1 Samuel 9

Gussi (EBIBILIA ENCHENU) 2020

← Chapter 8 Jump to: Chapter 10 →

1Ase egesaku kia Benjamin narengeo omonto oyomo ore korokwa Kisi, mosinto bw’Abieli, o Serori, o Bekorati bw’Afia, omonto bw’egesaku kia Benjamin. Kisi nigo arenge omonto omonda.

2Nabwate omwana omomura ore korokwa Saulo. Ere nigo arenge omonyakieni mono. Momura onde tarenge ase egati y’Abaisraeli obwate ekieni ekiya komobua. Ere nigo aetanetie abanto bande bonsi ase obotambe bw’omotwe korwa ase amareko gochia igoro.

3Bono chitigere chia Kisi, ise Saulo, chigasira. Ase igo Kisi agatebia Saulo, “Imoka oire oyomo bw’abasomba, mogende korigia chitigere.”

4Bakagenda, bagaeta ase ense y’ebitunwa y’Efraimu, na ense ya Salisa, korende tibachinyora. Naende bagaeta ase ense ya Saalimu, korende chitigere echio tichiarengeo. Nyuma y’ayio bagaeta ase orogongo rwa Benjamin, nonya naroro tibachinyora.

5Ekero baigete ase ense ya Sufu, Saulo agatebia omosomba oria barenge komo, “Bono tiga toirane gochia nka. Ande nigo tata aratige korengereria igoro ye chitigere, ne ribaga ri’ayio abe ogotochandekera intwe.”

6Omosomba oria akamoiraneria, “Rora, ase omochie oyo omonto o Nyasae nareo, ere nomonto osikire; amang’ana onsi agokwana nigo agoikerana. Eta togende aroro, ande nabo aratotebie amang’ana igoro y’orogendo rwaito.”

7Saulo akaboria omosomba oye, “Onye tokogenda ase omonto oyio, inki tobwate tokomoirera? Endagera twabwate ase ebibekerero biaito yaerire, na keegwa kende titobwati tokoirera omonto oyio o Nyasae. Ninki tobwate?”

8Omosomba oria akamoiraneria naende, “Rora, nimbwate aa akang’ese gi’esekeli y’efeta. Eye ning’ee omonto oria o Nyasae, erinde atotebie enchera tokogenda.”

9(Agwo kare ase Abaisraeli, ekero omonto arenge kogenda koboria ring’ana korwa ase Nyasae nigo arenge goteba, “Inchuo togende ase omorori.” Omonto okorokwa omobani bono, kare nigo arenge korokwa omorori.)

10Saulo agatebia omosomba oye, “Gwatebire buya; inchuo togende.” Ase igo bakagenda ase omochie ase omonto oyio o Nyasae arenge.

11Ekero barenge gotiira ekegoro gochia ase omochie, bakaumerana nabaiseke baare kogenda kobuucha amache, bakababoria, “Inee! Omorori nao are aa?”

12Abaiseke baria bakabairaneria, “Ee, nao are aa, oyio bosio bwaino. Genda bwango momonyore. Mbono achire ase omochie, ekiagera abanto ngochia bare korua ebing’wanso agwo ase ekegoro igoro.

13Ekero mogosoa ase omochie namomonyore ritang’ani ataratiira gochia ase ekegoro koragera. Abanto tibakoragera ritang’ani ataraikao, ekiagera ere goika asesenie ekeng’wanso keria. Erio baria barangeirie banyare gochaka koragera. Ase ayio, genda bwango, ekiagera ase engaki eye nero moramonyore.”

14Ase ayio bakagenda ase omochie. Ekero barenge gosoa aroro bakarora Samweli ogocha koumerana nabarabwo, ekero arenge gotiira gochia aase agwo bakoruera ebing’wanso.

15Bono rituko erimo, ekero Saulo ataracha aroro, Omonene konya omoorokeirie Samweli na omotebirie,

16“Ankio engaki buna eye ninkorentere omonto korwa ase orogongo rwa Benjamin, naye omoake amaguta, erinde abe omonene igoro y’abanto baane Abaisraeli. Nere oratoorie abanto baane korwa ase amaboko ’Abafilisti, ekiagera narorire emechando y’abanto baane, na ekerero kiabo giaikire asende.”

17Ekero Samweli aroche Saulo, Omonene akamotebia, “Omonto oyio nere nagotebia amang’ana aye. Oyo nere orabe okogambera abanto baane.”

18Erio Saulo akamochiera Samweli agwo ase egeita, akamotebia, “Koranche ontebie ase omorori amenyete.”

19Samweli akamoiraneria, “Ninche omorori oyio. Genda motang’ane gochia aase agwo ebing’wanso bikoruerwa, ekiagera rero namorie endagera aroro amo nainche. Ankio ninkoe ribaga ogende, na inche ngotebie amang’ana onsi are ase ebirengererio biao.

20Tochandeka ase engencho ye chitigere chiria chiasirete korwa ase amatuko atato aetire, ekiagera echio chianyorekanire. Inee! Ebinto bionsi ebiya bire ase egati y’Abaisraeli nase ng’o birabe? Nigo birabe asore na ase abanto bonsi b’enyomba ya iso.”

21Saulo akairaneria akabora, “Inche nomonto bw’egesaku kia Benjamin egesaku egeke mono ase Abaisraeli, na eamate yane nero nenke mono ase chiamate chionsi chi’egesaku ekio. Nase ki rende gwakwanire asende ring’ana ringa buna erio?”

22Erio Samweli akaira Saulo amo nomosomba oye, akabasoyia ase enyomba y’abageni, akabaikaransia aase ay’amasikani, ase egati y’abageni bande emerongo etato.

23Samweli agatebia omorugi bwe chindagera, “Renta egetari keria nakoa, nkagotebia ng’a okegache ensemo ao.”

24Ase ayio omorugi oria bwe chindagera akaimokia ekenama keria ekiya, agakebeka bosio bwa Saulo. Samweli agatebia Saulo, “Rora egetari eke kiagachetwe, kiabekirwe ase obosio bwao; okerie, ekiagera naye gwakegacheretwe ng’a oche gokeria ase engaki eyio ekero abageni barangerigwe.” Ase igo Saulo akaragera na Samweli ase rituko erio.

25Ekero batirimbogete korwa aase aria ase ebing’wanso biare koruerwa, bakagenda mwa Samweli kerama igoro, na aroro agwo Samweli akagosoria na Saulo.

26Ekero bwachia gokiamoka, Samweli akarangeria Saulo oyorenge ase ekerama igoro, akabora, “Imoka ngokoobe, ogende ase orogendo rwao.” Saulo akaimoka, na barabwo babere bakagenda bare amo.

27Ekero baikire ang’e nensinyo y’omochie, Samweli agatebia Saulo, “Tebia omosomba oo aete atang’ane.” Omosomba oria akagenda bosio, na Samweli agatebia Saulo, “Beera aiga ake igo, na inche ningotebie amang’ana aya Nyasae akwanire.”

← Chapter 8 Jump to: Chapter 10 →