Song of Solomon 5

Guarani 2015 (Ñanderuete Ñe’ẽ Porã 2015)

← Chapter 4 Jump to: Chapter 6 →

1Karia’y oñe’ẽ: Che ajúma che yvatýpe, nde che rembirekorãmi, amono’õma che mírra ha umi mba’e ryakuã porã; ha’úma che eíra, che víno ha che kamby. Pekaru joa che irũnguéra; che rayhupára pey’u ha peñemohyg̃uatã mborayhu reheve.

2Kuñataĩ oñe’ẽ: Che rete okéma, che py’apy katu ne’ĩra. Ehendumína, oúma ha ombota che rokẽme he’ívo: Che mborayhu jára eipe’amína chéve ne rokẽ, che rembirekorãmi, che pykasumi iporãitéva, che akã henyhẽmbágui ysapýgui, che akã raguégui otyky pyhare ysapy.

3Amboipáma che aógui, mba’éichapa añemonde jevýta. Ajoheipáma che pykuéra; mba’éichapa amongy’apa jevýta.

4Che mborayhu jára omoinge ipo pe okẽ kua rupi ha che py’a otytýi torypópe che retepýpe.

5Che apu’ã aipe’a hag̃ua pe okẽ che mborayhu járape g̃uarã, ha che pógui osyryhína mírra (mba’e ryakuã porã asy), ha che kuãnguéragui osyryhína acéite hyakuã porãva pe okẽ ñembotyha reheve.

6Che aipe’a pe okẽ che mborayhu járape g̃uarã; ha che mborayhu jára katu oho jepéma, ohasámara’e; ha iñe’ẽngue rapykuéri oho che ánga. Aheka ichupe, ha ndajohuvéi; ahenói ichupe, ha nombohováiri.

7Umi kuimba’e oñangarekovahína pyharekue rupi chejohu. Umía chenupã ha mbaretépe oipe’a che rova ao mo’ãha,

8Jerusalen rajykuéra che ajerure asymi peẽme pejohu ramo che mborayhu járape, peikuaaukami ichupe cherasýma imborayhu kunu’ũgui.

9Jerusalen rajykuéra oñe’ẽ: Mba’épe piko iporãve ne mborayhu jára, ambue mborayhu jára apytégui, nde kuña iporãvéva. Mba’épe piko iporãve ne mborayhu jára, ambue mborayhu jára apytégui, rejerure asy hag̃ua oréve péicha.

10Kuñataĩ oñe’ẽ: Che mborayhu jára ningo ipire pytãũ omimbi 10.000 apytégui, pya’e ojekuaáta ichupe.

11Iñakã ha’ete óro iporãitéva, iñakã rague iñapopẽmba ha hũ vera yryvuichaite.

12Hesakuéra ku pykasu resáicha yakã rembe’ýpe, kambýpe ojejohéi ha oñemohenda porãitéva.

13Umi hova’yke ha’ete mba’e ryakuã asy ñemitỹngue, ku yvoty ryakuã asyichaite, hembekuéra ku lírio (yvoty) ha mírra ryakuã asy omondykývaicha.

14Ipokuéra ku oroguigua kuãirũicha, ijeguakáva ita vera pytãme; hete elefánte rãinguéicha oñeñu’ãva ita vera hovýpe.

15Hetyma ha’ete ku itatĩguigua (mármol) horcõicha ha oguapy ipyenda oroguigua porãite ári ha ojoguaite umi cédro Líbano pegua iporavopyrévape.

16Iñapekũ he’ẽ asy ha heko iporãite. Peichaite hína che mborayhu jára, peichaite hína che angirũ, peẽ Jerusalen rajykuéra (peikuaa hag̃ua ichupe).

← Chapter 4 Jump to: Chapter 6 →