Psalms 119 — Gussi (EBIBILIA ENCHENU) 2020

1Mbasesenirie abwo chinchera chiabo chire chindonge, abwo bagendererete kobwatia amachiko ’Omonene.

2Mbasesenire abwo barendete oborori bwaye, abwo bakorigia Omonene ne chinkoro chiabo chionsi,

3abwo batari gokora amabe, korende nigo bakobwatia chinchera chiaye.

4Aye gwatoeire amachiko ao, toyarende nomokia.

5Nigo nganetie ng’a chinchera chiane chibe chindonge, erinde ndende emeroberio yao echikire.

6Rirorio tingosookigwa ekero ndabe ndigereretie amachiko ao onsi.

7Ekero ndabe neorokereirie okogamba kwao kw’oboronge, rirorio nimbe nkona‐kogotogia nenkoro endonge.

8Ninyigwere amachiko ao; tobaisa gontiga.

9Naki omonto omosae arakore arende orogendo rwaye robe orochenu? Nase okoigwera ring’ana riao.

10Inche nigo ngokorigia nenkoro yane yonsi; ondende timbaisa gotiga amachiko ao.

11Nagachire ring’ana riao ase enkoro yane ime, ng’a tinkora ebibe asore.

12Aye Omonene otogigwe. Inyorokererie emeroberio yao echikire.

13Nimbe nkona‐koraria aya onsi gwanchikire nomonwa oo.

14Nigo inde nomogoko omonene ase okorenda oborori bwao; kobua koba nobotenenku obonene.

15Nimbe nkorengereria mono igoro y’amachiko ao, naende imbe nkorigereria chinchera chiao chionsi.

16Ningokere emeroberio yao echikire; tinkweba ring’ana riao.

17Inkorera amaya, inche omosomba oo, erio nario ndabe moyo, mbwate ring’ana riao.

18Indamokie amaiso, inyare korora amang’ana ’ogokumia ay’amachiko ao.

19Inche nigo inde omoeti ase ense, tobaisa kombisa amachiko ao.

20Enkoro yane yasionoirwe namaiga, chingaki chionsi nigo eganetie komanya ebina biao.

21Aye nigo ogotogonyera abanto abaenenu, abwo baragereirie, abwo batigire kobwata amachiko ao.

22Onduserie ogochecherigwa na ogochaywa kwabo, ekiagera inche nigo ndendete oborori bwao.

23Abagambi nabaikaransa amo koroberia bankore bobe, korende inche, omosomba oo, nigo nkona‐koiranerera emeroberio yao echikire.

24Nigo ngokerete oborori bwao, ekiagera nabwo bogonsemia.

25Omoyo one otiringeirwe ase riroba, ing’a obogima oboyia koreng’ana ne ring’ana riao.

26Ekero naorogetie onsi aya konya nakorire, nigo kwanyigwete; inyorokererie emeroberio yao echikire!

27Inyorokererie, erinde imanye chinchera chi’amachiko ao, nimbe nkona koiranerera ogokora kwao kw’ogokumia.

28Omoyo one obuirwe nemechando, imbeke chinguru koreng’ana ne ring’ana riao.

29Tiga chinchera chi’obong’ainereria chibe aare asende, ase obuya bwao inyorokererie amachiko ao.

30Inche nachorire enchera y’ekeene, nabekire ase obosio bwane aya gwanchikire.

31Aye Omonene, nabwatereire oborori bwao, tobaisa gontiga nsookigwe.

32Ekero oramanyie enkoro yane obuya bwao, niminyoke inyigwere amachiko ao.

33Aye Omonene, inyorokererie enchera y’emeroberio yao echikire; na inche ninyerende goika omoerio.

34Imanyie amachiko ao, erinde inyabwate na koyarenda nenkoro yane yonsi.

35Indaae imbwatie enchera y’amachiko ao, ekiagera inche nigo ingokirie naro.

36Oonchore enkoro yane yanche oborori bwao, na toyetiga ebe nokogania kwe ribero.

37Oonchore amaiso aane tarigereria amang’ana atagwenereti; ing’a obogima oboyia mbwatie chinchera chiao.

38Ikerania asende, inche omosomba oo, eira kwandierete, eira eyio okoa abakoirogete.

39Induserie amang’ana ’ogochaywa inyirogete, ekiagera aya gwachikire nigo are amaya.

40Rora, inche nigo nganetie koigwera amachiko ao; ing’a obogima oboyia goetera ase oboronge bwao.

41Aye Omonene, oorokia asende obwanchani bwao bogendererete botambe, naende ontoorie buna kwandierete eira.

42Erio inyore ring’ana ndairanerie abwo bagonchecheria, ekiagera nigo inyegenete ring’ana riao.

43Tobaisa korusia nonya ng’ake ring’ana ri’ekeene korwa ase omonwa one, ekiagera nigo nsemeretie aya gwachikire.

44Nimbe nkoigwera amachiko ao botambe goika kare na kare.

45Nimbe ngotaara ase obosibore, ekiagera neorokereirie amachiko ao.

46Nindarie oborori bwao ase amasio ’abaruoti ntari nobosooku.

47Inche nigo inde nomogoko ase amachiko ao, ekiagera ayio ninyanchete.

48Nindambore amaboko aane mbwate amachiko ao nyanchete, na nimbe nkorengereria igoro y’emeroberio yao echikire.

49Inyora ring’ana riao gwakwanete asende inche omosomba oo, ekiagera ase rirorio kwang’eire ogosemeria.

50Egekondemia ase emechando yane neke: Ring’ana riao nigo rigonkora naba omoyia.

51Abanto abamwenu nigo bagonchecheria mono, nonya naboigo tindi gotiga amachiko ao.

52Aye Omonene, ekero nkoinyora okogamba kwao korwa kare, nigo nkoba nokoremigwa.

53Nigo inde nokogechigwa okonene ase engencho y’abakori amabe, ekiagera bagosaria amachiko ao.

54Ekero imenyete ase enyomba yane y’obogeni, nabeire nkona‐gotererera emeroberio yao echikire.

55Aye Omonene, nigo nkoinyora erieta riao botuko, nigo ndendete amachiko ao.

56Oko nakwo ogosesenigwa kwane, ng’a nabeire indendete amachiko ao.

57Omonene, aye negetare kiane; narire eira koigwera amang’ana ao.

58Nigo nkogosorora nenkoro yane yonsi: Ondorere amabera koreng’ana ne ring’ana riao.

59Nigo narengereretie igoro ye chinchera chiane, nkaonchora amagoro aane nkabwatia oborori bwao.

60Nigo nkoayerera, tingotebana koigwera amachiko ao.

61Chingori chi’abakori amabe chiang’etananire, korende tinkweba amachiko ao.

62Nigo nkoboka botuko gati kogoakera ng’a mbuya mono, ekiagera okogamba kwao nokoronge.

63Inche nigo inde omogisangio bw’abwo bonsi bakoirogete, abwo barendete amachiko ao.

64Aye Omonene, obwanchani bwao bogendererete botambe nigo boichire ase ense, nyorokererie imanye emeroberio yao echikire.

65Aye Omonene, koreng’ana ne ring’ana riao gwankoreire inche omosomba oo obuya obonge.

66Inyorokererie imanye kogamba buya na imbe ne chisemi, ekiagera nigo inyegenete amachiko ao.

67Ekero konya ntaraegwa egesusuro, nigo narenge omosiru, korende bono nigo indendete ring’ana riao.

68Aye nigo ore omuya, naende nigo ogokora amaya, ase ayio inyorokererie emeroberio yao echikire.

69Abanto abamwenu nigo bakongamba na gokwana oborimo igoro yane, korende inche nigo ndendete amachiko ao nenkoro yane yonsi.

70Chinkoro chiabo nigo chinorete buna ebitinya, korende inche nigo inde nomogoko ase amachiko ao.

71Nigo yabete buya mono asende konyora egesusuro keria, ekiagera ayio naro agerete neorokereirie emeroberio yao echikire.

72Amachiko ao gwakwanete nigo are amaya asende, kobua chitahabu ne chifeta chilifu chinyinge.

73Amaboko ao naro ambombete akandoisia, ing’a obong’aini, erinde inyare kweorokereria amachiko ao.

74Abanto abwo bakoirogete mbandore bagoke, ekiagera nsemeretie ring’ana riao.

75Aye Omonene, nimanyete ng’a ebina biao nebia boronge, naende ng’a nigo kwang’a egesusuro gi’okondongeyia kore nobwegenwa.

76Tiga obwanchani bwao bogendererete botambe bondemie, koreng’ana buna kwarire eira asende, inche omosomba oo.

77Ondorere amabera, erinde imbe moyo; inche nigo ngokerete amachiko ao.

78Tiga abanto abamwenu barore obosooku, ekiagera bankoreire bobe engencho ende etaiyo, korende inche nigo nkona koiranerera amachiko ao.

79Tiga abanto abwo bakoirogete bache asende. Abwo bamanyete oborori bwao.

80Tiga enkoro yane ebe etari na komocha ase emeroberio yao echikire, erinde timbaisa konyora obosooku.

81Omoyo one ogoyire ase okogania ogotooreka kwao, nigo nsemeretie ring’ana riao.

82Amaiso aane arosire ase okoganya ring’ana riao, nigo nkoboria, “Indi aye orache kondemia?”

83Inche nabeire buna ekerandi ki’edivai gekorire korwa ase risankwa kere ase erioki, nonya naboigo, tindeba emeroberio yao echikire.

84Ngoika ririri inche omosomba oo ndagenderere koremereria? Ndiriri oranache ekina ase abanto abwo bagonchanda?

85Abanto abamwenu batabwateti amachiko ao nigo bankunyeire chiirima.

86Amachiko ao onsi nigo are ay’ekeene, korende abanto nigo bagonchanda engencho ende etaiyo. Koranche onkonye!

87Barabwo babeire ang’e gonsiria aiga ase ense, nonya naboigo, tintigeti amachiko ao.

88Ing’a obogima oboyia ase engencho y’obwanchani bwao bwa botambe, erinde imbwatie oborori bwao gwakwanete.

89Aye Omonene, ring’ana riao nigo riteneine bokong’u aaria igoro goika kare na kare.

90Obwegenwa bwao nigo bogendererete ase ebiaare bionsi; aye gwakoreire ense aase aye, ero nigo eteneine bokong’u.

91Ebinto bionsi nigo bigendererete kobao goika rero buna aye kwabichigete, ekiagera bionsi nigo bikogokorera.

92Onye ogochika kwao gotarenge omogoko one nanga nigo nasirete ase emechando yane.

93Inche tinkonyara kweba amachiko ao, ekiagera aye kwang’eire obogima oboyia goetera ase aro.

94Inche noyoo, ntoorie! Nigo nabeire nkona‐koinyora amachiko ao.

95Abakori amabe nigo bakomboera ng’a bansirie, korende nigo inyigwerete oborori bwao.

96Narorire ng’a gento kende tikeri kere noboikeranu, korende amachiko ao namaikeranu.

97Aa! Naki inyanchete amachiko ao! Naro nkona‐koiranerera omobaso boira.

98Amachiko ao nigo agonkora naba omong’aini kobua ababisa baane, ekiagera ayio nigo are asende chingaki chionsi.

99Inche nigo inde nokomanya okonge kobua aborokia baane, ekiagera nigo nkona‐korengereria mono igoro y’oborori bwao.

100Nigo imanyete amange kobua abanto abagotu, ekiagera mbwatete amachiko ao.

101Nigo ntangete amagoro aane tabaisa kobwatia enchera ende yonsi y’obobe, erinde inyare korenda ring’ana riao.

102Tindi gotiga aya gwachikire, ekiagera naye kwanyorokereirie.

103Amang’ana ao naki are amansu asende! Ee, nigo are amansu ase omonwa one kobua obooke.

104Amachiko ao ang’eire obong’aini, ase ayio nigo ngechete kera enchera y’obong’ainereria.

105Ring’ana riao netaya ase amagoro aane na omobaso ase enchera ngoeta.

106Natianire ng’a ning’ikeranie eira eyio yane; nimbwatie aya onsi gwachikire ase oboronge.

107Aye Omonene, nigo nchandegete mono, ing’a obogima oboyia koreng’ana ne ring’ana riao.

108Omonene, anchera ogosaba kwane kw’ogoaka ng’a mbuya mono, na inyorokererie aya gwachikire.

109Ase chingaki chionsi tinaborarete obogima bwane, na tinyebeti amachiko ao.

110Abakori amabe babekire omoeto ase ngoeta, korende tintantaniri korwa ase amachiko ao.

111Oborori bwao nabwo omwando one goika kare na kare, ee, nabwo enkoro yane egokerete mono.

112Narure enkoro yane korenda amachiko ao, botambe goika omoerio.

113Nigo ngechete abanyamenwa ebere, korende nigo inyanchete amachiko ao.

114Aye naye ore egekengero kiane, na enguba yane, nigo nsemeretie ring’ana riao.

115Inwe abakori amabe, karue asende, erinde inyare korenda amachiko a Nyasae one.

116Ing’a chinguru buna kwarire eira, erinde imbe moyo, tobaisa gontiga indore obosooku ase ogosemeria kwane.

117Nsiire bokong’u, indende buya, inyare gosika botambe emeroberio yao echikire.

118Aye nigo okwanga abwo bagotantana korwa ase emeroberio yao echikire; ee, obong’ainereria bwabo nigo bore bosa.

119Aye nigo obarete abakori amabe bonsi b’ense koba bosa buna amabiria; ase ayio inche nigo inyanchete oborori bwao.

120Omobere one nigo okoiguswa ore nobwoba asore, naende nairokire ebina biao.

121Inche nakorire amang’ana are ay’ekeene na ay’oboronge; tontiga ase abachandi baane.

122Ontenenere inche omosomba oo inyore amaya; totiga abanto abamwenu bankore bobe.

123Amaiso aane arosire ase okoganya ogotooreka gokorwa asore, amo nogoikeranigwa kw’eira yao y’oboronge.

124Nkorere amaya inche omosomba oo koreng’ana nobwanchani bwao bogendererete botambe, naende onyorokererie imanye emeroberio yao echikire.

125Inche nigo inde omosomba oo, ing’a okomanya, erinde imanye oborori bwao.

126Engaki yaikire aye Omonene ogwenerete gokora ogokora kwao, ekiagera basaririe amachiko ao.

127Ase ayio inche nigo nyanchete amachiko ao kobua etahabu, ee, kobua etahabu echenire.

128Na ase ayio nigo ndoche ng’a amachiko ao onsi namaronge. Nigo ngechete kera enchera y’obong’ainereria.

129Oborori bwao nigo bore obw’ogokumia, ase ayio nigo mbobwatete nomoyo one bwonsi.

130Ekero amang’ana ao amaanoirwe nigo akorua omobaso na koa oyotamanyeti amange obong’aini.

131Nigo ngwasamia omonwa one na gwesesa, ekiagera nigo inde namaiga imanye amachiko ao.

132Ndigererie, ondorere amabera buna egwenerete abwo banchete erieta riao.

133Kong’ia orogendo rwane koreng’ana ne ring’ana riao, totiga obobe bongambere.

134Mboorie korwa ase ogokorerwa bobe nabanto, erio nario ndanyare korenda amachiko ao.

135Mbarerie inche omosomba oo obosio bwao, na onyorokererie emeroberio yao echikire.

136Nigo nkorera, naitekia amariga amange mono, ekiagera abanto tibarendeti amachiko ao.

137Aye Omonene nigo ore omonyene oboronge, na ebina biao nigo bire ebia boronge.

138Gwachikire oborori bwao ase oboronge, na ase obwegenwa bwonsi.

139Risemi riane riandire, ekiagera ababisa baane bebire ring’ana riao.

140Ring’ana riao riateemirwe, nigo riteneine bokong’u, na inche omosomba oo nigo ndianchete.

141Nigo inde oyo otasikiri, naende inchayire, korende nonya naboigo tinkweba amachiko ao.

142Oboronge bwao nigo bore obwa kare na kare, na amachiko ao nigo are ay’ekeene.

143Emechando na omoichano bianyorire, korende nigo ngokerete amachiko ao.

144Oborori bwao nigo bore oboronge goika kare na kare; on g’e okomanya, erinde imbe moyo.

145Aye Omonene, nigo ngokorangeria nenkoro yane yonsi, inyigwe, na inche nimbwate emeroberio yao echikire.

146Nigo nkorera asore, ontoorie, erinde mbwate oborori bwao.

147Nigo nkoboka mambia chuni gokorangeria ng’a onkonye, ninsemeretie amang’ana ao.

148Nigo nkogeesa botuko bokia, mbe nkona‐koiranerera ring’ana riao.

149Omonene, igwa eriogi riane ase engencho y’obwanchani bwao botari koera; ong’e obogima oboyia koreng’ana nokogamba kwao.

150Abwo bakominyokera amabe bambereire ang’e; abwo nigo bare aare korwa ase amachiko ao.

151Korende aye Omonene nigo ore ang’e, na amachiko ao onsi nigo are ay’ekeene.

152Korwa kare nimanyete korwa ase oborori bwao ng’a naye kwabobegete bobeo goika kare na kare.

153Rigereria emechando yane, ontoorie, ekiagera tinyebeti amachiko ao.

154Indwanerere, omboorie, ong’e obogima oboyia koreng’ana ne ring’ana riao.

155Ogotooreka nigo kore aare korwa ase abakori amabe, ekiagera barabwo tibari korigia emeroberio yao echikire.

156Aye Omonene, amabera ao nigo are amanene; ong’e obogima oboyia koreng’ana nokogamba kwao.

157Abagonchanda na abare ababisa baane nigo bare abange, korende tinkogobera korwa ase oborori bwao.

158Ekero nkorigereria abatari abegenwa nigo nkogechigwa nabarabwo, ekiagera tibabwateti ring’ana riao.

159Aye Omonene, rora buna nyanchete amachiko ao! Ong’e obogima oboyia koreng’ana nobwanchani bwao botari koera.

160Amang’ana ao onsi nay’ekeene, na okogamba kwao gwonsi kw’oboronge nogwa kare na kare.

161Abagambi nigo bagonchanda engencho ende etaiyo, korende enkoro yane nigo eirogete amang’ana ao.

162Nigo nkogokera ring’ana riao, naba buna oyo onyorire ebisakorwa ebinge.

163Nigo ngechete kegima oborimo bonde bwonsi, korende nigo nyanchete amachiko ao.

164Ara gatano na kabere ase rituko nigo nkogotogia, ase engencho y’emeroberio yao echikire.

165Abwo banchete amachiko ao nigo bare nomorembe omonene mono, kende tikeri gekobagocha.

166Aye Omonene, nigo nganyete ng’a ontoorie, naende nigo ngokora buna amachiko ao agoteba.

167Omoyo one nigo obwatete oborori bwao, nigo mbwanchete mono mono.

168Nigo imbwatete amachiko ao, na oborori bwao, ekiagera nigo omanyete chinchera chiane chionsi.

169Aye Omonene, tiga okorera kwane goike ase obosio bwao; ing’a obong’aini koreng’ana ne ring’ana riao!

170Tiga ogosaba kwane goike asore; ontoorie koreng’ana ne ring’ana riao!

171Nimbe nkona‐kogotogia nebikoba biane, ekiagera aye kwanyorokereirie imanye emeroberio yao echikire.

172Oromeme rwane ndotere ring’ana riao, ekiagera amachiko ao onsi nigo are amaronge.

173Okoboko kwao, tiga kobe ang’e gonkonya, ekiagera nachorire kobwatia amachiko ao.

174Aye Omonene, nigo inde namaiga ng’a ontoorie, na amachiko ao nigo angogetie mono.

175Tiga omoyo one obe moyo, erinde ngotogie, na aya gwachikire, tiga ankonye.

176Inche nasirire buna eng’ondi ensiru ndigie inche omosomba oo, ekiagera tinyebeti amachiko ao.