Luke 3

Gussi (EBIBILIA ENCHENU) 2020

← Chapter 2 Jump to: Chapter 4 →

1Ase omwaka o ikomi na gatano bw’okogamba gwa Kaisari Tiberio, Pontio Pilato orenge gavuna o Boyahudi, na Herode omoruoti o Galili, na Filipo momura omwabo omoruoti o Iturea na ense ya Tarakoniti, na Lusania omoruoti o Abileni,

2ekero ki’obokuani obonene bw’Anasi na Kayafa, ring’ana ria Nyasae rigaikera Yohana, omwana o Zakaria, ase erooro.

3Akagenda chinse chionsi chi’ensemo ya Yorodan, okorandia ebatiso y’okoonchoka ekorenta okwaberwa kw’ebibe.

4Buna erikire ase ebuku y’amang’ana ’omobani Isaya, “Eriogi ri’oyogoaka egeturi ase erooro, Roisia enchera y’Omonene, rongeyia oboeto bwaye.

5Kera rigooko nariichorigwe, na kera ekegoro na egetunwa nabikeeigwe; aare bogeka inarongeigwe, na enchera ere ebitunwa‐tunwa nereng’anigwe;

6na abanto bonsi nabarore ogotooreka gokorwa ase Nyasae.”

7Nabo agatebia emeganda eyachete, erinde ebatiswe nere, “Inwe oroiboro rwe ching’iti, ning’o obakureire ng’a motame korwa ase endamwamu egochi‐gocha?

8Gaki, ama okwama kogwenerete okoonchoka, gose timochaka kobora emioyo yaino ime: Ntore na sokoro yaito, nere Ibrahimu. Naki nabatebirie ng’a Nyasae nare nokobua ase amagena aya gokorera Ibrahimu abana.

9Nonya mbono egesire kiabekirwe ase emeri y’emete; nabo kera omote otameti okwama okuya nonachwe, otugutwe ase omorero.”

10Emeganda eria ekamoboria, “Ninki rende torakore?”

11Akabairaneria, “Oyore ne chianga ibere ae ere oyotari nero; na oyore nendagera akore boigo.”

12Abarusia ebango bagacha erinde babatiswe, bakamoboria, “Omworokia, inki rende naintwe torakore?”

13Akabairaneria, “Timorusia kobua ebi mwachigetwe.”

14Abarwani nabarabwo bakamoboria, “Naintwe inki torakore?” Akabairaneria, “Timourereria monto onde ase chinguru gose ase obosoeri bw’oborimo; naende moisaneke neng’eria yaino.”

15Ekero abanto baganyete na konakorengereria, bonsi bakeboria igoro ya Yohana ng’a, gose nere Kristo.

16Yohana akairaneria abwo bonsi, “Inche nigo nkobabatisa ase amache, korende oyore ne chinguru kombua ngocha are, tinyisaini gosibora chinuga chi’ebikoroto biaye; oyio nere orababatise ase Omoika Omochenu na ase omorero.

17Oroteru rwaye nigo rore koboko kwaye, ere naabuse ekeooreri kiaye, nasangererie engano ase ekiage kiaye, korende omoiriro nayosambe ase omorero otakorimeka.”

18Nabo ase ogokurera okonge Yohana akaranderia abanto amang’ana amaya.

19Korende Herode omoruoti, oyo okanetigwe nere ase engencho ya Herodia, moka momura omwabo, na ase engencho y’amabe onsi Herode akorire,

20akamenta neri igoro ase onsi, agasiba Yohana echela.

21Egachia koba abanto bonsi kobabatisirwe, na Yeso boigo kabatisirwe, na ekero agosaba, igoro akamaanoka.

22Omoika Omochenu ogaika igoro asare ase omogwekano bwe riruma, eriogi rikarwa igoro, rigoteba, “Aye naye Omwana one omwanchwa, ngokirie naye.”

23Yeso nere ekero achagete kworokereria, emiaka yaye iga yarenge ang’e emerongo etato, agakagwa ng’a mosinto o Yusufu, o Eli,

24o Mathati, o Lawi, o Meliki, o Yana, o Yusufu,

25o Matathia, o Amos, o Nahum, o Esili, o Nagai,

26o Maathi, o Matathia, o Semei, o Yoseki, o Yuda,

27o Yohana, o Resa, o Serubabeli, o Salatieli, o Neri,

28o Meliki, o Adi, o Kosamu, o Elimadamu, o Eri,

29o Yoshua, o Eliezeri, o Yorimu, o Mathati, o Lawi,

30o Simeoni, o Yuda, o Yusufu, o Yonam, o Eliakimu,

31o Melea, o Mainani, o Mattatha, o Nathani, o Daudi,

32o Yese, o Obedi, o Boazi, o Salimoni, o Nashoni,

33o Aminadabu, o Admin, o Aramu, o Hezironi, o Peresu, o Yuda,

34o Yakobo, o Isaka, o Ibrahimu, o Tera, o Nahori,

35o Serugi, o Ragau, o Pelegi, o Eberi, o Sala,

36o Kainani, o Arifaksadi, o Shemu, o Nuhu, o Lameki,

37o Metusela, o Enoku, o Yaredi, o Malaleeli, o Kainani,

38o Enosu, o Seti, o Adamu, o Nyasae.

← Chapter 2 Jump to: Chapter 4 →