Romans 2

Gussi (EBIBILIA ENCHENU) 2020

← Chapter 1 Jump to: Chapter 3 →

1Ase ayio, aye onde bwensi, tori naya ogotaamera, ekero okogambia oyonde ekina, ekiagera ase okomogambia oyonde ekina, naye okwegambia omonyene. Naki okomogambia, na aye nare ayio ogokora?

2Intwe twamanyire ng’a ekina kia Nyasae nigo kere boronge igoro ase abwo bagokora ayio.

3Aye omonto oyokogambia baria bogokora ayio, naye omonyene naro ayio ogokora, Inee, nokagete ng’a aye notame korwa ase ekina kia Nyasae?

4Gose ngwachayire obonge bw’obuya bwaye, na oboremereria bwaye, na okoganya kwaye, na tomanyeti ng’a obuya bwa Nyasae nigo borigetie gokoraa gochia ase okoonchoka?

5Korende ase obokong’u bwao na ankoro yao etari nokoonchoka, kwegacheire endamwamu ase rituko riria ri’endamwamu, ekero ekina kia boronge kia Nyasae kerache koorokigwa,

6ekiagera ere nache komoa kera omonto koreng’ana nogokora kwaye;

7nabae obogima bwa kare na kare baria bakorigia obonene, na ogosika, na ogotasareka, na gokora amaya ase oboremereria.

8Korende endamwamu na ekeririanda nabibe igoro ase baria beanchete abanyene, batari koigwera ekeene, korende bakoigwera ayatari boronge.

9Emechando na obororo inabibe igoro ase kera oyomo bw’abana ba mwanyabanto oyogokora amabe, ritang’ani ase Omoyahudi, na ase Omogiriki boigo;

10korende obonene na ogosika, na omorembe nigo bire ase kera oyomo oyogokora amaya, ritang’ani ase Omoyahudi, na ase Omogiriki boigo.

11Ekiagera gwanchereria tikori ase Nyasae.

12Naki bonsi abakorire ebibe batari namachiko, nabasire batari namachiko; na bonsi abakorire ebibe bare namachiko, nabo baranacherwe ekina ase amachiko.

13Naki tari abwo bakoigwa amachiko bare abanyene oboronge ase obosio bwa Nyasae, korende mbaria bagoikerania amachiko, nabwo baraegwe oboronge.

14Abanto b’Ebisaku batari namachiko, ekero bagokora buna engencho ya mwanyabanto ere aya amachiko are korigia, nonya abwo tibari namachiko, babeire amachiko boka abanyene.

15Abwo nigo bakoorokia ng’a aya amachiko are korigia arikirwe ime ase chinkoro chiabo. Okomanya gwe chinkoro chiabo ime nigo gokobabera kirori, na ebirengererio biabo nigo bikobasoera gose kobaegera.

16Nabo arache koba ase rituko riria, koreng’ana nenchili eye nkorandia, Nyasae kagochi‐gocha nanachere obobisi bwa mwanyabanto ekina, goetera ase Kristo Yeso.

17Korende aya okweroka Omoyahudi, na gosemeretie amachiko, na gwetogia ase Nyasae.

18Kwamanyire ogwancha kwaye, naende nomanyete buya amang’ana ayare amaya, ekiagera kworokererigwe amachiko.

19Nore nobomaene ng’a aye omonyene nigo ore omoraai bw’emeuko, na omobaso bw’abare ase omosunte ime.

20Omotebereria bw’abariri, na omworokia bw’abana abake, ekiagera kwanyorire okworokereria okuya gwe chisemi na ekeene bire ime ase amachiko.

21Aye okworokereria abande, Inee, tokweorokereria aye omonyene? Aye okorandia ng’a omonto taiba, tori koiba aye omonyene?

22Aye ogoteba ng’a omonto tatomana, tori gotomana aye omonyene? Aye ogechete emegwekano y’ogosasimwa, aye tori koiba korwa ase chihekalu?

23Aye ogwetogeria amachiko, Inee, igo ogosareria Nyasae ogosika ase ogosaria kwao kw’amachiko?

24Naki amariko nigo agoteba, “Erieta ria Nyasae nigo rikoramwa ase egati y’abanto b’Ebisaku ase engencho yaino.”

25Okwaroka nigo kogwenerete onye kore omoigweri bw’amachiko, korende onye kore omosaria bw’amachiko, okwaroka kwao kwabeire ogotaroka.

26Karabe ere oyotarogeti okobwata amachiko, Inee, ogotaroka kwaye tigokobarwa ng’a kwabeire okwaroka?

27Ere oyotarogeti ase omobere, onye obwatete amachiko, Inee, tagokonachera ekina aye, oyore namachiko na okwaroka, naende osaririe amachiko?

28Naki ere oyore Omoyahudi ase isiko oka, tari Omoyahudi bw’ekeene, gose okwaroka koria gokorire isiko ase omobere, tikori okwaroka gw’ekeene.

29Korende ere n’Omoyahudi bw’ekeene oyore Omoyahudi o ime, na okwaroka gw’ekeene nogw’enkoro. Eye nemeremo y’Omoika, teri ey’amariko. Ogotogigwa kwaye tikorueti ase mwanyabanto, korende nase Nyasae.

← Chapter 1 Jump to: Chapter 3 →