Psalms 49

Gussi (EBIBILIA ENCHENU) 2020

← Chapter 48 Jump to: Chapter 50 →

1Inwe abanto bonsi, igwa amang’ana aya! Tegerera moigwe, inwe mwensi momenyete ase ense,

2inwe mwensi pi, abake na abanene, abanda na abataka amo!

3Omonwa one nokwane amang’ana ’obong’aini, na ebirengererio bi’enkoro yane nigo birabe ebi’okomanya.

4Nintegerere amang’ana agokwanwa ase omoreng’anio, ning’orokie engencho yaye ase okobugia obokano.

5Inche tinkoba nobwoba ase chingaki chi’emechando, ekero amabe ’abachandi baane arabe ang’etananire.

6Tinkwoboa abanto abwo basemeretie obotenenku bwabo; barabwo nigo bare bakoenenera obonda bwabo bore obonge.

7Ekeene, omonto tari oranyare kobooria oyomwabo, gose koa Nyasae embooria y’ogotooria obogima bwaye.

8Rigori ri’okobooria omoyo oye nigo rire rinene mono, na mbooria ende teri eraisanere rigori erio,

9eyio eragere omonto agenderere koba moyo botambe, tabaisa kogenda ase embeera.

10Bonsi nigo bamanyete ng’a nonya nabanto abang’aini ngokwa bare, naboigo nabare abariri na amachara, erio batiga abanto abaao bakoira chinibo chiabo.

11Nigo bakorengereria ng’a nigo chirabeo kare na kare, na obomenyo bwabo ebiaare ase ebiaare; nigo bagwatora emegondo yabo ase amarieta abo.

12Korende mwanyabanto takonyara kogenderera koba nogosikwa, ere nigo anga buna ching’iti chigokwa chiasira.

13Obwo nabwo obosiru bw’abanto abwo besemeretie abanyene, omoerio obo abwo begenete amang’ana abo.

14Buna riicho rie ching’ondi nigo bakoirwa gochia aase abakure, amakweri naro arabe omorisia obo. Abwo bare abaronge mbabagambera kobogokiamoka, na ebieni biabo mbisirere agwo aase abakure aase are obomenyo bwabo.

15Korende Nyasae naboorie omoyo one, ayorusie korwa ase okobua gw’aase abakure, erinde ang’ire imenye asare.

16Tobaisa koiroka ekero omonto abeire omotenenku, na ebinto bire ase enyomba yaye biamentekanire.

17Ekero omonto oyio arakwe, takoira gento kende, obonene bwaye tibokomotunyana bogende inse aaria amo nere.

18Nonya omonto oyio ekero are moyo, ogweteba ng’a nigo asesenirie, ee, nonya ogotogigwa ekero ekoreire amaya,

19ere goika akwe, asangerereke ase chisokoro chiaye chire, echio chitarore oborabu naende.

20Mwanyabanto oyio osikire otabwati obong’aini, nigo anga buna ching’iti chigokwa chiasira.

← Chapter 48 Jump to: Chapter 50 →