Amos 1

Ilonggo (Maayong Balita nga Biblia (2012))

Jump to: Chapter 2 →

1Amo ini ang mga pulong ni Amos nga isa sang mga manugbantay sang mga karnero sa banwa sang Tekoa. Ang Dios nagpahayag sini nga mga pulong kay Amos nahanungod sa Israel, duha ka tuig sang wala pa ang mabaskog nga linog, sang si Uzias hari sang Juda, kag si Jeroboam nga anak ni Joas, hari sang Israel.

2Si Amos nagsiling: “Ang Ginoo nagangurob gikan sa Bukid sang Sion, ang iya tingog nagadaguhob gikan sa Jerusalem. Tungod sini ang palahalban nagakalaya, kag ang kalagtom sang hilamon nagapula sa putokputokan sang Bukid sang Carmel.”

3Amo ini ang ginasiling sang Ginoo, “Ang mga pumoluyo sang Damasco liwatliwat nga nagpakasala, kag tungod sini silutan ko gid sila, kay tama gid ang ila pagpamintas sa mga pumoluyo sang Galaad.

4Gani padalhan ko sing kalayo ang palasyo ni Haring Hazael, kag magasunog ini sang mga pamakod ni Haring Benhadad.

5Balion ko ang trangka sang pwerta sang siudad sang Damasco, kag kuhaon ko ang mga pumoluyo sang Kapatagan sang Aben kag ang pangulo sang Beteden. Ang mga katawhan sang Siria pagadalhon subong nga mga bihag sa duta sang Kir.” Ini ang hambal sang Ginoo.

6Ang Ginoo nagasiling, “Ang mga pumoluyo sang Gaza liwatliwat nga nagpakasala, kag tungod sini silutan ko gid sila, kay gindala nila nga bihag ang bug-os nga katawhan kag ginbaligya sa taga-Edom.

7Gani magapadala ako sing kalayo sa mga pader sang siudad sang Gaza sa pagsunog sang mga pamakod sini.

8Pamatyon ko ang mga pangulo sang mga siudad sang Asdod kag Askelon. Pagasilutan ko ang siudad sang Ekron, kag ang tanan nga nabilin nga mga Filistinhon magakalamatay.” Amo ini ang hambal sang Ginoo nga Gamhanan.

9Ang Ginoo nagasiling, “Ang mga pumoluyo sang Tiro liwatliwat nga nagpakasala, kag tungod sini silutan ko gid sila, kay gindala nila ang bug-os nga pumoluyo subong bihag sa duta sang Edom, kag wala nila pagtumana ang kasugtanan sang pag-abyanay nga ila ginhimo.

10Gani magapadala ako sing kalayo sa mga pader sang siudad sang Tiro, sa pagsunog sang mga pamakod sini.”

11Ang Ginoo nagasiling, “Ang mga pumoluyo sang Edom liwatliwat nga nagpakasala, kag tungod sini silutan ko gid sila, kay ginhingabot nila ang ila mga pariente, ang mga Israelinhon, kag wala gid sila magkaluoy. Wala gid magtahaw ang ila kaakig.

12Gani magapadala ako sing kalayo sa siudad sang Teman, kag magasunog sang pamakod sang Bozra.”

13Ang Ginoo nagasiling, “Ang mga pumoluyo sang Amon liwatliwat nga nagpakasala, kag tungod sini silutan ko gid sila, kay sa ila kadalok sang duta, ginpangririan nila ang mga tiyan sang nagabusong nga mga babayi nga nag-estar sa Galaad.

14Gani tutdan ko ang mga pader sang siudad sang Raba sa pagsunog sang mga pamakod sini. Dayon may pagsininggit sa adlaw sang inaway, kag ang hinagunos sang inaway manginsubong sang isa ka bagyo.

15Ang ila hari kag ang iya mga opisyales pagabihagon.” Amo ini ang hambal sang Ginoo.

Jump to: Chapter 2 →