Psalms 89 — Gussi (EBIBILIA ENCHENU) 2020

1Aye Omonene, goika kare na kare ninterere obwanchani bwao bogendererete botambe, nindarie obwegenwa bwao ase ebiaare bionsi.

2Ninkwane ng’a obwanchani bwao mbogendererete botambe bwakorirwe kobao goika kare na kare; aaria igoro nigo okong’etie obwegenwa bwao.

3Aye nigo gwatebete, “Nakorire okobwatana nomochore one, narire eira y’ogotiana ase Daudi omosomba one.

4Ninkore oroiboro rwao rogenderere koba ne chinguru botambe, nintenenie ekerogo kiao ki’obonene kebe ase ebiaare bionsi.”

5Aye Omonene, igoro nchitogie emeremo yao y’ogokumia, naende obwegenwa bwao boigo ase omosangererekano bw’abachenu bao.

6Inee! Ning’o ore agwo igoro oranyare koreng’anigwa n’Omonene? Nkereki ase ebitongwa bia Nyasae kenga buna ere?

7Ere nigo are Nyasae oirokire ase ekegambero ki’abachenu, bonsi abamoetanaine nigo bamoirogete.

8Aye Omonene, Nyasae bw’Emeganda, ning’o obwate okobua buna okwao? Ee, Omonene, obwegenwa bwao nigo bogoetanaine.

9Aye nigo okogambera enyancha ekoimokerera igoro; ekero emerindo yaye ekoimokerera igoro, aye nigo okoyotoereria.

10Aye nigo gwasenyentete enchoka eria Rahabu ekaba buna egetondo, nokoboko kwao kore ne chinguru ogasiarera ababisa bao.

11Igoro neyao, na ense neyao, ense na ebinto bionsi bireo naye kwabitongete.

12Naye gwatongete sugusu na irianyi; egetunwa gia Tabori, na ekia Herimoni, nigo bigotogia erieta riao nomogoko.

13Okoboko kwao nigo kore nokobua, ee, nigo kore ne chinguru; okoboko kwao gw’okorio nigo koimokererete igoro.

14Oboronge na ekeene nabio bire oboroso bw’okogamba kwao, obwanchani bwa kare na kare, na obwegenwa, nigo bitang’aine bosio bwao.

15Mbasesenirie abanto abwo bamanyete goaka eriogi ri’omogoko asore, abwo bagotaara ase oborabu bokorwa ase obosio bwao aye Omonene.

16Abwo nigo bagochengera erieta riao omobaso boira; na goetera ase oboronge bwao nigo bakoimokererigwa igoro.

17Aye nigo ore obonene bwabo ne chinguru chiabo; ase engencho y’ogwancherwa kwao chingunchara chiaito chiakinire.

18Oyore enguba yaito noyo bw’Omonene, ee, omoruoti oito noyo bw’Oyore Omochenu bw’Abaisraeli.

19Kare ngwakwanete nabegenwa bao ase okorora, okabatebia, “Narentire ogokonywa goetera ase oyomo ore nokobua, naimokereirie igoro oyomo nachorire korwa ase egati y’abanto.

20Nanyorire Daudi, omosomba one, namoakire amaguta aane amachenu ase okomwatanana asende.

21Okoboko kwane nkobe amo nere botambe, ee, okoboko kwane nkomobeke chinguru.

22Ababisa tibakomobwata mobosokano, na abakori amabe tibakomochanda.

23Ninsenyente ababisa baye ase obosio bwaye, abwo bamogechete nimbae amaakwa.

24Obwegenwa na obwanchani bwane bogendererete botambe mbibe amo nere; ase erieta riane orogunchara rwaye ndokine.

25Nimbeke enyancha inse y’okoboko kwaye, ne chindooche nchibe inse y’okoboko kwaye gw’okorio.

26Ere nabe okorera asende na goteba; Aye naye Tata, naye Nyasae one, na Egetare kiane ki’ogotooreka.

27Erio inche nimokore abe omwana one omotangi, abe omoruoti ore omonene kobua abaruoti bande bonsi b’ense.

28Obwanchani bwane botari koera nimoborendere kare na kare, na okobwatana kwane kw’ogotianania nkorete nere ngotenene bokong’u.

29Ninkore oroiboro rwaye rogenderere kobao botambe, na ekerogo kiaye ki’obonene nkegenderere kobao buna igoro erabe ereo.

30“Onye abanto b’ororeria rwaye bagochia gotiga amachiko aane, baange koigwera emeroberio yane echikire,

31na onye bagochia gosaria aya nachikire. Baange kobwata amachiko aane,

32rirorio nimbae egesusuro, mbaake nenyimbo ase engencho y’ogosaria kwabo, na mbang’wanie ebiranya ase engencho y’ebibe biabo.

33Korende obwanchani bwane bogendererete botambe tinkoborusia asare, tingotiga koba omwegenwa asare.

34Tinkonyara gosaria okobwatana kwane kw’ogotianania, gose tinkoonchora ring’ana nakwanire nomonwa one.

35“Ase obochenu bwane natianire rimo ng’a tingokwana oborimo ase Daudi.

36Oroiboro rwaye ndogenderere kobao botambe, na ekerogo kiaye ki’obonene nkegenderere kobao, buna erioba rirabe rireo ase obosio bwane.

37Nkegenderere kobao buna omotienyi, oborori obwo bwa igoro nigo bore obwegenwa.”

38Korende bono, aye Omonene kwangire omoakwa amaguta oo, kwabeire nendamwamu enene asare.

39Bono gwatigire okobwatana kwao kw’ogotianania gwakorete nomosomba oo, kwarutire egutwa yaye y’obogambi inse kwayemwamirie.

40Gwatagoire chindwaki chiaye chionsi gwatagoire amaagacho aye onsi are amakong’u abeire amatombe.

41Abanto bonsi bagoetera aase agwo nigo bakomosakora, abamenyete ang’e nere nigo bakomochecheria.

42Abwo bakomochanda aye kwabaeire chinguru chinyinge, na kwagerire ababisa baye bonsi bagoke.

43Kwairanirie omoro oye bw’esegi, tori komoa chinguru chi’okorwana esegi.

44Kwamourire obonene bwaye, gwaakeire inse ekerogo kiaye ki’obogambi.

45Kwanachire amatuko aye ay’obosae abeire ameng’e, boigo kwamotubire nobosooku obonge mono.

46Aye Omonene, ngoika ririri oragenderere kwebisete? Inee! Ngoika ririri endamwamu yao eragenderere gwoka buna omorero?

47Aye Omonene, inyora buna obogima bwane bore obweng’e, nigo gwatongete mwanyabanto bonsi bakwe igo.

48Monto ki orabe moyo otakwe? Ning’o oranyare gotooria omoyo oye korwa ase chinguru chi’amakweri?

49Omonene, ng’ai obwanchani bwao bwa kare na kare bore, obwo ase obwegenwa bwao kwarierete Daudi eira?

50Aye Omonene, ing’inyore inche omosomba oo buna ingokorerwa echeche; nigo ndemereretie emerumi y’abanto abange.

51Omonene, ababisa bao nigo bagonchecheria, ee, nigo bagochecheria amabarato ’omoakwa amaguta oo.

52Omonene atogigwe kare na kare! Amina. Amina.