Hosea 8

Guarani 2015 (Ñanderuete Ñe’ẽ Porã 2015)

← Chapter 7 Jump to: Chapter 9 →

1Emoĩ pe turu nde jurúpe, umi penderehe ija’e’ỹva ojeitýta Ñanderuete rogaguasu ári ku ñapykanícha, upéicha che pohaviráta pepoi haguére che ñe’ẽme’ẽgui ha peñemoĩ haguére che rembiapoukapýre.

2Upémaramo pesapukáita chéve ha pejéta: Nde, ore Ruete, ore Jára, ore roikuaa, ore ningo Israel retãygua, ore ningo ne retã voi.

3Israel opoi Ijára mborayhúgui, upévare hesekuéra ija’e’ỹva omuñáta ichupekuéra.

4Ha’ekuéra omoĩma hetã ruvicha ramo Che aipota’ỹvape ha oiporavo imburuvicha ramo Chekuaa’ỹvape, ipláta ha hi’órogui ojapo hikuái ijára gua’u ra’ãnga, ha upévare oñehundiva’erã hikuái.

5Samária, nde remomba’eguasu peteĩ torora’y ra’ãngápe, Chekueráima, upevarehe chepochy nendive, araka’e peve piko aha’ãrõveva’erã rohavira hag̃ua.

6Israel retãygua ojapókuri pe torora’y ra’ãnga, peteĩ ikatupyrýva rembiapokue, ndaha’éi katu peteĩ Jára, jára gua’u uvei, upévare pende tóro ra’ãnga katuete oñemongu’íta, ndorekóigui pu’aka.

7Ha’ekuéra oñotỹ yvytu ha omono’õva’erã yvytu jepoka (kusuviru’ũ); ha oñotỹ ramo jepe trígo, ndahi’amo’ãi, ha hi’ami ramojepe tetã ambueygua ho’upáta.

8Israel oñemokõma. Ko’ág̃a oimehína ambue tetãnguéra apytépe ku kambuchi oñemboykévaicha, ha avave ndoipotavéima.

9Ojegueraha hikuái Asíriape. Efrain ojogua peteĩ búrro hesaitévape, oguata reíva opárupi. Jopói rupi Efrain ojogua iñirũnguérape.

10Efrain ojoguase ambue tetãnguérape ijopói rupi, Che katu ajopyvéta ichupekuéra opa hag̃ua ijopói Asíria retã ruvichaguasúpe g̃uarã.

11Efrain omboheta ikuave’ẽmby rendakuéra, umía ojapo hikuái oñemohembiapo vaive hag̃ua.

12Che ahenduka ramojepe ichupekuéra 10.000 tembiapoukapy, ha’ekuéra oguereko umía imba’e’ỹva ramoguáicha.

13Tymba kuave’ẽmby ohayhu hikuái, ho’u hag̃ua so’ónte, umía nombovy’amo’ãi Ijapoharépe. Ko’ág̃a Che ahaviráta ichupekuéra hembiapo vaikuéra rehe ha amondo jevýta ichupekuéra Egípto retãme.

14Israel hesaráima Ijapoharégui, omopu’ã hikuái ambue jára gua’u rogaita, ha Juda omboheta itavakuéra tápia, Che katu ajatapýta itavakuéra rehe, ha imburuvichaguasu rogakuéra ahapýta.

← Chapter 7 Jump to: Chapter 9 →