Song of Solomon 3

Guarani 2015 (Ñanderuete Ñe’ẽ Porã 2015)

← Chapter 2 Jump to: Chapter 4 →

1Pyharekuépe aheka che rupápe che ánga ohayhúvape, aheka ha máramo ndajohúi ichupe.

2Upéramo apu’ã, ha ajere jere pe tavapy rehe; umi cálle ha okarusu (pláza) rupi, aheka pe che ánga ohayhúvape, ndajohúi katu ichupe.

3Umi kuimba’e pyharekuépe oñangarekóva pe táva rehe chejohu ha che ha’e ichupekuéra: Ndapehecháipa pe che ánga ohayhúvape.

4Ahasa rire mbykymi ijypyguikuéra, ajohúma che ánga ohayhuetévape: Ajapyhy ichupe ha ndahejavéi, agueraha peve ichupe che sy kotýpe, che anace haguépe.

5Karia’y oñe’ẽ: Che ajerure asy Jerusalen rajykuéra peimévape, umi guasu ha umi guasu kuña ñu rupigua rehe oĩva, ani pemombáy ha ani pemondýi che ahayhúvape, peheja toke ha’e okeseha peve.

6Mokõivéva oñondive oñe’ẽ: Máva piko ou ko desiértope oñemopu’ãva ku tatatĩcha, hyakuã asýva mírra ha inciénso (mba’e ryakuã porãite) ha opaichagua mba’e ku’i hyakuã porãvape.

7Péina ápe ou Salomon, 60 kuimba’e ipy’aguasúva ndive, ogueraháva iguapyhaguasu, ha’ekuéra ningo umi imbaretevéva Israel kuimba’ekuéra apytégui.

8Opavave ikyse puku iku’áre, ha’ekuéra ikatupyry ñorãirõguasuhápe. Ha’ekuéra oñangareko tetã ruvicha Salomon rehe pyhare pukukuépe.

9Pe tetã ruvicha Salomon ojapouka ijupe g̃uarã ko guapyhaguasu Líbano yvyrágui.

10Ijape jokoha ojapo óro morotĩgui, ijatukupe jekoha óro gui, iguapyha ao pytãitégui, ha Jerusalen rajykuéra ombojegua hyepy ipo rembiapo iporãitévape, ojogua ao po’ípe, ohechauka hag̃ua ohayhuha ichupe.

11Pesẽna, peẽ Jerusalen rajykuéra, ha pehechami tetã ruvicha Salomónpe, iñakã jeguaka reheve, isy omoĩva’ekue iñakã rehe omendaha árape, ipy’apy ovy’aitereígui.

← Chapter 2 Jump to: Chapter 4 →