Luke 21

Gussi (EBIBILIA ENCHENU) 2020

← Chapter 20 Jump to: Chapter 22 →

1Yeso akaimokia amaiso aye, akarora abanto abanda bakobeka ebiegwa biabo ase ekebekerero gi’esadaka.

2Akarora omoboraka oyomo omotaka, okobeka ebisabwa bibere bie chitaai.

3Erio akabora, “Ekeene nabatebirie, Omoboraka oyo omotaka obekire ebinge kobua bonsi,

4ekiagera aba bonsi babekire korwa ase obonge bwe chinibo chiabo, korende oyo ase obotaka bwaye obekire ebinto bionsi ebiarenge nabio.”

5Ekero abanto bande barenge gokwana amang’ana igoro ye Hekalu, buna echabeire namagena amaya na ebiegwa, agateba.

6“Aya moroche; amatuko nache ritatigare rigena erimo igoro ase erinde eritatagorwe.”

7Erio bakamoboria, “Omworokia, aya indi arabe rende? Naende ninki ekemanyererio kiaye ekero aya onsi arabe ang’e goikerana?”

8Akabora, “Mwerende, timong’ainwa, ekiagera abange nabache ase erieta riane babore: Ninche ere! Nengaki yaikire! Nabo, timobabwatia abwo.

9Na inwe ekero moraigwe amang’ana ’esegi na eburu‐buru, timogoswa, ekiagera aya bori nache kooroka ritang’ani, korende omoerio toraba ang’e.”

10Erio akabatebia, “Egesaku nakeimoke korwana negesaku kende, na oboruoti naborwane noboruoti bonde;

11emetengecho emenene y’ense nebe chinsemo ne chinsemo, na enchara, na emechando emenene; nabe namang’ana ’ogoichania, na ebimanyererio ebinene bikorwa igoro.

12Korende ritang’ani ase aya onsi nabababwate na kobachanda, nababaire ase chisinagogi, na ase chichela, namoirwe ase abaruoti na ase abagavuna ase engencho y’erieta riane.

13Eke nekero kiaino koba kirori.

14Manya gaki ase emioyo yaino, ng’a timorengereria ritang’ani eki morairanerie,

15ekiagera inche nimbae chinkwana na obong’aini, abachandi baino batanyare gokana gose koamererania nabio.

16Na inwe namoruegwe nabaibori baino, na bamura bamino, na eamate yaino, na abasani baino, na barabwo nababeke abande baino ase ogoitwa.

17Inamogechwe nabanto bonsi ase engencho y’erieta riane.

18Korende nonya nagatukia akamo k’emetwe yaino tikagosira.

19Na ase okoremereria kwaino namonyore obogima bwaino.

20“Korende, komorarore Yerusalemu oetananirwe nemeganda y’abarwani b’esegi, erio momanye ng’a ogosareka kwaye gwaikire ang’e.

21Erio abare Boyahudi tiga batame gochia ase ebitunwa, na abare ime ase omochie basoke isiko, na abare isiko tibasoa aroro,

22ekiagera aya namatuko ’egesiomba, onsi ayarigetwe anyare goikerana.

23Nabe aakong’u ase abare barito na abakogonkia ase amatuko aria, ekiagera nebe emechando emenene igoro ase ense, na endamwamu ase egesaku eke.

24Barabwo nabagwe ase chinsonga chi’emioro, nabooswe bairwe ase ebisaku bionsi, na Yerusalemu notachwe nabanto b’Ebisaku, goika ebiro biabo biikeranigwe.

25“Naende nabibe ebimanyererio ase erioba, na omotienyi, ne ching’enang’eni, na ase ense emechando ase ebisaku, nabatang’ang’e ase okoeera kw’enyancha na emerindo yaye.

26Abanto mbakwe ekeondogo na okoiroka kobaganyete ayagochera ense, ekiagera chinguru chia igoro nachitengechigwe.

27Erio nabanyare korora Omwana‐o‐mwanyabanto ogocha‐ase riire ase chinguru na obonene obonge.

28Nabo karachake koba ayio, rigereria igoro, ekiagera okoboorigwa kwaino gwaikire ang’e.”

29Akabatebia omoreng’anio, “Rigereria omoko na emete ende yonsi;

30ekero egochaka goseboka mwarora na komanya ase emioyo yaino ng’a embura yaisire gotwa.

31Nainwe boigo komorarore ayio agokoreka, momanye ng’a oboruoti bwa Nyasae ng’ang’e bore.

32Ekeene nabatebirie: Ekegori eke tikegoeta nonya ng’ake goika aya onsi aikeranire.

33Igoro na ense nabiete, korende amang’ana aane takonyara goeta nonya ng’ake.

34“Nabo mwerende chinkoro chiaino tichicha koengerwa nokoria bobe na ogotinda, na okwerosia kw’obogima obo, rituko riria ribachere mobosokano, buna omoeto okobwata.

35Naki naboigo eranyare gochera abanto bonsi abamenyete igoro ase ense yonsi.

36Ase ayio, renda kera ekero na gosaba, monyore chinguru chi’ogoeta ase aya onsi arache koba, naende gotenena ase obosio bw’Omwana‐o‐mwanyabanto.”

37Na kera rituko nigo arenge kworokereria Hekalu ime, korende botuko ogenda isiko obeera ase egetunwa ki’Emezeituni.

38Abanto bonsi bakamochiera mambia chuni aria Hekalu ime, erinde banyare komoigwa.

← Chapter 20 Jump to: Chapter 22 →

Recommended Reading

Commentary Luke Commentaries → Devotional Luke Devotional Guide → Get This Bible Gussi (EBIBILIA ENCHENU) Study Bible →