Hosea 10

Guarani 2015 (Ñanderuete Ñe’ẽ Porã 2015)

← Chapter 9 Jump to: Chapter 11 →

1Israel peteĩ parralty tuicha porãva, hi’a porã ijupe g̃uarãnte, ha hi’ave ohóvo, ombohetave avei ikuave’ẽmby rendakuéra ha ikokue hi’a porãve ohóvo, omopu’ãve avei umi Baal ra’ãngakuéra.

2Israel hova mokõi, ko’ág̃a oñandúta ojapo vai haguére, Ha’e ojokapa ramo ikuave’ẽmby rendakuéra ha oity ramo yvýre Baal ra’ãngakuéra.

3Ko’ág̃a he’i: Ore ndorokyhyjevéima Ñanderuetégui upévare noroikotevẽi avei tetã ruvicha rehe ha mba’épa ha’e ojapokuaa orerehe.

4Ha’ekuéra oñe’ẽ ramo oñe’ẽ rei, ha ome’ẽ ramo iñe’ẽ oñembopy’apeteĩ hag̃ua, ome’ẽnte iñe’ẽ ombotavy hag̃ua, upévare pe jehavira okakuaáta ku ñana okakuaa háicha kokuépe.

5Umi Samariaygua ojepy’apy ojeguerahátarõ itóro ra’yrusu ra’ãngakuéra, umi Betavengua tavayguakuéra oñembyasy ha ipa’ikuéra oryryipa ojegueraháta ramo avei itupão pegua mba’erepyetéva.

6Og̃uahẽta katuete pe ára ojegueraha hag̃ua avei itóro ra’yrusu ra’ãnga peteĩ jopói ramo Asíria retã ruvichaguasúpe. Efraingua otĩetereíta ha Israelgua oikuaáta omomba’eguasu rei hague Baálpe, ha oñandúta iñemomba’eguasu peteĩ ñembotavy ituichaitereiha.

7Samária pu’aka oñehundíta ha hetã ruvicha ojoguáta peteĩ yvyra rakãmíme ovevúiva yguasu apére.

8Ha umi kuave’ẽmby renda Aven pegua oñembyaipáta, upépe Israel oñemohembiapo vai ha hendaguépe opytáta ñana ha ñuatĩndy, upévare upepegua he’íta umi cérrope: Oreaho’i; ha umi cérro ru’ãme: Pe’áke oreári.

9Umi Gibéa ára guive nde, Israel, reñemohembiapo vai, upépe reñepyrũ reñemoĩ Cherehe, upévare upépe pe ñorãirõguasurã nderupitýta avei.

10Che py’aite guive ahaviráta ichupekuéra, ha tetãnguéra oñembyatýva oñemoĩta hesekuéra, Che amyengoviáta hembiapo vaikue.

11Efrain peteĩ vaka pyahu iñe’ẽrenduva’ekuéicha, omba’apo porãkuaava’ekue pe trígo ñemono’õháme, Che voi amoĩ pe cangálla ijajúra rehe, Juda katu ombovo pe kokue yvy ha Jacóbo oikarãi pe yvy ojoja porã hag̃ua.

12Peñotỹ justícia pemono’õ hag̃ua poriahuvereko, pembovo pende kóga yvy ára porã jave, Ha’e omongy hag̃ua ijustícia pendeári.

13Peẽ katu peñotỹ tembiapo vai upévare pemono’õ jevyva’erã jehasa asy ha pe’uva’erã japu hi’áva, pejerovia haguére pene mbaretekuére ha pende soldádo atyguasu rehe.

14Upévare oñehendúta nde tavakuérape ñorãirõ raypuguasu ha opaite nde táva oñemombareteva’ekue oñembyaipáta, Moab retã ruvichakue Salman ombyai haguéicha Betarbélpe iñorãirõha árape, oñepehe’ãmbávo pe sy imembykuéra ndive.

15Peichagua jehasa asy oikóta avei Betélpe pende reko ñaña haguére. Pe ko’ẽju ohasa pya’e háicha, péicha Israel retã ruvicha ohasáta avei.

← Chapter 9 Jump to: Chapter 11 →