péste) ku Egípto peguaréicha ha pene mitãrusukuérape ajukáta kyse pukúpe, pende kavajukuéra oñemondapáta ha pene ñorãirõhára aty nengue aguerúta pene tĩngua meve, peẽ katu ndapejevýi che rendápe, he’i pende Ruete.

11Sarambi ajapóta pendehegui ku ajapo haguéicha Sodóma ha Gomórrape, ha peikóta ku tata’ýicha hembyva’ekue tatágui, upeichavéramo jepe ndapejevýi che rendápe, he’i pende Ruete.

12Upévare péicha Che ajapóta nderehe, Israel: Eñembosako’i rejojohu hag̃ua nde Járape,

13ha peikuaa porãke: Cérro ha yvytu apohare ndive rejejohutaha, ha Ha’e oikuaa porã mba’épa hetãyguakuéra ojepy’amongeta ipy’apy ruguaitépe, Ha’e ningo pyhare ha ko’ẽ apohare ha oguatáva cérro ru’ãme, Ha’e voi tapia g̃uarã oikóva ha héra Yvaga Atykuéra Jára.

← Chapter 3 Jump to: Chapter 5 →