Numbers 29

Guarani 2015 (Ñanderuete Ñe’ẽ Porã 2015)

← Chapter 28 Jump to: Chapter 30 →

1Pe jasy 7-hápe, pe ára peteĩháme peguerekóta ambue atyguasu pe óga jojohuhápe; mba’eveichagua tembiapo ndapejapoiva’erã; pe ára pévape oñembopuva’erã peẽme turu.

2Ha peikuave’ẽta kuave’ẽmby ojehapypáva mba’e ryakuã asýva ramo pende Ruetépe g̃uarã, peteĩ tóro ra’yrusu, peteĩ ovecha mácho, 7 ovecha ra’yrusu iporãitéva, hi’áño peteĩva;

3umi kuave’ẽmby reheve peikuave’ẽta trígo ku’i porã oñembojehe’apyréva acéite reheve, 6,6 lítro trígo ku’i porã peteĩteĩva pe tóro ra’yrusu reheve, ha 4,4 lítro trígo ku’i pe ovecha mácho reheve,

4ha 2,2 lítro trígo ku’i peteĩteĩ umi 7 ovecha ra’yrusu reheve.

5Peikuave’ẽta avei peteĩ kavara mácho kuave’ẽmby angaipa reheguáva ramo, peñemoĩ porã jevy hag̃ua.

6Anítei penderesarái pe ambue kuave’ẽmbýgui jasy pyahu peguáva, ha pe kuave’ẽmby ojehapypáva meme árape ikuave’ẽmby tembi’u reheguáva víno reheve ojejapouka haguéicha, mba’e ry’akuã porã pende Ruetépe g̃uarã.

7Ko jasy 7-hápe pe ára 10-hápe, peguerekóta atyguasu pe óga jojohuhápe, pe ára pévape pehasava’erã pekaru’ỹre ha mba’eveichagua tembiapo ndapejapoiva’erã;

8ha peikuave’ẽva’erã kuave’ẽmby ojehapypáva pende Ruetépe mba’e ryakuã asýva: Peteĩ tóro ra’yrusu, peteĩ ovecha mácho ha 7 ovecha ra’y iporãitéva, hi’áño peteĩva.

9Ko’ã kuave’ẽmby reheve peikuave’ẽta avei trígo ku’i porã oñembojehe’apyréva acéite reheve, 6,6 lítro trígo ku’i porã peteĩteĩva pe tóro ra’yrusu reheve, ha 4,4 lítro trígo ku’i pe ovecha mácho reheve,

10ha 2,2 lítro trígo ku’i peteĩteĩva umi 7 ovecha ra’yrusu reheve;

11ha peikuave’ẽta peteĩ kavara mácho kuave’ẽmby angaipa reheguáva hendive; peikuave’ẽta avei pene kuave’ẽmby ojehapypáva acéite ha víno reheve pejepokuaa háicha meme árape.

12Ko jasy 7-hápe, pe ára 15-hápe peguerekóta ambue atyguasu pe óga jojohuhápe; mba’eveichagua tembiapo ndapejapoiva’erã, ha pemboareteguasúta pende Ruetépe ko’ã 7 ára pukukue.

13Ha peikuave’ẽta 13 tóro ra’yrusu, mokõi ovecha mácho ha 14 ovecha ra’y iporãitéva, hi’áño peteĩva, kuave’ẽmby ojehapypáva pende Ruetépe g̃uarã mba’e ryakuã asýva ramo.

14Ko’ã kuave’ẽmby reheve peikuave’ẽta avei trígo ku’i porã oñembojehe’apyréva acéite reheve, 6,6 lítro trígo ku’i peteĩteĩva umi 13 tóro ra’yrusu reheve, 4,4 lítro trígo ku’i peteĩteĩva umi mokõi ovecha mácho reheve,

15ha 2,2 lítro trígo ku’i porã peteĩteĩva umi 14 ovecha ra’yrusu reheve,

16ha peteĩ kavara mácho kuave’ẽmby angaipa reheguáva; umi ambue kuave’ẽmby ojehapypáva tembi’u ha víno reheve peikuave’ẽvéta avei pejepokuaa háicha.

17Ha pe ára mokõiháme: 12 tóro ra’yrusu, mokõi ovecha mácho, 14 ovecha ra’yrusu iporãitéva, hi’áño peteĩva.

18Peteĩteĩ ko’ã kuave’ẽmby reheve peikuave’ẽta avei kuave’ẽmby tembi’u ha víno reheguáva pejepokuaa háicha,

19ha peteĩ kavara mácho kuave’ẽmby angaipa reheguáva ramo; peikuave’ẽvéta avei umi kuave’ẽmby ojehapypáva ha kuave’ẽmby víno reheguáva reheve pejapo háicha meme árape.

20Ha pe ára mbohapyhápe: 11 tóro ra’yrusu, mokõi ovecha mácho ha 14 ovecha ra’yrusu iporãitéva, hi’áño peteĩva;

21ha ko’ã kuave’ẽmby reheve peikuave’ẽta avei trígo ku’i porã umi tóro ra’yrusu reheve, umi ovecha mácho reheve ha ovechara’ykuéra reheve, Ñanderuete he’iuka haguéicha peẽme, ha tymba heta oĩ háicha,

22ha peteĩ kavara mácho angaipa reheguáva, peikuave’ẽvéta avei pe kuave’ẽmby ojehapypáva meme árape ikuave’ẽmby tembi’u ha víno reheguáva reheve.

23Pe ára irundyhápe peikuave’ẽta: 10 tóro ra’yrusu, mokõi ovecha mácho ha 14 ovecha ra’yrusu iporãitéva, hi’ áño peteĩva;

24ko’ã kuave’ẽmby reheve peikuave’ẽta avei trígo ku’i porã umi tóro ra’yrusu reheve, umi ovecha mácho reheve ha umi ovecha ra’yrusu reheve, Ñanderuete he’iuka haguéicha peẽme, ha tymba hetaha oĩ háicha;

25ha peteĩ kavara mácho kuave’ẽmby angaipa reheguáva ramo, peikuave’ẽvéta avei pe kuave’ẽmby ojehapypáva meme árape, kuave’ẽmby tembi’u ha víno reheguáva reheve.

26Pe ára 5-hápe: 9 tóro ra’yrusu, mokõi ovecha mácho ha 14 ovecha ra’yrusu iporãitéva, hi’áño peteĩva;

27ko’ã kuave’ẽmby reheve peikuave’ẽta avei trígo ku’i porã umi tóro ra’yrusu reheve, umi ovecha mácho reheve ha umi ovecha ra’yrusu reheve, Ñanderuete he’iuka haguéicha peẽme, ha tymba hetaha oĩ háicha;

28ha peteĩ kavara mácho kuave’ẽmby angaipa reheguáva, peikuave’ẽvéta avei umi kuave’ẽmby ojehapypáva meme árape kuave’ẽmby tembi’u ha víno reheguáva reheve.

29Pe ára 6-hápe: 8 tóro ra’yrusu, mokõi ovecha mácho ha 14 ovecha ra’yrusu iporãitéva, hi ’ áño peteĩva.

30Ko’ã kuave’ẽmby reheve peikuave’ẽta avei trígo ku’i porã umi tóro ra’yrusu reheve, umi ovecha mácho reheve ha umi ovecha ra’yrusu reheve, Ñanderuete he’iuka haguéicha peẽme, ha tymba hetaha oĩ háicha,

31ha peteĩ kavara mácho kuave’ẽmby angaipa reheguáva ramo; peikuave’ẽvéta avei pe kuave’ẽmby ojehapypáva meme árape, ikuave’ẽmby tembi’u ha víno reheguáva reheve.

32Pe ára 7-hápe: 7 tóro ra’yrusu, mokõi ovecha mácho ha 14 ovecha ra’yrusu iporãitéva, hi’áño peteĩva;

33ko’ã kuave’ẽmby reheve peikuave’ẽta avei trígo ku’i porã umi tóro ra’yrusu reheve, umi ovecha mácho reheve ha umi ovecha ra’yrusu reheve, Ñanderuete he’iuka haguéicha peẽme, ha tymba hetaha oĩ háicha;

34ha peteĩ kavara mácho angaipa reheguáva, peikuave’ẽvéta avei pe kuave’ẽmby ojehapypáva meme árape kuave’ẽmby tembi’u ha víno reheguáva reheve.

35Pe ára 8-hápe pemboareteguasúta; mba’eveichagua tembiapo ndapejapoiva’erã.

36Ha peikuave’ẽta kuave’ẽmby ojehapypáva ha hyakuã porãva pende Ruetépe g̃uarã, peteĩ tóro ra’yrusu, peteĩ ovecha mácho, 7 ovecha ra’yrusu iporãitéva, hi’áño peteĩva;

37ko’ã kuave’ẽmby reheve peikuave’ẽta avei trígo ku’i porã, pe tóro ra’yrusu reheve, umi ovecha mácho reheve ha pe ovecha ra’yrusu reheve, Ñanderuete he’iuka haguéicha peẽme, ha tymba hetaha oĩ háicha;

38ha peikuave’ẽta peteĩ kavara mácho kuave’ẽmby angaipa reheguáva, peikuave’ẽvéta pe kuave’ẽmby ojehapypáva meme árape kuave’ẽmby tembi’u ha víno reheguáva reheve.

39Ko’ã mba’e peikuave’ẽta Ñanderuetépe g̃uarã pende areteguasúpe pemomba’eguasu hag̃ua ichupe pene kuave’ẽmbynguéra rupi pendejeheguínte peme’ẽséva, pene kuave’ẽmby ojehapypáva, pene kuave’ẽmby tembi’u ha víno reheguáva, ha pene kuave’ẽmby py’aguapy reheguáva reheve.

← Chapter 28 Jump to: Chapter 30 →