Deuteronomy 3

Gussi (EBIBILIA ENCHENU) 2020

← Chapter 2 Jump to: Chapter 4 →

1“Nyuma y’ayio tokaonchoka, togatiira gochia sugusu gochia ase orogongo rwa Basani. Ogi, omoruoti o Basani, amo nabanto baye bonsi, bagacha gotorwania esegi agwo ase omochie o Edirei.

2Korende Omonene agantebia: Tobaisa komoiroka, ekiagera ere amo nabanto baye bonsi nababekire ase amaboko ao, boigo nakoeire ense yaye. Nomokore buna gwakorete Sihoni, omoruoti bw’Abaamori, oria orenge kogamba agwo Hesiboni.

3“Ase ayio Omonene, Nyasae oito, akabeka Ogi, omoruoti o Basani, amo nabanto baye bonsi, ase amaboko aito. Togaita bonsi pi, nonya noyomo tatigara ore moyo.

4Tokaira emechie yaye yonsi ase engaki eria. Titwatigete nonya nomochie oyomo totairete. Emechie yonsi twairete nigo yarenge emerongo etano nomo, tokaira orogongo rwonsi rw’Arigobu, ase Ogi, Omoruoti o Basani, arenge kogamba.

5Emechie eyio yonsi nigo yagiteire chindwaki chintambe gochia igoro, na ebiita biarenge gosiekwa nemekorogoto; naboigo ebichie ebinge mbiarengeo bitagiteire chindwaki.

6Togasaria emechie eyio yonsi, togaita abanto bonsi, abasacha na abakungu, na abana, buna twakorete ase emechie ya Sihoni, omoruoti o Hesiboni.

7Tokaira chitugo chionsi na gosakora ebinto biarenge ase emechie eyio bikaba ebiaito.

8“Ase engaki eria tokaira ense y’abaruoti baria babere b’Abaamori, ense yarenge moocha y’orooche rwa Yorodan, gochakera orooche rw’Arinoni goikera egetunwa kia Herimoni.

9(Abanto ba Sidoni nigo bakoroka egetunwa kia Herimoni Sirioni, na Abaamori nigo bagokeroka Seniri.)

10Tokaira emechie yonsi yarenge ase ense eraire eimokererete igoro na Gileadi yonsi, na Basani yonsi, goikera Saleka na Edirei, emechie y’oboruoti bwa Ogi, oyorenge kogamba agwo Basani.”

11(Ogi, omoruoti o Basani, nere bweka otigarete ase Abarefai. Esanduku yaye y’ogotindekerwa eyaroiseirie ebioma, nao ere agwo Raba, omochie bw’Abaamori, goika rero iga. Obotambe bwaye nigo bware obw’amaboko kianda, na obogare bwaye amaboko aane.)

12“Ekero twairete ense eria ekaba eyaito, nkaa abanto b’egesaku kia Reuben, na ekia Gadi, orogongo roria rogochakera ase omochie bw’Aroeri, rore ang’e norooche rw’Arinoni amo nekeng’ese gi’ense y’ebitunwa ya Gileadi, na emechie yarengeo.

13Nkaa ekeng’ese ki’egesaku kia Manase ensemo eyatigarete ase ense ya Gileadi, amo na Basani yonsi, eyio yarenge obogambi bwa Ogi. Orwo narwo orogongo rwonsi rw’Arigobu.” (Basani yonsi nigo yarenge korokwa ense ya Refaimu.

14Yairi, omonto bw’ororeria rwa Manase, akaira orogongo rwonsi rw’Arigobu, narwo Basani, goikera orogongo rw’Abagesuri na Abamaaka. Akaroka emechie yarengeo ase erieta riaye, Emechie ya Yairi, nabo ekorokwa goika rero iga.)

15“Nkaa abanto b’eamate ya Makiri, orogongo rwa Gileadi,

16na abanto b’egesaku kia Reuben na ab’egesaku kia Gadi nkabaa orogongo gochakera Gileadi goikera orooche rw’Arinoni. Egati‐gati y’orooche orwo ekaba orobebe rwabo rw’ensemo ya irianyi, na orooche rwa Yaboki rokaba orobebe rwabo sugusu, orwarenge orobebe rw’Abaamori.

17Bakanyora Ekerubo Ekiomo goikera orooche rwa Yorodan. Orwo rokaba orobebe rwabo rwa bosongo, korwa ase enyancha ya Kinereti, ensemo ya sugusu, goika enyancha y’Ekerubo Ekiomo, nero Enyancha y’Omonyo, ensemo ya irianyi inse y’ebitirimboko bia Pisiga, ensemo ya moocha.

18“Ase engaki eria inche nkabachika, nkabatebia: Omonene, Nyasae oino, obaeire ense eye, ebe eyaino. Ase ayio abarwani baino bonsi, baria bare chituoni, baimokie ebirwanero biabo bi’esegi, bagende bamboke gochia ng’umbu ya Yorodan, batang’anere Abaisraeli bamwabo.

19“Korende abakungu baino na abana, barabwo batigare amo ne chitugo chiaino ase emechie eyio nabaeire. (Nimanyete ng’a nigo mobwate chitugo chinyinge.)

20Mokonye abanto bamino goika banyore ense eria Omonene, Nyasae oino, arabae ng’umbu ya Yorodan na abae obotoereru buna abaete inwe. Erio namoirane, kera omonto ase orogongo rwaye namoeire.

21“Ase ekero keria ngachika Yoshua, nkamotebia: Nkwaroche amang’ana onsi aya Omonene, Nyasae oino, akorerete abaruoti baria babere. Naboigo Omonene arakorere kera oboruoti ase orabe kogosoa.

22Timobaisa kobairoka, ekiagera Omonene Nyasae oino, nere orabarwanere esegi.

23“Ase engaki eria ngasaba Omonene, nkamotebia:

24Aye Omonene Nyasae, bono kwanyorokirie inche, omosomba oo, omochakano bwoka bw’obonene bwao, na okoboko kwao gwe chinguru. Enyasae ende teri, igoro gose ase ense, eranyare gokora emeremo emenene na eya chinguru buna eye ogokora aye.

25Nagosabire, koranche ong’e ribaga nyamboke gochia ng’umbu ya Yorodan, indore ense eria engiya y’ebitunwa amo na Lebanoni.

26“Korende Omonene akaba nendamwamu asende ase engencho y’ogokora kwaino, tanchete koigwa okoboria kwane, agantebia: Ayio aisanire. Tobaisa gokwana nainche gento kende igoro ye ring’ana erio.

27Tiira gochia igoro ase egentunwa gia Pisiga, otenene ase egechuria kiaye, oimokie amaiso ao, origererie gochia ensemo ya bosongo, na sugusu, na irianyi, na moocha, origererie buya ense eria orarore, ekiagera tokonyara kwamboka ng’umbu ya Yorodan.

28Tebereria Yoshua, omoremie na omobeke chinguru, ekiagera nere oraraae abanto aba, abaambokie ng’umbu, naende abaatananere ense eyio orarore.

29“Ase ayio tokabeera ase rikura riarochie omochie o Beti‐Peori.”

← Chapter 2 Jump to: Chapter 4 →