Joshua 22

Gussi (EBIBILIA ENCHENU) 2020

← Chapter 21 Jump to: Chapter 23 →

1Erio Yoshua akarangeria abanto b’egesaku kia Reuben, na ekia Gadi, amo nekeng’ese ki’egesaku kia Manase,

2akabatebia, “Mwakorire amang’ana onsi Musa, omosomba bw’Omonene, abachigete mokore, na mwaigwereire amang’ana onsi aya nabachigete.

3Ase amatuko aya amange timwatigete Abaisraeli bamino goika rero iga. Mwarendire mono na koigwera aya Omonene, Nyasae oino abachigete mokore.

4Bono Omonene, Nyasae oino, oeire abamino obotoereru, buna abarierete eira. Ase igo, bono irana ase chinka chiaino, ase ense eria mwanyorire ebe omwando oino, eria Musa, omosomba bw’Omonene, abaete ng’umbu ya Yorodan.

5Morende mono na koigwera amachiko aya Musa, omosomba bw’Omonene, abaete; mwanche Omonene, Nyasae oino, na motaare ase chinchera chiaye chionsi. Moigwere amachiko aye, mobe abegenwa asare, na momokorere ne chinkoro chiaino chionsi, na emioyo yaino yonsi.”

6Erio Yoshua akabasesenia, akabaa ribaga, na barabwo bakagenda chinka chiabo.

7(Musa konya oeire ekeng’ese ki’egesaku kia Manase orogongo agwo Basani, na ekeng’ese kende Yoshua agakea orogongo ang’e nabamwabo, bosongo ya Yorodan.) Na ekero Yoshua abaete ribaga bagende chinka chiabo akabasesenia,

8akabatebia “Irana chinka chiaino amo nobotenenku obo obonge mwanyorire, chitugo chinyinge amo ne chifeta ne chitahabu ne chitaai, na ebioma, amo ne chianga chinyinge. Ase ayio mwatananere abamino ebisakorwa ebio mwasakorete ababisa baino.”

9Erio abanto b’egesaku kia Reuben na ekia Gadi, amo nekeng’ese kiegesaku kia Manase bagatiga Abaisraeli bande agwo Silo ase ense ya Kanani, bakairana ase ense ya Gileadi, ense eria banyorete ase okomenya, buna Omonene konya achikire goetera ase Musa.

10Ekero abanto abwo b’egesaku kia Reuben na ekia Dani amo nekeng’ese gi’ekia Manase baigete Yorodan mbarabare ase ensemo ya Kanani bakaagacha aroro egesasimero ekenene kiare kororekana korwa are.

11Abaisraeli bande bakaigwa amang’ana aya agokwanwa, “Naama! Abanto b’egesaku kia Reuben, na ekia Gadi, amo nekeng’ese ki’egesaku kia Manase baagachire egesasimero aria Geliloti, ensemo ya bosio bw’ense ya Kanani, ang’e na Yorodan, erochie ensemo y’Abaisraeli.”

12Ekero Abaisraeli baigwete amang’ana ayio, omoganda obo bwonsi ogasangererekana agwo Silo, erinde ogende kobarwania esegi.

13Erio Abaisraeli bagatoma Finehasi, mosinto bw’Eleazari, omokuani, gochia ase abanto b’egesaku kia Reuben na ekia Dani amo nekeng’ese ki’egesaku kia Manase, ase ense ya Gileadi.

14Amo na Finehasi bagatoma abatang’ani ikomi, oyomo bwa kera egesaku ki’Abaisraeli; kera oyomo nigo arenge omoteneneri bw’eamate ase egesaku kiaye.

15Ekero barabwo baigete ase ense ya Gileadi, ase abanto b’egesaku kia Reuben, na ekia Gadi, na ekeng’ese ki’egesaku kia Manase, bagakwana nabarabwo, bakabatebia,

16“Intwe nigo togokwana ribaga ri’omosangererekano bwonsi bw’Omonene. Nase ki motari nobwegenwa ase Nyasae bw’Abaisraeli? Mwatigire Omonene rero ase okweagachera egesasimero, mwabeire mamincha y’Omonene.

17Inee! Ebibe biria twakorete ase ogosasima Peori tibiatoisanete? Korwa ase ebibe biria titwana gochenwa nonya ngoika rero iga, na egesusuro gekanyora omoganda bwonsi bw’Omonene.

18Inee! Na bono inwe motagete gotiga Omonene? Onye mokwanga rero koigwera Omonene, ekeene, ankio nigo arabe nekeririanda ase omoganda bwonsi bw’Abaisraeli.

19Onye moroche ng’a ense eye mwaeirwe ebe eyaino tegwenereti mogosasimerao, imoka mwamboke gochia ase ense y’Omonene, ase obomenyo bwaye boteneine, moegwe chingongo chiaino agwo ase egati yaito. Timobaisa kwanga koigwera Omonene, gose kwanga gotoigwera intwe ase okweagachera egesasimero kiaino ekeao goetania eki’Omonene, Nyasae oito.

20Inyora buna Akani, mosinto o Zera, amochete ase ebinto biria biatananetwe ase ogosirigwa; omoganda bwonsi bw’Abaisraeli nigo onyorete egesusuro ase engencho eyio, tari omonto oria bweka osirete ase ogosaria koria.”

21Erio abanto b’egesaku kia Reuben, na ekia Gadi, amo nekeng’ese ki’egesaku kia Manase bakairaneria abateneneri be chiamate chi’Abaisraeli, bakabatebia,

22“Omonguru nere Nyasae! Nere Omonene! Omonguru nere Nyasae! Nere Omonene. Ere namanyete aya twakorire, nainwe Abaisraeli boigo moyamanye. Onye aya twakorire akorirwe mamincha y’Omonene, gose onye titwarenge nobwegenwa asare, rirorio timogototooria rero.

23Onye tweagacheire egesasimero giaito intwe abanyene ase ogotiga Omonene, na onye tokoruerao ekeng’wanso ki’ogosambwa gose okoruegwa kw’endagera, gose ogw’ekeng’wanso ki’omorembe, tiga Omonene omonyene atoe egesusuro.

24Taibo! Nigo twakorire aya, ekiagera twoboire ng’a gose ase engaki erache abana b’ororeria rwaino baise gocha koboria ab’orwaito: Inee! Nainwe more negetari ase Omonene, Nyasae bw’Abaisraeli?

25Naki Omonene nigo akorete orooche rwa Yorodan rokaba orobebe egati yaito nainwe, inwe Abareuben na Abagadi. Ase ayio timori negetari kende gionsi ase Omonene. Na igo abana b’ororeria rwaino mbabaise kogera ab’orwaito tibamoiroka Omonene.

26Ase ayio nigo twatebete: Tiga toagache egesasimero, tari ase okoruera ekeng’wanso ki’ogosambwa gose ekeng’wanso kende gionsi,

27otatiga ase okoba kirori egati yaito nainwe, na egati y’ororeria rwaito na orwaino, ng’a nigo tokomokorera Omonene ase okoruera ekeng’wanso ki’ogosambwa, na ekeng’wanso kende amo neki’omorembe ase obosio bwaye. Aya nigo twakorire ase ogotanga abana b’ororeria rwaino tibabaisa gocha gotebia ab’orwaito ng’a: Timori negetari ase Omonene.

28Intwe nigo twarengerererie ng’a: Kerabe babe bagokwana igo asetore, gose ase abana b’ororeria rwaito, nabanyare kobairaneria: Rora, chisokoro chiaito nigo chiagachete egesasimero keng’ana buna eki’Omonene. Eke tikeri ase okoruera ekeng’wanso ki’ogosambwa, gose ekeng’wanso kende, otatiga kere kirori egati yaito nainwe.

29Taibo! Ayio abe aare naintwe ng’a ntorigetie kwanga koigwera Omonene, gose komotiga bono, ase okoagacha egesasimero ki’ogosambera ekeng’wanso, gose korua okoruegwa kw’endagera, gose ekeng’wanso ki’omorembe, egesasimero kere ao na keria kere bosio bw’Obomenyo bwaye.”

30Ekero Finehasi, omokuani, na abatang’ani b’omoganda abwo baare abateneneri be chiamate chi’Abaisraeli, abaare amo nere, baigwete aya abanto b’egesaku kia Reuben, na ab’ekia Gadi, amo nab’ekia Manase bakwanete, barabwo bagaisaneka.

31Finehasi, mosinto bw’Eleazari, omokuani, agatebia Abareuben na Abagadi amo n’Abamanase, “Bono twamanyire ng’a Omonene nigo are ase egati yaito, ekiagera timwangete koba abegenwa ase Omonene. Igo mwatooririe Abaisraeli korwa ase egesusuro ki’Omonene.”

32Nyuma y’ayio Finehasi, mosinto bw’Eleazari, omokuani, na abatang’ani baria, bagatiga Abareuben na Abagadi agwo Gileadi, bakairana gochia ase ense ya Kanani, ase Abaisraeli, bakabairera amang’ana onsi.

33Amang’ana aya akagwenera Abaisraeli, nabarabwo bagatogia Nyasae, na tibaba bakoroberia korwania Abareuben na Abagadi, gose gosaria ense eria bamenyete.

34Abareuben na Abagadi bagateba, “Egesasimero eke nkirori egati yaito nainwe ng’a, Omonene nere Nyasae”, na igo bagakeroka “Kirori”.

← Chapter 21 Jump to: Chapter 23 →