1 Samuel 5

Gussi (EBIBILIA ENCHENU) 2020

← Chapter 4 Jump to: Chapter 6 →

1Ekero Abafilisti bairete Esanduku eria ya Nyasae, bakayebogoria korwa Ebeni‐Eseri, bakayeira goika Asidodi,

2bakayesoyia ase hekalu ya Dagoni, bakayebeka ensemo ya Dagoni, enyasae yabo.

3Rituko ria kabere mambia chuni, ekero abanto b’Asidodi babogete, bakanyora Dagoni egwete inse maumama bosio bw’Esanduku eria y’Omonene. Bakayegororokia, bakayetenenia aase aye.

4Rituko ria gatato bagachia koboka mambia chuni, bakanyora naende Dagoni yagure inse maumama, bosio bw’Esanduku eria y’Omonene. Omotwe o Dagoni, na amaboko aye, konya biabutokire bire agwo ase omoriibo o inse bw’egesieri, ne rieene rioka nario riatigarete.

5Ayio naro akogera abakuani ba Dagoni na abanto bonsi baria bagosoa ase hekalu ya Dagoni agwo Asidodi batari gotacha omoriibo o inse bw’egesieri nonya ngoika rero iga.

6Okoboko kw’Omonene gokaritoera abanto b’Asidodi. Ere agachanda na kwoboyia abanto bonsi b’Asidodi amo nab’orogongo orwo rwonsi, akabaaka bakariegwa namagumba.

7Ekero abanto b’Asidodi baroche amang’ana ayio, bagateba, “Esanduku eye ya Nyasae bw’Abaisraeli tekonyara kobeera aiga amo naintwe, ekiagera okoboko kw’Omonene nokorito igoro asetore, na igoro ase Dagoni, enyasae yaito.”

8Bagatoma abanto basangererie amo abanene bonsi b’Abafilisti, bakababoria, “Naki togokora n’Esanduku eye ya Nyasae bw’Abaisraeli?” Barabwo bakairaneria, “Esanduku eria ya Nyasae bw’Abaisraeli tiga eirwe Gati.” Ase igo bakaira Esanduku eria ya Nyasae bw’Abaisraeli aroro.

9Ekero bayeirireo, Omonene akarenta obotantanu obonene ase abanto b’omochie oria, agaaka abanto bonsi, abanene na abake, ase okobarentera amagumba.

10Erio bakaira Esanduku eria ya Nyasae goika omochie bw’Ekironi. Korende ekero yaigete aroro, abanto b’Ekironi bagaaka amariogi, bakabora, “Barentire Esanduku eria ya Nyasae aiga seito, erinde batoite intwe twensi.”

11Ase ayio bagatoma abanto basangererie amo abanene bonsi b’Abafilisti, bakabora, “Rusia aiga Esanduku eye ya Nyasae bw’Abaisraeli, moyeiranie gochia aase aye, tebaisa gotoita intwe amo nabana baito.” Obwoba bw’amakweri konya bwasoire ase omochie bwonsi, ekiagera okoboko kw’Omonene nigo kwarenge okorito mono aroro.

12Abanto baria batakwete bakariegwa namagumba, bakarera, na ekerero kiabo kegaika igoro.

← Chapter 4 Jump to: Chapter 6 →