Numbers 20

Guarani 2015 (Ñanderuete Ñe’ẽ Porã 2015)

← Chapter 19 Jump to: Chapter 21 →

1Israel ñemoñarenguéra og̃uahẽ Zin desiértope, jasy peteĩháme, ha opyta hikuái Cadéspe; ha upépe Miriam omano ha upépe oñeñotỹ ichupe.

2Israelguakuéra ndojohúigui y, oñemoĩ jevy Moises ha Aaron rehe,

3ha oñe’ẽ vai hikuái Moises rehe, ha he’i: Romanombánteva’erãmo’ã Egíptope ore pehẽnguekuéra ndive, Ñanderuete ojukamava’ekue.

4Mba’upépa peẽ peguerúra’e Ñanderuete retã ko desiérto kóvape romanomba hag̃ua ko’ápe, ore ha ore rymbakuéra.

5Ha mba’upépa ra’e oreguenohẽ ra’e Egíptogui, oregueru hag̃ua ko yvy ivaietévape, ndaha’éiva kokuépe g̃uarã, ni higokuéra, ni parral térã granádape g̃uarã ko yvy, kóvape ndojejohúi ni y jay’u hag̃ua.

6Ha Moises ha Aaron oho pe óga jojohuha rokẽme, ha oñesũ tĩndyhápe; ha Ñanderuete reko jajaipa ojehechauka hi’arikuéra.

7Ha Ñanderuete oñe’ẽ Moiséspe, ha he’i:

8Ejagarra pe yvyra po’i ha embyatyuka Israelguakuérape, nde ha nde ryke’y Aaron renondépe, ha eñe’ẽ ichupekuéra pe itaguasu oĩháme ha ere: Ko itaguasu ome’ẽta peẽme y, ha omboy’úta opaite Israelguakuéra ha hymbakuérape.

9Upémaramo Moises ojagarra ijyvyra po’i, Ñanderuete he’i haguéicha ichupe.

10Ha Moises ha Aaron ombyatyuka Israelguakuérape pe itaguasu renondépe, ha he’i ichupekuéra: Pehendúke ko’ág̃a, peẽ peñemoĩva Ñanderuete rehe, roguenohẽkuaa piko peẽme y ko itaguasu kóvagui.

11Ha Moises omopu’ã ipo ha oinupã ijyvyra po’ípe pe itaguasu mokõi jevy; ha osẽ y neporãva, ha Israelguakuéra ha hymbakuéra hoy’u ichugui.

12Upéi Ñanderuete he’i Moises ha Aarónpe: Ndapejeroviapáigui cherehe ha peẽ nachemomba’eguasúigui Israel ñemoñarenguéra renondépe, upévagui napomoingemo’ãi avei che retãyguakuéra ndive pe yvy Che ame’ẽtavape ichupekuéra.

13Kóa ningo pe y ñe’ẽ juavy reheguáva, Israel ñemoñarenguéra oñemoĩgui Ñanderuete rehe, ha Ha’e ohechauka haguépe heko jajaipa.

14Cádesgui Moises omondo ñe’ẽrerahahára Edom retã ruvichaguasu rendápe, ha he’iuka ichupe: Péicha he’i Israel, nde ryvy; nde reikuaa porã voi, opaite mba’e rohasáva rohóvo;

15ore rukuéra ohova’ekue Egíptope, ha roikova’ekue Egíptope heta áño, ha umi Egiptoygua orejopy vaiete;

16ha romba’ejerure asy Ñanderuetépe Ha’e ohendu ore ñe’ẽ, ha ombou peteĩ yvága rembiguái oreguenohẽ hag̃ua Egíptogui; ha péina ápe roimeroína Cadéspe, pe táva opyta ag̃ui ne retã rembe’ýgui.

17Rojerure ndéve rohasa hag̃ua ne retã rupi, ndorohasamo’ãi pende kokue ni pende parralty rupi, ndoroy’umo’ãi pende ykuágui, pe tetã ruvichaguasu rape rupínte rohóta, ropia’ỹre akatúa ni asu gotýo, rohasapa peve ne retã rupi.

18Edom katu ombohovái ha he’i: Ndapehasamo’ãi che retã rupi, ha peike ramo, ore rohóta roñemoĩ hag̃ua penderehe kyse pukúpe.

19Ha Israel ñemoñarenguéra he’iuka jevy: Pe tapeguasu rehénte rohose; ha roy’u ramo nde ýgui, ore ha ore rymbakuéra, ore ropagapáta ndéve; ehejána torohasa ne retã rupi.

20Ha’ekuéra katu ombohovái jevy: Ndapehasamo’ãi. Ha heta Edomgua ou pyapy mbarete reheve oñorãirõ hag̃uáicha Israelguakuéra ndive.

21Edom ndoipotáigui Israel ohasa hetã rupi, Israel opia ichuguikuéra.

22Ha oipykúivo Cadésgui Israel ñemoñarenguéra ou Hor cérrope.

23Ñanderuete oñe’ẽ Moises ha Aarónpe Hor cérrope, Edom retã rembe’ýpe, ha he’i:

24Aaron oñembojátama hetãygua omanomava’ekue rendápe, ha’e ndoikemo’ãi pe yvy Che ame’ẽtava Israel ñemoñarenguérape, napeneñe’ẽrendúigui pe y Cadesguápe.

25Eraha Aaron ha ita’ýra Eleazárpe, ha pejupi Hor cérrope,

26emboi Aaron ao, ha emonde Eleazar, ita’ýra rehe; Aaron oñembojátama omanomava’ekue rendápe.

27Ha Moises ojapo Ñanderuete he’i haguéicha ichupe; ha ojupi hikuái Hor cérrope Israelguakuéra resa renondépe.

28Ha Moises omboi Aaron ao ha omonde ita’ýra Eleazar rehe; ha Aaron omano rire pe cérro ru’ãme, Moises ha Eleazar oguejy pe cérrogui.

29Ha Israelguakuéra ohechávo Aaron omano hague, ombyasy joa hikuái ichupe 30 ára pukukue.

← Chapter 19 Jump to: Chapter 21 →