Psalms 73

Gussi (EBIBILIA ENCHENU) 2020

← Chapter 72 Jump to: Chapter 74 →

1Ekeene, Nyasae nigo are omuya mono ase Abaisraeli, ee, ase abwo bare ne chinkoro chichenegete.

2Amagoro aane konya abeire ang’e kogochwa, konya nabeire ang’e gotererigwa,

3ekiagera nigo nabete ne ribero ase abanto abaenenu, ekero naroche ng’a abwo ababe nigo basesenirie.

4Barabwo tibari konyorwa nobokong’u bonde ase obogima bwabo; emebere yabo nigo ere emiya, naende emenoru.

5Tibabwati emechando buna abanto bande babwate; tibari konyora amaakwa buna abande.

6Ase ayio, obwerori nigo boetanaine amagoti abo, na obotindi nabwo beboyetie buna eanga.

7Amaiso abo nigo akogirigenta nobonoru, obotantanu bw’ebirengererio bie chinkoro chiabo nobonge mono.

8Nigo bagochecheria abande na gokwana ase okobakora bobe. Nigo bakweimokereria igoro na kobatianera.

9Emenwa yabo nigo egokwana amang’ana amabe are mamincha ya igoro; ne chimeme chiabo chiasokia ayakogenda ase ense engima.

10Ase ayio abanto babo nigo bakoonchoka bababwatia, nigo bakwong’otera amache abo are amange.

11Erio bateba, “Naki Nyasae arakore amanye? Inee! Ere Oyore Igoro Mono nabwate obong’aini?”

12Naama! Naboigo abakori amabe bare; botambe nigo bare buya na bagendererete komenta obotenenku bwabo.

13Ekeene, mbosa nabeire ndendete enkoro yane ebe echenegete, mbosa nabeire ngoisaba amaboko aane ng’a timba nokomocha.

14Omobaso boira nabeire nkonyora amaakwa, na kera emambia nabeire nkonyora egesusuro gi’okondongeyia.

15Onye nakwanete amang’ana buna ayio, nigo narenge gocha koba oyotari omwegenwa ase ebiaare bi’abanto bao.

16Bono ekero nabete nkorengereria komanya engencho y’amang’ana ayio, amang’ana ayio akaba amakong’u asende,

17goika ekero nasoete ime ase obomenyo obochenu bwa Nyasae, erio nario namanyete omoerio bw’abanyabibe buna ore.

18Ekeene, aye Omonene nigo okobabeka aase are aaterere, aye nigo okobaturunkania kwabasiria kegima.

19Barabwo nigo bagosirigwa rioka, omoerio obo nomoondoko okobasiria.

20Nigo banga buna chindoto omonto akweba mambia gakoboka. Aye Omonene, naboigo bare asore buna omogwekano okororwa ase okorota, ekero okoimoka nigo okweba ebieni biabo.

21Ekero narenge nobororo ase omoyo ime, na enkoro yane ekaba buna eyabetirwe,

22nigo nabete omoriri mono, tinamanya gento; nkaba buna eng’iti y’orosana ase obosio bwao.

23Nonya naboigo, inche nigo ngendererete kobeera asore botambe, aye nigo obwatete okoboko kwane gw’okorio.

24Aye nigo okondaa na gonsemia, na nyuma y’ayio noche kong’ira onsoyie ase obonene.

25Inee! Ning’o naende imbwate aaria igoro, otatiga aye bweka? Ekero nkobwate, gento tikeri aiga ase ense nganetie.

26Omobere one na enkoro yane nabo biranyare koborwa chinguru, korende aye Nyasae, naye ore egetare gi’enkoro yane, naende naye egetare kiane goika kare na kare.

27Rora, abanto abwo bagweatanana korwa asore nabasire; aye nigo orasirie abwo batari abegenwa asore.

28Korende asende inche, nigo ere buya mono kobeera ang’e na Nyasae. Omonene Nyasae obeire obotamero bwane, ninyare koraria emeremo yaye yonsi.

← Chapter 72 Jump to: Chapter 74 →