Deuteronomy 2

Gussi (EBIBILIA ENCHENU) 2020

← Chapter 1 Jump to: Chapter 3 →

1“Erio tokaonchoka, tokagenda gochia ase erooro goetera ase enchera egochia ase Enyancha Embariri, buna Omonene konya antebirie. Ase amatuko amange, tokaba tokonakoong’anya ase ense y’ebitunwa bia Seiri.”

2“Erio Omonene agakwana nainche, agantebia:

3Mwabeire mokonakoong’anya ase ense eye y’ebitunwa ase engaki entambe eisaine; bono onchoka mogende gochia ensemo ya Sugusu.

4Naende agantebia: Bachike abanto, obatebie ng’a mbare ang’e goeta ase orogongo rw’abanto bamwabo, abanto b’ororeria rw’Esau, abwo bamenyete Seiri. Barabwo nigo barabairoke. Ase ayio mwerende mono,

5timobaisa korwana nabarabwo, ekiagera tinkobaa inwe ense yabo nonya nensemo enke eisaine egesanyi gi’okogoro, ekiagera naeire abanto b’ororeria rw’Esau ense y’ebitunwa ya Seiri ebe eyabo.

6Nigo morarue chibesa mogore endagera korwa asebare morie. Naboigo morue chibesa mogore amache korwa asebare monywe.”

7“Inyora buna Omonene, Nyasae oino, abasesenirie ase emeremo yaino yonsi mwabeire mogokora. Nigo abeire obarendete ase orogendo rwaino ase erooro eye enene ase emiaka eye emerongo ene. Omonene, Nyasae oino, obeire amo nainwe, na inwe timwaremeretwe gento kende.”

8“Erio tokaimoka, tokarua ase abaminto, abanto b’ororeria rw’Esau, abwo bamenyete Seiri, togatiga enchera y’Ekerubo Ekiomo, na Elati, na Esioni‐Geberi. Erio tokaonchoka, tokagenda gochia ase erooro ya Moabu.”

9“Omonene agantebia: Timobaisa gochegia abanto ba Moabu, gose korwana nabarabwo, ekiagera tinkobaa ensemo ende yonsi y’ense yabo ebe eyaino. Naeire abanto b’ororeria rwa Loti omochie o Ari obe oyobo.” (

10“Ase chingaki chia kare, Abaemi nabwo bamenyete agwo. Abanto abwo nigo barenge abanene, naende abange mono, na abatambe bareng’aine n’Abaanaki.)

11Na buna Abaanaki abwo nigo barenge korokwa Abarefai, korende Abamoabu nigo barenge kobaroka Abaemi.

12Agwo kare Abahori boigo mbamenyete Seiri, korende abanto b’ororeria rw’Esau bakabaseria na kobaita, bakamenya ase ense eria ribaga riabo. Bagakora buna Abaisraeli bakorete ase ense eria Omonene abaete ebe eyabo.”

13“Naende Omonene agatotebia: Bono imoka, mogende mwamboke gochia ng’umbu y’akarooche ga Seredi. Erio tokagenda, tokaamboka akarooche akwo.

14Korwa engaki twarwete Kadeshi‐Barinea goika ekero twambogete akarooche ga Seredi nigo yarenge emiaka emerongo etato, na etano na etato. Abanto bonsi b’ekegori keria, abamanyete korwana esegi, bagakwa bakaera, buna Omonene konya atianire.

15Okoboko kw’Omonene nigo kwabaagete, gokabarusia ase egetwori, goika bonsi bagasira kegima.”

16“Ekero abarwani bonsi b’esegi konya bakure,

17Omonene agantebia:

18Rero moetere orobebe rwa Moabu ase enchera ya Ari.

19Ekero moraike ang’e nense y’Abaamori, abanto b’ororeria rwa Loti, timobaisa kobachegia gose kobarwania esegi, ekiagera tinkobaa inwe nonya nensemo eyemo y’orogongo orwo nabaeire barabwo.” (

20Orogongo orwo nigo naende rwamanyekanete buna ense y’Abarefai. Abarefai nabwo bamenyeteo agwo kare, korende Abaamoni bakabaroka Abasamusumi.

21Abanto aba nigo barenge abanene naende abatambe buna Abaanaki; boigo nigo barenge abange. Korende Omonene akabasiria, na Abaamoni bakaba bakomenya ase ense eria ribaga riabo.

22Naboigo Omonene akorerete abanto b’ororeria rw’Esau, baria bamenyete ase ense y’ebitunwa ya Seiri. Agaita Abahori, na Abaesau bakaba bakomenya ase ense eria ribaga riabo, nao bamenyete goika rero iga.

23Abanto abarwete Kafitori, bagaita Abaavi abamenyete ase ebichie goikera Gasa, bakabakoora pi, bakaba bakomenya ase ense eria ribaga riabo.)

24“Naende Omonene agateba: Imoka, mochake orogendo rwaino, mwamboke orooche rw’Arinoni. Naama! Nabekire ase amaboko aino Sihoni Omoamori, omoruoti o Hesiboni, amo nense yaye. Ase igo, mochake komorwania esegi, moire ense yaye.

25Rero ninchake kogosa abanto bonsi bare inse y’erioba, erinde babairoke na koboboa ekero bakoigwa chinkuma chiaino, na batengechigwe nomoondoko.”

26“Erio ngatoma abanto korwa ase erooro ya Kedemoti, bakagenda ase Sihoni, omoruoti o Hesiboni, nkamotomera amang’ana ’omorembe, ngateba:

27Koranche onyanchere ng’etere ase ense yao. Nigo ndaete ase enchera enene yoka; tinkogobera aande, gochia borio gose bomosi.

28Nong’oonerie endagera indie na amache inywe, nainche ninkoe chibesa. Aye ing’a ribaga ng’ete namagoro ase ense yao.

29Buna abanto b’ororeria rw’Esau, abamenyete Seiri, na Abamoabu, abamenyete Ari, bankorerete, naye onkorere boigo, goika imbe nambokire orooche rwa Yorodan, na nasoire ase ense eria Omonene, Nyasae oito, agochia gotoa.

30“Korende Sihoni, omoruoti o Hesiboni, akaanga, tatoa ribaga toete ase ense yaye. Omonene, Nyasae oino, nigo akong’etie enkoro yaye ekaba ey’ogotaigwera, akamobeka ase amaboko aino, na inwe mokamobua na mokaira ense yaye, buna ere bono.

31“Omonene agantebia: Rora, nachakire kobeka Sihoni amo nense yaye ase amaboko aino. Ase ayio, chaka koira ense yaye ebe eyaino.

32Erio Sihoni amo nabanto baye bonsi bagacha gotorwania esegi, ekero twarenge ase omochie o Yahasi,

33korende Omonene, Nyasae oito, akamobeka ase amaboko aito, ere amo nabamura baye, na abanto baye bonsi, na intwe tokababua.

34Ase engaki eria tokabwata emechie yaye yonsi, tokayesaria, togaita abasacha, na abakungu, na abana, titwatigaretie monto ore moyo, nonya noyomo.

35Togoosa chitugo chiabo, na gosakora ebinto biarenge ase emechie eyio bikaba ebiaito.

36Korwa Aroeri, omochie oria ore ase engegu y’orooche rw’Arinoni, goika Gileadi, amo nomochie ore ase rikura, omochie onde torenge ne chindwaki chinkong’u totanyarete gotagora. Omonene, Nyasae oito, nigo abegete emechie yonsi ase amaboko aito.

37Korende titwaigete ang’e ase ense y’Abaamori, gose ase chingegu chi’orooche rwa Yaboki, na emechie y’ense y’ebitunwa, na aande onsi ase Omonene, Nyasae oito, atokanetie titogendao.”

← Chapter 1 Jump to: Chapter 3 →