Song of Solomon 2

Guarani 2015 (Ñanderuete Ñe’ẽ Porã 2015)

← Chapter 1 Jump to: Chapter 3 →

1Kuñataĩ oñe’ẽve: Che ningo yvoty Saron pegua, pe yvoty ñu megua (lírio).

2Karia’y oñe’ẽ: Che ahayhúva oiko yvoty ñumeguáicha (lírio) ñuatĩ aty mbytépe.

3Kuñataỹ oñe’ẽ: Ku manzána oiko háicha yvyra ka’aguy apytépe, péicha hína che mborayhu jára karia’ykuéra apytépe, ikuarahy’ãme aguapyse, ha hi’akue he’ẽ asy che jurúpe.

4Ha’e chereraha hóga oñongatuhápe ivíno ha upépe ha’e cherechauka iñirũnguérape, ha ipoyvi mborayhu rehegua cheñu’ã.

5Chemohyg̃uatãna pan he’ẽva reheve, ojejapova’ekue parral rakã’águi ha chemombareténa manzánape. Mborayhu kunu’ũgui cherasyete’aína.

6Ipo asu toĩ che akã guýpe ha ijakatúa tacheñu’ã.

7Karia’y oñe’ẽ: Che ningo poavisase peẽ Jerusalen rajykuérape ha umi oimevahína umi ñuguasu ha ka’aguýpe, ani pemombáy ha ani pemondýi che ahayhúvape, toke ha’e okeseha peve.

8Kuñataĩ oñe’ẽ: Pejapysaka, pema’ẽna, ouhína che mborayhu jára, opo oúvo umi cérro rehe.

9Che mborayhu jára ningo ojogua guasúpe, térã ku guasu pytã ra’y rusúicha. Péina ápe oĩhína ko ñande korapy kupépe, oma’ẽhína umi ovetã rupi, oma’ẽ ma’ẽ ipa’ũha rupi.

10Che mborayhu jára oñe’ẽ ha he’i chéve: Epu’ã kuñataĩ, che mborayhu, nde neporãitevéva, ejumi.

11Eikuaa porãke umi ro’yha ára ohasapáma, opíma pe ama ha oho.

12Yvotykuéra ojehechaukáma yvy apére, pe puraheiha ára og̃uahẽma, ha oñehendúma pyku’ipe oñe’ẽ ñane retãme.

13Pe hígo hi’apáma, ha umi parral ipotypáva omyasãi hyakuã, epu’ã, nde kuñataĩ, che mborayhu neporãitéva, epu’ãna ha ejumi che rendápe.

14Che pykasumi, reiméva umi itakua rupi, umi yvy ijyvateveha rupi, ehechauka chéve nde rova, ehenduka chéve ne ñe’ẽ, ne ñe’ẽ he’ẽ asýva ha tahecha nde rova iporãitéva.

15Mokõivéva oñondive oñe’ẽ: Pejapyhy umi aguara, umi aguara ra’y, ombyaipáva parralty, ore parralty ipotypámagui.

16Kuñataĩ oñe’ẽ: Che mborayhu jára ningo che mba’e, ha che imba’e; ha’e omongaru hymbakuéra yvotyty pa’ũme.

17Pe ára iñapysẽ meve ha ohopa peve umi kuarahy’ã, ejúna che mborayhu jára ku guasúicha térã guasu ra’ýicha cerrokuéra rehe.

← Chapter 1 Jump to: Chapter 3 →