Joshua 20

Gussi (EBIBILIA ENCHENU) 2020

← Chapter 19 Jump to: Chapter 21 →

1Omonene agakwana na Yoshua, akamotebia,

2“Kwana n’Abaisraeli, obatebie ng’a bachore emechie y’obotamero, buna nabatebetie goetera ase Musa.

3Omonto karaite omonto onde mosiabano atancheti, anyare gotamera oyomo bw’emechie eyio ase ogwetooria korwa ase oyomwabo oria oitetwe oganetie korusia egesiomba.

4Omonto oria omoiti, ekero aratamere oyomo bw’emechie eyio goika agende atenene ase egeita ki’omochie oyio, akwane amang’ana aye nabatang’ani b’omochie oria. Barabwo bamosoyie ase omochie bamoe aase akomenya ase egati yabo.

5Onye omonto oria oganetie korusia egesiomba okomobwatia gochiao, abanto b’omochie oyio tibakorua omoiti oria ase amaboko aye, ekiagera aitete omogisangio oye mosiabano, atamogechete.

6Omonto oria namenye ase omochie oria goika gee arentwe bosio bw’omosangererekano agambigwe na goika omokuani bw’engaki eria akwe. Nyuma y’ayio arue ase omochie oria atamerete, airane nka ase omochie oye.”

7Ase igo bagaatanana Kedesi o Galili, ase ense y’ebitunwa ya Nafutali, na Sekemu ase ense y’ebitunwa y’Efraimu, na Kiriati‐Ariba (nao Heburoni), ase ense y’ebitunwa ya Yuda.

8Moocha ya Yorodan ase erooro, ase ense eimokererete igoro ere enteremu, bagachora Beseri ase orogongo rwa Reuben, na Ramoti o Gileadi, ase orogongo rw’egesaku kia Gadi, na Golani o Basani ase orogongo rw’egesaku kia Manase.

9Emechie eyio nero yachoretwe ebe obotamero ase Abaisraeli, na ase abamenyi abaare ase egati yabo. Onde bwensi orenge goita omonto mosiabano atame gochia aroro, erinde taitwa noria oganetie korusia egesiomba, ataratenena ase omosangererekano amang’ana aye agambwe.

← Chapter 19 Jump to: Chapter 21 →