Hosea 12

Guarani 2015 (Ñanderuete Ñe’ẽ Porã 2015)

← Chapter 11 Jump to: Chapter 13 →

1Efrain ojerovia yvytúre, ambue tetãre, ha kuarahyresẽ gotýo oho, ijapuve ohóvo ha noñemomirĩsevéi Che renondépe, oñemopeteĩma Asíria ndive, ijacéite ojereraha Egíptope jopói ramo.

2Ha Juda ndive Ha’e oiko py’arópe, Ha’e voi oñe’ẽ pohýi ichupe oiko vai haguére ha upévare omyengoviáta hembiapo vaikue.

3Isy ryépe katu ojapyhy ityke’ýra pytasãgui ha ikuimba’e pu’aka porã reheve oñemoĩ Yvága Jára rehe.

4Oñorãirõ yvága rembiguái ndive ha ipu’aka hese; hasẽ ha ojerure asy oiporiahuvereko hag̃ua ichupe. Ñanderuete ojohu ichupe Betélpe, ha upépe Ha’e oñe’ẽ orendive.

5Ñanderuete, Yvága rembiguái atyguasu Jára, Jahve herateéva.

6Nde, reg̃uahẽ jevýta nde rógape, ejerovia hese, pende Ruete pu’aka rupi eñemopotĩ nde Jára renondépe ha ejerovia nde Jaratee rehe.

7Canaanguáicha oiporu hikuái pe balánza ijapúva, ha ovy’a oporombotavy ramo.

8Ha Efrain he’i: Añete ningo, chemba’erepyeta, ambyaty ramojepe heta pirapire avave nde’imo’ãi che aporomonda hague.

9Che ningo, nde Jára, Egípto retã guive Che romoingove jevýta reiko hag̃ua umi ógape ojejapóva pene rymba pirekuégui ymaguaréicha.

10Che ningo nde Jaratee, peiko guive Egípto retãme, Che añe’ẽ hetava’ekue che profetakuéra, techapáy (vision) ha ñe’ẽ ñembojoja rupi.

11Galaadgua iñaña ha ijapu meme, Gilgálpe oikuave’ẽ hikuái itóro ra’yrusu ambue járape, ikuave’ẽmby renda katu oñembyaíta ha oñemosarambíta ikokue rehe.

12Yma Jacóbo okañyva’ekue, omenda hag̃ua mokõi kuñáre Aram retãme, omba’apo isuégro rymba rerekua ramo.

13Peteĩ proféta rupi pende Ruete oguenohẽ Israélpe Egípto retãgui ha peteĩ proféta rupi oñangareko hese.

14Efrain ombopochy ha ombopy’aro pende Ruetépe ndopoírigui heko ñañágui, upévare ohasa asýta ha pende Ruete katuete ohaviráta ichupe.

← Chapter 11 Jump to: Chapter 13 →