Romans 11

Gussi (EBIBILIA ENCHENU) 2020

← Chapter 10 Jump to: Chapter 12 →

1Ase igo nkoboria nde: Inee! Nyasae igo aangete abanto baye? Yaya, taibo! Inche omonyene n’Omoisraeli nde, oyomo bw’oroiboro rwa Ibrahimu, omonto bw’ororeria rwa Benjamin.

2Nyasae tangeti abanto baye baria amanyete korwa kare. Gose timomanyeti aya amariko agoteba igoro y’Elija, buna akweng’ereria ase Nyasae igoro y’Abaisraeli?

3“Omonene, baitire ababani bao, batagoire egesasimero kiao, ninche bweka natigaire, na barabwo nkorigia bare obogima bwane babosirie.”

4Korende okoiraneria kwa Nyasae naki gokomotebia? “Ninde nabanto chilifu isano na ibere batabegete amaru inse ase Baali.”

5Nabo ekero kia bono mbare abatigari abachorirwe ase obuya bwa Nyasae.

6Korende onye nase obuya, rirorio tibokoba ase ogokora, onye taibo, obuya tibokoba obuya.

7Naki rende abeire? Egento keria Abaisraeli baare korigia tibakenyorete, Baria bachoretwe, mbarabwo bakenyorete, korende abatigarete bagakorwa koba abakong’u ase chinkoro chiabo,

8buna erikiere, “Nyasae akabaa omoika bwe chitoro, na amaiso atanyare korora, na amato atanyare koigwa, goika rero iga,”

9Na Daudi nigo agoteba, “Tiga endagera yabo ebe egesugunia na oboreba, na egento gekobagocha, na ogoakanwa kwabo.

10Tiga amaiso abo abekwe omosunte tibarora. Obakumbe emegongo yabo botambe!”

11Bono nkoboria nde, “Inee! Nigo bagochirwe goika bagure kegima?” Yaya, taibo! Korende ase ogosaria kwabo ogotooreka gwaikeire abanto b’Ebisaku, erinde Abaisraeli bakorwe babe ne ribero.

12Bono onye ogosaria kwabo kwaeire abanto b’ense eye obonda, na onye okobugwa kwabo kwaeire abanto b’Ebisaku obonda, Inee, tari kobua mono oboikeranu bwabo?

13Bono ngokwana nde nainwe abanto b’Ebisaku. Koreng’ana buna inde omotomwa bw’abanto b’Ebisaku, nabarire ng’a obosomba bwane negento ekenene,

14erinde inyare kobeka abare amanyinga ayamo nainche ribero, na gotooria abande babo.

15Naki onye okwangwa kwabo gokorenta okobwatania ase ense, Inee, ogwancherwa kwabo inki korarente? Nigo gokorenta obogima ribaga ri’ogokwa.

16Naende onye ensemo ye ritang’ani ye ribomba ri’obosie ere enchenu, naboigo ne ribomba rionsi rire; na onye ritina rire richenu, naboigo ne chinsagia chire.

17Korende onye chinsagia chinde chiabunekire, na aye oyokwarwete ase omozeituni bw’orosana gwachomirwe ase ribaga riabo, okaba oyomo bwe ritina ri’omozeituni, na konyora obonoru bwaye.

18Tibwetogia igoro ase chinsagia chiria. Onye kogwetogia, inyora ng’a tari aye oimogetie ritina, korende neritina rikoimogetie aye.

19Bono notebe, “Chinsagia nigo chiabunegete, erinde nchomwe aroro.”

20Ee, ayio namaene. Barabwo mbabunegete ase ogotegena kwabo, korende aye nigo oteneine ase okwegena kwao. Ase igo toenena, korende oiroke.

21Naki onye Nyasae tarorerete chinsagia chi’omote omonyene amabera, nonya naye tagokororera amabera.

22Inyora obuya na obotindi bwa Nyasae, obotindi ase baria bagure; korende asore obuya bwa Nyasae, korabeere ase obuya bwaye. Onye taibo, naye boigo nonachwe korwa aroro.

23Nonya nabwo bande, onye tibakogenderera ase ogotegena kwabo, rirorio nabachomwe, ekiagera Nyasae nare nokobua kobachoma naende.

24Naki onye aye kwanachetwe korwa ase omozeituni bw’orosana, ogachomwa ase ogochomwa gotanaretwe bo, ase omozeituni oyosimekire, tari kobua mono chinsagia chie ritina rinyene chichomwe ase omozeituni obo omonyene.

25Naki baminto, timwerora ng’a nigo more abanyene obong’aini; nindigetie momanye obobsis obo. Obokong’u bwanyorire abande b’Abaisraeli, goika ogoikerana kw’Ebisaku goike.

26Na igo Abaisraeli bonsi nabatoorigwe, buna erikire, “Ere Omosibori nache korwa Sayoni. Narusie obobe bore ase Yakobo;

27na oko nakwo okobwatana kwane nabarabwo, ekero ndache kobaruseria ebibe biabo.”

28Naboigo ase amanag’ana ’enchili babeire ababisa ba Nyasae ase engencho yaino; korende ase ogochorwa babeire abanchwa ase engencho ye chisokoro chiabo.

29Naki Nyasae tari gweiteria ebiegwa biaye na okorangeria kwaye.

30Naki buna inwe kare motarenge koigwera Nyasae, korende bono mwanyorire amabera ase engencho y’ogotaigwera kwabo,

31naboigo na barabwo bono bataigwereti, erinde ase amabera aya mwanyorire inwe, nabarabwo boigo banyore amabera.

32Naki Nyasae osibire bonsi ase ogotaigwera, erinde aborokie bonsi amabera.

33Aa! Obonge bw’obonda, na obong’aini, ne chisemi bire ase Nyasae! Tibikorengeka. Ebina biaye tibikomanyekana ne chinchera chiaye tichikorigeka!

34“Naki ning’o omanyete ebirengererio bi’Omonene? Gose ning’o okomotebereria buna agwenerete agambe?

35Gose ning’o omoete ekeegwa ritang’ani, erinde akeiranerigwe?”

36Ekiagera ebinto bionsi nigo bikorwa asare, nigo bire ase okobua kwaye, naende nigo biteneine asare. Ogotogigwa nokwaye goika kare na kare. Amina.

← Chapter 10 Jump to: Chapter 12 →

Recommended Reading

Commentary Romans Commentaries → Devotional Romans Devotional Guide → Get This Bible Gussi (EBIBILIA ENCHENU) Study Bible →