1 Thessalonians 1

Gussi (EBIBILIA ENCHENU) 2020

Jump to: Chapter 2 →

1Inche Paulo amo na Silivano na Timotheo nkobarikera tore inwe ab’ekanisa y’Abatesaloniki, abamore ase Nyasae Tata na ase Omonene Yeso Kristo: Obuya bobe asemore na omorembe.

2Botambe nigo togoakera Nyasae ng’a mbuya mono ase engencho yaino mwensi, na kobaatora ase ogosaba gwaito.

3Na intwe ase obosio bwa Nyasae Tata oito titori gotiga koinyora emeremo yaino ase okwegena, na ogwechanda kwaino ase obwanchani, na oboremereria bwaino ase okomosemeria Omonene Yeso Kristo.

4Naki abaminto, abamwanchire na Nyasae, twamanyire ng’a ere obachorire.

5Naki intwe titwabarenterete enchili yaito ase amang’ana oka, korende boigo nase chinguru, na ase Omoika Omochenu, na ase okobaraa gochia ase obomaene oboikeranu. Na inwe momanyete chingencho chiaito buna twarenge ase egati yaino ase engencho yaino.

6Inwe mokaba abegi baito, na ab’Omonene, na nonya mwachandegete mono, mwanyorete ring’ana amo nomogoko okorwa ase Omoika Omochenu,

7na igo mokaba ekiorokererio ekiya ase abegeni bonsi ba Makedonia na Akaya.

8Naki korwa asemore ring’ana ri’Omonene riaigurwe, tari ase Makedonia na Akaya oka, korende amang’ana akumire kera aase, ng’a imomwegenete Nyasae. Ase igo titogwenereti gokwana ring’ana rinde rionsi.

9Naki barabwo abanyene baorokirie amang’ana igoro yaito, buna twasoete ase egati yaino, na buna inwe mwaonchokerete Nyasae korwa ase emegwekano y’osasimwa, erinde mokorere Nyasae ore moyo, oyo bw’ekeene,

10na moganye Omwana oye korwa igoro, oyio ere abogetie korwa ase abakure, nere Yeso, oyototooretie korwa ase endamwamu egochi‐gocha.

Jump to: Chapter 2 →