Song of Solomon 7

Guarani 2015 (Ñanderuete Ñe’ẽ Porã 2015)

← Chapter 6 Jump to: Chapter 8 →

1Karia’y oñe’ẽ: Mba’eichaitépa iporã nde py rehegua guata, nde mburuvicha rajy, ne rumby ojejapo porãite ha’eténte ku jeguaka hepyetéva, ikatupyrýva rembiapokue porãitéicha.

2Ne retymakuéra puru’ã ha’ete ku víno kambuchícha, tapia henyhẽva vínogui. Nde rye ojogua trígo atýrape oñemongoráva yvoty reheve.

3Nde pyti’a ku guasu ra’y kõinguemícha.

4Nde ajúra ku óga yvate elefánte rãingueguiguáicha; nde resa ku Hesbon pegua yrenda, Bat-rabim rokẽ ypy peguáicha; ne tĩ ha’ete ku Líbano pegua óga yvate oma’ẽva Damásco rehe.

5Ha ne akã ku Carmel ru’ãicha; ha ne akã rague ha’ete pe tetã ruvicha inimbo pytã osãingopáva hogaguy rehe.

6Mba’eichaitépa neporã, ha mba’eichaitépa ndejuky, ne mborayhu he’ẽ asy.

7Nde yvatekue ha’ete umi karanda’y, ha nde pyti’a ojogua hi’a apesãme.

8Che ha’ékuri: Ajupíta ne karanda’y rehe, aipo’o hag̃ua hi’akuéra. Nde pyti’a ku parral’a apesãicha ha nde pytuhẽ hyakuã ku manzánaicha.

9Ha nde juru ku víno porãicha, oike vevuimíva pe mborayhu jára rehe, ha omoñe’ẽ jevýva umi okéva rembe.

10Kuñataĩ oñe’ẽ: Che ningo che mborayhu jára mba’e, ha ha’e chévente chepota.

11Ejúna, nde che mborayhu, ñasẽ ñu rehe, ha jahasa pe pyhare umi yvyra guýpe.

12Pyhareve ñapu’ã oñondive jaha hag̃ua parraltýpe, jahecha hag̃ua hokýpa umi parral, ha ipotýpa umi granáda, upépe ame’ẽta ndéve che mborayhu.

13Hyakuãma umi mandragora’a ha ñane rokẽ ári oĩ opaichagua yva he’ẽva, ipyahúva ha ikãva avei, ndéve g̃uarã, che mborayhu jára, añongatupamava’ekue ndéve g̃uarã.

← Chapter 6 Jump to: Chapter 8 →