Ezekiel 16 — hadiyya

2«Manchi beeto, Yerusaalee'mmeka shigigaa'oo baxo la'ise.

3Moollanni Waa'i is bikkina kanniinsi woroon yookkoka Yerusaaleemina kure. «At qarantittok Kana'aa'n uullannette hee'ukko. Kiyyanni Amoorekkichchi ihukkuuyyi kiyyummam Hiitekkichchotte hee'llo'o.

4At qarantitti ammane ki suro ayyim murukkoyyo. Keese muccusseenam ayyim wo'inne aanshukkoyyo; te'im sooqidinne cukkaa carqinne xaaxukkoyyo.

5Kiina qishixxaa ka keeniinsi matom ayyim issukkoyyo. At qarantitti ammane sabantaattoohan ikkitti bikkina uulli udma'anne uunjantaa hee'llitto.

6Anim eeheen higummuuyyi ki xiigannem lubantaa fitfitittuuyyi moo'ummo; xiiganne iinse'llaa hee'llittisam ‹Foorinne hee'e› yummo.

7Keesem harish beyyonne kaasamu haqqichchisa li'lloo'isa issummo. Atim li'llaa mishissoo baajaamotte ikkitto. Anuunam eebbaa ki horoo'l saraatim qeeraa'llukko; ihukkaarem kallemaram hee'llitto.

8«Odim an ki gadaninne higummuuyyi baajaamotti ikkaattoo moo'ummo. Ki leexa'oomam i weyyakkinne ifiisaa kiinninne hide'aa sagara aagummo; i gaqqetanem issummo› yoolla» yukko. Kaka wocukkok Moollanni Waa'a.

9Waa'im «Ee lasage xiiginne bi'aakkoo ki orachcho wo'inne aanshaa wee'l zaytam labummo.

10Mishisoo wereeggi eddechcham kiina eddeesummo; doo'l omachchinne baxamaakkoo caamma'am issummo; haarrinne baxamaakkoo shaashsham ki horoorenne karummo; bito xee'aalli kaabbam eddeesummo.

11Wereeggi mu'utinne wereeggisummo. Angannem guma'a ganummo. Gaanjennem worqa (cora) karummo.

12Ki sanina guma'a; ki maccinam gutichcho ee'isam ki horoorina mishisoo adilla'n mare'e uwwummo.

13Birinnee worqinnee baxamaakkoo wereeggi mu'ut kiina hee'ukko. Annanni annanni haarriinsi dadamaa anginne gobamaakkoo wereeggi eddechchi kiina hee'ukko. Doo'l qamiinsi saramaakkoo daabbo'o, maraboo wee'l zaytaa ittam hee'llitto. Kiikki dan lobakata mishisukkuuyyi maru bikkina at adilatte ikkitto.

14Iikka nuura kiina uwwaa hee'ummi bikkina kurakkam luwwi bee'i daniinsi ki'ukkok ki sad uulli hundannem la'amukko» yukko. Kaka wocukkok adil Waa'a.

15Waa'i «Ihukkaarem ki danonnee sadonnee bakke'llaa araat hundinnem saa'llito.

16Ki eddechchiinsi mat mato massitaa saa'immina otossitoo beyyuwwa axissitto. Eehido'i bax kanniinsi illageen hee'ukkoyyo; ka lasagem hore'em hee'ooyyo.

17An kiina uwwummi birinnee worqinnee baxamu doo'llamaakkoo wereeggi mu'uttuwwinne gooncho laboo misila baxxaa ee keeninne maqire saa'llitto.

18An kiina uwwummi wereeggisakka'a dadakko'oo eddechcham massitaa misilluwwanne eddeessitto. An kiina uwwummi wee'l zaytaa aduruusaa ee misilluwwina uwwitto.

19Doo'l qama wee'l zaytaa maraboo kiina ittona uwwaa hee'ummo. Ihukkaarem at qophpha'n waa'uwwa liiransiteena danaam enje'oo kitim issitaa hincaa'llito» yukko. Oohim ihaakko. Kaka wocukkok adil Waa'a.

20Waa'i «Saa'llittaanniinsim loboka iina qattitti goonaa landaa massitaa qophpha'n waa'uwwina kitim issitaa hincaa'llito.

21I ooso duttaa qophpha'n waa'uwwina kitima issitaa hincaa'llito.

22Lobakata shigigaa'oo ki saa'immi heechchanne ki oosoomma'n duuha'a tiittittoyyo. Oohim leexa'am xiiganne biqqiiqqittuuyyi hee'llitti amman hore'em kiina tiiramukkoyyo» yukko.

23Moollanni Waa'i Yerusaaleemina «Aayye! Aayye!» yoolla. Ee hundem jor luwwam issitaa lasonne

24saa'lloo beyyuwwa wixxixxi beyyi qoffit hundannem baxxitto.

25Ee'isam lob bu'l gammalluwwanne hundannem qophpha'n waa'uwwina otossakkam beyyuwwa baxxaa ki dano bi'issitto; araat hundinam ki orachcho uwwittuuyyi balli hundam saa'imma lonsitto.

26Saa'aan ikko'i Gibxi uulli manninne maqire saa'llitto; saa'imma lonsimminnem eese quuqissitto.

27«Ihukkaarem kaba keese guzumo'eenaa ki sharad ihu maasso kiinniinsi hoffiiseenaa i anga biddiqaa'aammo; ki jor baxonne tuuttam kiina diina'i ikko'i Filisxee'm manninaa keese higisaa uwwaammo.

28«Mulli keeninne saa'llittok kiina ihimma hoogu bikkina Aasoo'l uulli manninnem saa'llito; ihukkaarem ixxuwwim xeebo mutto'oyyo.

29Daddaraan ikko'i Baabiloo'n uulli manninnem saa'llitto; ihukkaarem ixxuwwim ki xeebo mutto'oyyo» yukko.

30Moollanni Waa'i «Tuuttambee'i saa'aanchi meentichchosa ka hundam issittok hinkaa'nna hoogaanchi sawwit keesenne hee'ukkaarette?

31Saa'lloo beyyuwwa gooqqi gamal hundannem gudissitto; qophpha'n waa'uwwina otossitoo beyyuwwam wixxixxi beyyi qoffittuwwanne baxxitto. Ihukkaarem awwaad bee'i saa'aanchi meentichchosa diinate miqissittoyyo.

32At aro'o utta'a ayyennem saa'llam meentichchosa ikkaatto.

33Saa'aan meentina diinate miqakkamo; ihukkaarem at diinate miqisimmi bikkenne ki kobina irifo'o uwwitto; kiinninne kolli hundinnem manni waaraa saa'ona maqanxa uwwitto.

34Ee bikkina at annanni ikkaattoo saa'aanchotte. Ihukkaarem ka'isa ikkoo'isina keese qawwiisukkok bee'e; at diinate miqqootto bagaan kiina miqookkok bee'e. Ee bikkina hanqinam ki saa'immi mulli saa'aaniinsi annanna» yukko.

35Saa'aanchi Yerusaaleema, Waa'i kiina yoo woshsha macceese!

36Moollanni Waa'i «Saa'immi mixaninne muxmuxitaatto. Ki kobina kiikka orachcho higissaa uwwitaatto; shigigaa'oo qophpha'n waa'uwwi hundannem otossitaatto; ki oosikam xiiga duntaa ee qophpha'n waa'uwwina kitim issitaa hincaa'llaatto.

37Ee bikkina at ixxuwwinne maqire liirantitti ki koba iittittokaa sabbittokaa hundam kolli hundiinsim wixxaa'oommo; anim keese ixxuwwi illagenne maxaroommo; ixxuwwim kiikka tuulli orachcho moo'llamo.

38An keesenne, saa'llo'i meentonnee manna shito'i meentonnee oogatakkam oogato oogatoommo. Keesem i to'achchinnee quunqinnee bi'isoommo.

39Anim keese ixxuwwina higisaa uwwoommo; ixxuwwim kiikka saa'lloo beyyuwwaa qophpha'n waa'uwwina otossitoo beyyuwwaa ginditamo; kiikka eddechchaa wereeggi mu'utaa massita'a leexa'am gattoo'isa issitamo.

40Ixxuwwi «Kininne aphphisaa bisa'inne muransaa shoo minaadab keesenne ki'isansitamo.

41Ki minneewwa giirinne shokkiissamo; lobakat meenti illagenne guzumo'antoo'isa issitamo. Ee'isinne kiikka saa'immaa kiinninne saa'u ki kobina diinate miqimmaa uttoo'isa issoommo.

42Ee ammane keesenne quuqummi quunqi uullookko; i to'achchim kiinniinsi qee'llookko; i quunqim siggookko; ee lasage od quuqoommoyyo.

43Kiina oosoomma'n doollenne issummi luwwi hundam xadditto; at baxxitti jor baxinne eese quuqissitto. Ee bikkina anim at baxxitti baaxii'llisinne bito a'llitoo'isa issummo. At baxxitti shigigaa'oo bax hundiinsm mulleka saa'llittok mahinatte?» yoolla. Kaka wocukkok Moollanni Waa'a.

44Waa'i «Yerusaaleema, Manni keese ‹Landichchom amasam ikko'o!› yukkuuyyi heesse'ookko.

45Hanqinam at is aro'oo oosoo shigigita'a utto'i kiyyummatane. Odim at aro'uwwaa oosoo shigigamaa uru kiyyaayyuwwisame; ki'nnuwwik amaa Hiitekkichchotte annii Amoorekkichcho.

46«Ki lob aayya is olla'inne maqirem hanaa'n qaranne hee'llam Samaare'ette. Kiikki hoffi aayyam is olla'inne maqirem woroo'n qaranne hee'llam Soddomatte.

47Ixxuwwi googo awwontaa ixxuwwika shigigaa'oo baxo baximmi xale'i ihoo'n ki taakkinne hundinnem gundi ammanenne ixxuwwaaniinsi lophphaakkoo jor baxo baxxitto.

48«Hanqinam an hee'oommi Waa'a; kiyyaayya Soddomaa is hegeegguwwii atii ki kululleetanne yoo hegeegguwwii baxxakko'i jor baxiinsi loboka ixxuwwi baxxo'oyyo. Kaka wocukkok Moollanni Waa'a.

49Kiyyaayyi Soddom hawwojji kane. Isee is olla'ii bolxita'a hee'llo'o. Ihaa gataakkoo hurbaatii makkaakkoo heechchii ixxuwwina hee'ukkaaremii hawwaaninaa buxinaa hara'mtambee'i keen hee'llo'o.

50Ixxuwwi bolxitam keen ikka'a an saboommi luwwa hundam issito'uuyyi moo'ummi bikkina at laqqoo'isam ixxuwwa bi'isummo.

51«At baxxitti baaxii'lleka kollom Samaare'i baxxo'oyyo. Iseensi loboka at shigigaa'oo baaxiilo baxxaatto. Ki haashaaranchi kiyyaayyuwwaanninne akeekixxamuta'n ixxuwwi mucculluwwi ikko'oka labsiisookko.

52Oono'o, kaba ki sholle'nna iyyaqqe; ki baaxiil lobakata joraakkoohan ihimmiinsi ki'ukkok kiyyaayyuwwa mucculluwwi issitti bikkina sholle'nna iyyaqqe; ki baaxiil ixxuwwi baaxiiliinsi lophphaakkoohan ihu bikkina kiyyaayyuwwi kiinninne akeekixxantam ammane matem jollim bee'i mucculluwwa labba'a moo'antamo. Kabadem kiyyaayyuwwa matem hawwojjim bee'i mucculluwwa labba'a moo'antamisa issitti bikkina at sholle'e; tuullem eddechchisa gunguu'llitaa afuure» yukko.

53Waa'i Yerusaalee'm bikkina «Soddo'mmekaa ixxi hegeeqqekaa ee'isam Samaare'ikaa ixxi hegeeqqekaa qeefadamaa maru amaxxa dabaroommisam kiinniinsi qeefadamu amaxxam dabaroommo.

54Atim ki sholle'nna gunguu'llitaa baxxi luwwi hundannem tuuttootto. Soddomii Samaare'ii ka ki duuha'a moo'llam ammane ki qaxa baaxiilaammuwwi ikkobee'i bikkina qoxxita'a hee'llamo.

55Kiyyaayyuwwi ikko'i Soddomii is landii Samaare'ii is landii gaassi hee'llo'isannem daba'llitamo. Ee'isam atii ki landii gaassi hee'llakko'isannem daba'llitakkamo.

56At bolxitam hee'llitti doolle kiyyaayya Soddoma kiina osachchatte hee'llo'oyyonnihe?

57Oohim ki hawwojji la'ameena illageenetti hee'ukko. Ihukkaarem kaba ki kululleetanne ikka'a keese gaddam Eedoo'm landinaa olla'uwwinaa ee'isam Filisxee'm landinaa osachchi ikkaatto.

58Saa'aanchotti ikkaa shigigaa'oo baxo baxxoo bikkina Guzumo'antootto» yukko.

59Moollanni Waa'i «Iikka hidi'l sagara gaddaa ginditti bikkina kiina laboo guzumo'o aa'llootto.

60Ihukkaarem ki oosoomma'n doollenne kiinninne aagummi hidi'l sagara tiiroommo. Heer heerina hee'oo hidi'l sagara kiinninne qoxxisoommo.

61Kiikka lob aayyuwwaa hoffi aayyuwwaa aa'lloo ammane ki taakki bikkina sawwitootto; tuuttoottome. Kiina landi oos ikkona ixxuwwa kiina uwwoommo; ihukkaarem ookki kiinninne aagummi hidi'l saga'llisinneyyo.

62Ee bikkina kiinninne hidi'l sagara haareechchisoommo. Ee ammane an Waa'i ihummisa laqqootto.

63At issitti hawwojji hundinam haafoommi ammane ki hawwojja tiittaa tuuttootto; ki sholle'nniinsim ki'ukkok ki suume hore'em fooqaa'llooyyo» yaa kaka wocukkok adil Waa'a.