1 Thessalonians 3

Gussi (EBIBILIA ENCHENU) 2020

← Chapter 2 Jump to: Chapter 4 →

1Ase ayio, ekero totanyarete koremereria kobua, togancha gotigara Atene intwe tweka.

2Togatoma Timotheo oyominto, omokori emeremo amo na Nyasae ase okorandia enchili ya Kristo, erinde abakong’ie na kobaremia ase okwegena kwaino,

3erio tatigerigwa nemechando eye. Naki inwe abanyene momanyete ng’a ase eyio nero torageire.

4Naki ekero twarenge amo nainwe ntwatang’anete kobatebia ng’a ntonyore emechando, buna yabete agwo, na inwe moyemanyete.

5Naki ase engencho eyio, ekero ntanyarete koremereria kobua, ngatoma Timotheo, erinde inyare komanya okwegena kwaino. Noboire ng’a omoteemi oria obateemire inwe na emeremo yaito ebe eya bosa.

6Korende bono ekero Timotheo achete asetore korwa seino agatorentera amang’ana amaya igoro y’okwegena kwaino na obwanchani bwaino, na buna motoinyorete buya botambe. Naende agatotebia ng’a more namaiga gotorora intwe, buna naintwe tore namaiga kobarora inwe.

7Ase engencho eyio, baminto, ase obokong’u bwaito, na emechando yaito, tokaremigwa ase okwegena kwaino.

8Naki bono nigo torabe moyo, komorabe moteneine bokong’u ase Omonene.

9Nase nchera ki toranyare koiraneria Nyasae ng’a mbuya mono ase engencho yaino, ase omogoko bwonsi oyotokoigwa ase engencho yaino ase obosio bwa Nyasae oito?

10Obotuko na omobaso nigo tokona‐gosaba ng’a tororane nainwe amasio ase amasio, na koroisia ekebaremete ase okwegena kwaino.

11Bono Nyasae Tata oito omonyene, na Omonene oito Yeso atotang’ane ase enchera yaito, toike seino.

12Omonene abakore momenteke na gokina ase ogwanchana inwe ase inwe, na ase ogwancha abanto bonsi, buna intwe tobanchete inwe.

13Ase igo anyare gokong’ia chinkoro chiaino chibe chitari na komocha, ase obochenu ase obosio bwa Nyasae, Tata oito ekero ki’ogocha kw’Omonene oito Yeso Kristo amo nabachenu baye bonsi.

← Chapter 2 Jump to: Chapter 4 →