Daniel 4

hadiyya

← Chapter 3 Jump to: Chapter 5 →

1Adil Nabukadanaxoor heer uullanne hee'oo annanni annanni giichchina, minaadabinaa annanni annanni suume wocoo keenina hundinamii «Xummi ki'nnuwwina ihona!

2Hundam xanoo Waa'i iina issu agannaa maalalsiisoo luwwaa ki'nnuwwina kureena hasoommo.

3«Waa'i moo'isoo aganni hinkido'i maalalsiisoohane! Ixxi baxoo baxim hinkido'i wodaamo! Waa'ik adillan heer heerinam hee'oohane; ixxi adillaninam tungi bee'ane.

4«An Nabukadanaxoor i adilla'n minenne lobakat goddinne makkixxaa hee'am hee'ummo.

5Mat balla ara'anne iinse'aammoohaannonne lobakata baddisoo haqaawwoo muggisoo kaaltaa moo'ummo;

6Ee bikkina haqaawwoo'mmeka tirato kuttona Baabiloo'n uullanne yo'i qoollowwi hundim i beyyo waattamisina ijaajummo.

7Ee lasage kiiraan, gennaan, falaanii qoolluwwi keenii i beyyo waatto'o. I haqaawwom ixxuwwina kurummo. Ihukkaarem ixxuwwi i haqaawwika tirato kutteena xanto'oyyo.

8Ee lasage i waa'i summanne Bilxaasoora yamamoo Daani'eel i beyyo aagukko; keesamaakkoo waa'uwwikim ayyaan ixxonne hee'ukko; anim haqaawwo ixxena kurummo.

9Ixxenam ‹Qoor kee'n awwonsaanchi ikkitti Bilxaasoora, keesamaakkoo waa'uwwik ayyaan keesenne yoo bikkina maaxamu luwwi hundim kiinniinsi daphphoobee'isa an la'oommo. Oono'o, an haqaawwe'ummi haqaawwo kuroommaare tiratooma iina kure.

10«An ara'anne iinse'aa mat geejji haqqichcho uulli lambe'enne uullaakkoo kaaltanne moo'ummo.

11Ku haqqichchi geejjaa malaayyaamoo ihukko; qeeraa'lloomim iimane afukko; uulli tochchi afeebe'em moo'amam hee'ukko.

12Buyyim mishisoohan; mishim lobakat hee'ukko; mishim hundinam ihoo hurbaat hee'ukko; ixxi hafannem uulli moochchi hundim usheexxam hee'ukko; iima'n cii'im caaffuwwanne hee'am hee'ukko; foorinne yoo qooccanchi hundim ee haqqichchi mishiinsi itam hee'ukko.

13«I ara'anne iinse'aa moo'ummi kaaltanne mat keesammi asse'amaanchi iimaniinsi dillukkuuyyi moo'ummo.

14Ixxim sagara iimaa'aa «Haqqichcho mullehe; caaffuwwam kirimmehe; buyyuwwam giggissehe; misham binnaa'llehe; lugumonne yoo moochchii caafanne yoo cii'im gibona.

15Ihukkaarem gugumooma biir beyyonne xaarinnee naasinnee kattakka'a uullanne hee'ona ullehe. «Iima'n hadaddi ixxonne dillona; ixxi heechchim haqqoro'l moochchinnette ihona.

16Ixxek mannoomaxxi tiir dabassamaa lamar hiinchi afeebe'e moochchi tiir ihona.

17Ku woshshi asse'amaaninne kuramaakko; oogato'im keesammuwwinne bayyanamaakko. Oohim hundam xanoo Waa'i manni adillan hundannem daanni ihukkisa, ee adillanom ixxi hasukkaannina hundinam uwwoohan ihukkisaa gadanto'oo keeninam ee adillano uwwoohan ihukkisaa foorinne hee'oo manni hundim la'oo'isinatte» yukko.

18«An adil Nabukadanaxoor moo'ummi haqaawwi kane; Bilxaasoora, at iina tiratooma kure; i adilla'n woronne yo'i qoolluwwi keen eehanni tiratooma kutteena xanto'oyyo. Ihukkaarem keesenne keesamaakkoo waa'uwwik ayyaan yoo bikkina at titteena xantootto› yummo» yukko.

19Bilxaasoora yamamu Daani'eel eekka macceesu ammane lobakata muggu bikkinaa kichche'u bikkinaa hofqax ammaninam maham woceena xanukkoyyo. Ee bikkina adil «Bilxaasoora, haqaawwom ihukko tirat keese u'nnisoone» yukko. Bilxaasoorim dabaraa «Adila, haqaawwom ki diina'ina tiratim keese sabbam keenina ihona.

20Qeeraa'lloom iimane afaa uullanne yoo mannina hundinam moo'amoo mat geejji malaayyaam haqqichcho kaaltanne moo'llitto.

21Ee haqqichchik buyyi mishisoohane; mishim lobakata; mishim hundinam ihoo hurbaat hee'ukko; moochchi ee haqqichchi hafanne usheexxam hee'ukko; iima'n cii'im caafanne do'nna baxaa hee'am hee'ukko.

22Adila, oo haqqichchi atette! At lobanee malaayyaamo; at lombinne iimiimitaa iimane affaatto. Ki gassim uulli tochchi afeebe'e.

23Adila, at moo'llonam mat keesammi asse'amaanchi iimaniinsi dillaa ‹Haqqichchooma mullehe; bi'isseheme. Ihukkaarem gugumooma xaarinnee naasinnee kattakka'a biir beyyonne uullanne hee'ona uullehe. Iimaniinsi dilloo hadaddim aashisona; ixxekim heechchi beyyi lamar hiinchi afeebe'e bii'l moochchinnettei ihona› yukkuuyyi macceessitto.

24«Adila, haqaawwoo'mmek tirat kane; ku woshshi Hundam xanoo Waa'i keesenne i moollannanne ihoo'isina oogataakkoohane.

25Hundam xanoo Waa'i manni adillanina daanni ihukkisaa eeham ixxi hasukkaannina uwwoohan ihukkisaa laqqeebe'e lamar hiinchina manniinsi annanni ikkaa bii'l moochchinne hee'llootto; mirgo'isam hixe ittootto; iima'n hadaddinnem aashshootto.

26Haqqichchoo'mmek gugum uullanne gatoo'isina ijaajamukkok heer uullanne Waa'i daanni ihukkisa laqqoo ammane odim daba'llitaa adil ikkeena xantoo'isa moo'isoohane.

27Ee bikkina adila, an keese sogoommi sogitano macceese; baaxiilo baximma uttaa er baxo baxe; jolle uttaa wor amadanto'i keenina qishixxe; eehid issitlas kiikki xummi doolli qeeraa'lleena xanookko» yukko.

28Ku hundim adil Nabukadanaxooranne afukko.

29Tommiinsii lam aganiinsii lasonne adil Nabukadanaxoor Baabiloonanne yoo adilla'n mi'n fooqanne daba'llamam hee'ukko.

30Adilim «Kuk i malaayyinnee wodinnee i lombii hibbii la'amoo'isinaa adilluwwinam heechchi beyyi ihonaa an baxisummi lob Baabiloonayyonnihe?» yukko.

31Adil wocaa guulloo'nnim iimaniinsi «Adil Nabukadanaxoora! Kiina qoodamukkoka macceese! Adillan kiinniinsi hooramaakko.

32Hundam xanoo Waa'i manni adillan hundinam daanni ihukkisaa ixxi hasukkaanninam uwweena xanoo'isaa laqqeebe'e lamar hiinchina manniinsi annanni ikkaa bii'l moochchinne hee'llootto; mirgo'isam hixe ittootto» yoo sagar waarukko.

33Oo woshshim ee ammanem Nabukadanaxooranne ihukko; manniinsim annanni ihaa mirgo'isam hixe itukko. Ixxi orachchim iimaniinsi dilloo hadaddinne aashukko; oddim gaaqichchaannisa, xuranqim iima'n cii'aannisa qeeraa'llukko.

34Adil Nabukadanaxoor «An Nabukadanaxoor oo lamarem hiinchim higaa lasage iima'n kolli moo'ummo; i tiirim daba'llukko. Hundam xanoo Waa'am galaxxummo; heer heerina hee'oo Waa'inam lombaa galataa uwwummo. «Waa'ik gassi heer heerinatte; ixxi adillaninam tungi bee'ane.

35Uullanne hee'oo minaadab hundim ixxi illagenne mahayyome. Iima'n gogotannee uulli minaadabannee ixxi doo'llukkoka issookko. Ixxeka doo'lla hooreena xanookkok te'im ‹Mahina issitoolla?› yookkok ayyim bee'e.

36«I tiir daba'llukkisam ee ammanem i adilla'nnek lombi, hibbii nuurii hundim iina daba'llaa uwwamukko; i sogaanii suu'm manni eese hasso'o; i adillanonnem daba'llummo; illagee'nnaanniisem loboka lombi exxukko.

37«Kabadem an Nabukadanaxoor iima'n adilina galataa lombaa uwwoommo; lonsoommome. Ixxi bax hundim hanqo'ane; ixxi oogatim golo'oom bee'ane; bolxoominne taakke'llam keeno hundam sholliiseena xanoohane» yukko.

← Chapter 3 Jump to: Chapter 5 →