1 Thessalonians 4

Gussi (EBIBILIA ENCHENU) 2020

← Chapter 3 Jump to: Chapter 5 →

1Omoerio, baminto, twababoririe na kobasorora ase Omonene Yeso ng’a buna mweorokereretie korwa asetore nebagwenerete mogenderere kogwenera Nyasae. Buna inwe mogendererete, kora igo na komenteka.

2Naki momanyete amachiko ki twabaete korwa ase Omonene Yeso.

3Naki oko nakwo ogwancha kwa Nyasae, ng’a mobe abachenu, na mweatanane korwa ase obotomani.

4Kera oyomo oino amanye buna akogambera omobere oye omonyene ase obochenu na ogosika,

5tari ase okogania okobe buna abanto b’Ebisaku abatamomanyeti Nyasae.

6Bono onde tamochera oyomwabo na komong’aina ase ring’ana eri, ekiagera Omonene nere okorusia egesiomba ase aya onsi, buna twabamanyetie ritang’ani na kobakurera bokong’u.

7Naki Nyasae tatorangereti tobe ase ogotacheneka, korende ase obochenu.

8Ase ayio, ere oyobwangire aya, tangeti mwanyabanto, korende Nyasae, oyokobaa inwe Omoika oye Omochenu.

9Ase amang’ana’obwanchani bw’obomino, tari nengencho asemore ng’a mbarikere, ekiagera inwe abanyene mworokererigwe na Nyasae, ng’a mwanchane inwe ase inwe.

10Naki ekeene, nigo mwanchete abamino bonsi abare Makedonia yonsi. Korende twabasoroire, baminto, momente ayio mono kobua.

11Naende kora omokia komenya ase obotoereru, na kwenaria ogokora kwaino, na gokora emeremo namaboko aino, buna twabachigete.

12Mogenderere buya, erinde monyore ogosika korwa ase abwo bare isiko, na timoba abamosemeretie gento korwa ase onde.

13Korende baminto, titorigeti ng’a timomanya amang’ana igoro y’abwo bararire, mobaise goichanigwa buna abande abatari nogosemeria.

14Naki onye twegenire ng’a Yeso nakwete, naende akaboka, naboigo nabwo bararire ase Yeso, Nyasae nabarente amo nere.

15Naki aya twabatebirie ase ring’ana ri’Omonene, ng’a intwe abatore moyo, abatwatigaire goika ekero ki’ogocha kw’Omonene, titogotang’anera abwo baikire korara,

16ekiagera Omonene omonyene naike korwa igoro neriogi rie ring’ana ri’ogochika amo neriogi ri’omomalaika omonene, na egeturi ki’egetureri kia Nyasae. Na abwobakwete ase Kristo nababoke ritang’ani.

17Erio nyuma y’ayio intwe, abatore moyo, abatwatigaire, inatobogorigwe amo nabarabwo gochia ase amare, erio torototere Omonene igoro gati. Nabo inatobe amo n’Omonene botambe.

18Ase ayio, remania inwe ase inwe ase amang’ana aya.

← Chapter 3 Jump to: Chapter 5 →