Deuteronomy 16

hadiyya

← Chapter 15 Jump to: Chapter 17 →

1«Ki'nnuwwa Moollanni Waa'a Abiiba yakkam agananne Gibxiinsi ki'nnuwwa mat hiimonne wolabbanonne fissu bikkina Higimmi Uguda gudisimminne Waa'a lonsehe.

2Ki'nnuwwi Moollanni Waa'i ixxi summina doo'lloo beyyonne ixxo lonsitakkeena lariinsi te'im gereebbiinsi mato doo'llitakka'a ee ugudanne kitimmehe.

3Ee hii'm hurbaata ittakkam ammane hufaa'akka'a sarakko'oo qorosho'inne ittakkotte. Ee'isinne Gibxiinsi qaqqissakka'a fittakko'i ammane issitakko'isa sawwimmina lamar balli afeebe'e hufubee'i qorosho'o ittehe. Oo qorosho'im ‹Hawwi qorosho'o› yamamookko. Oohim ki'nnuwwi hee'llakkam doolli hundannem lobakat hawwo aa'llakko'i Gibxi uulliinsi fittakko'i balla sawwitakkamane.

4Lamar balli afeebe'e ki'nnuwwi uullanne ayyi minennem ursho'i hee'oone. Luxxi balli hiimo kitimina duramu diinaxxi maara hundam ee hiimom ittakka'a guullimmi hasisookko.

5«Ee ugudanne duttakkam diinate Waa'i uwwoo uullanne hinka'i beero'onnem durimmi hasisooyyo.

6Ihukkaarem Moollanni Waa'i ixxi summi weeshamona doo'llu beyyonne eelliinchi aagukkuuyyi Gibxiinsi fittakko'i ammanenne dullehe.

7Maarooma sattakka'a Moollanni Waa'i doo'lloo beyyonne ittehe; la'm balla daram odim ki'nnuwwi gattakkam dukkaana daba'llehe.

8Awwonaa hee'oo lohem ballam odim xale'i qorosho'o ittehe. Lama'l balla ki'nnuwwi Moollanni Waa'ina otossitakkeena wixxi'llehe. Ee balla maham baxxakkotte.

9«Hurbaata murimma asheettakkam balliinsi ki'isaa lamar saanta xiggehe.

10Ee lasage ki'nnuwwi Moollanni Waa'i uwwu maassisanne gaqqi doo'llinne kitimo hincaa'llakka'a hurbaaxxi aga'n uguda gudisimminne ki'nnuwwi Moollanni Waa'a lonsehe.

11Ki'nnuwwi oosinne, awwaadaaninne, Leewi'i oosinne, waaraaninne, adaraar oosinnee busar meentinnee maqirem Waa'i illagenne ixxi summi bikkina doo'llu beyyonne wixxitakka'a liirammehe.

12Ka ogolluwwa qoxxitakka'a egellehe. Ki'nnuwwim Gibxanne agidduwwi hee'llakko'isa sawwi'llehe.

13«Hurbaata wixxaa'llakkahii woyi'n misha ciinsitakkahii lasage lamar balli afeebe'e Daas Uguda lonsehe.

14Ee ugudam ki'nnuwwi oosinne, awwaadaaninne, Leewi'i oosinne, waaraaninne, adaraar oosinnee busar meentinnee maqirem lonsehe.

15Ki'nnuwwi Moollanni Waa'i doo'lloo beyyonne lamar ballina ee uguda gudissakka'a ixxo lonsehe. Moollanni Waa'i ki'nnuwwika atootaa issitakkam luwwi hundamii maasse'oo bikkina ee uguda liiranchinne lonsehe.

16«Hiinchonne sas kore goon hundim Higimmi Uguda, Hurbaata murakkam aga'n Ugudaa Daas Ugudaa lonsiteena ki'nnuwwi Moollanni Waa'i doo'lloo beyyonne wixxitona. Ee ugudduwwa lonsiteena fittam ammane kora'i angam fittoone.

17Annannichchim Waa'i uwwu uwwanchisinne eebimmi hasisookko.

18«Ki'nnuwwi Moollanni Waa'i sulli sullinne uwwoo uullanne hee'oo ki'nnuwwi beero'uwwanne daannuwwaa gassaanoo doo'llehe. Oo keenim minaadabina hanqo'isinne oogattona.

19Oogato boqqissakkotte; ille moo'llakka'a golo'llakkotte; qawwiissakkotte; maqanxi qoor kee'nneka ille qooqisoo bikkinaa oogato boqqisoohan ihu bikkinaa ixxo aa'llakkotte.

20Waa'i ki'nnuwwina uwwoo uulla lago aa'llakka'a lasage lobakat doolle hee'llakkeena hundi ammanem xabbeenaa hanqo'anee ikkehe.

21«Ki'nnuwwi Moollanni Waa'ina baxxakkam kiti'm beyyi gadanonne otossitakkam utuba kaassakkotte.

22Odim ki'nnuwwi Moollanni Waa'i saboo ki'n utubam otossitakkeena uullissakkotte.

← Chapter 15 Jump to: Chapter 17 →