Amos 8

Ilonggo (Maayong Balita nga Biblia (2012))

← Chapter 7 Jump to: Chapter 9 →

1Ang Ginoo nga Gamhanan nagpakita sa akon sining isa pa gid ka palanan-awon: Nakita ko ang isa ka alat nga may mga prutas.

2Dayon ang Ginoo nagpamangkot, “Amos, ano ang makita mo?” Nagsabat ako, “Isa ka alat nga may mga prutas.” Ang Ginoo nagsiling sa akon, “Ang katapusan sang akon mga tawo nga Israelinhon nag-abot na. Indi ko na gid sila pagpatawaron.

3Sa sina nga adlaw ang mga ambahanon sa palasyo mangin-ambahanon sa paglalaw, kag bisan diin lang may mga patay. Wala gid sing mabatian nga gahod.”

4Pamatii ninyo ini, kamo nga nagatapak sang mga nawad-an, kag buot magpapas sang mga imol sa duta.

5Nagasiling kamo sa inyo kaugalingon, “San-o pa matapos ang Piesta sang Lati agod mapadalawat naton ang aton trigo. San-o pa matapos ang Adlaw nga Inugpahuway, agod makapadalawat naman kita liwat sang aton trigo? Dayon mapasobrahan naton ang bili, gamitan naton sing indi husto nga mga sulokban, kag liwaton naton ang mga timbangan sa pagdaya sa mga nagabakal.

6Ipadalawat naton ang alupinpin sa mahal nga bili. Kag sa bili sang isa ka pares nga sandalyas baklon naton ang imol nga mangin-ulipon.”

7Ang Ginoo, ang Dios sang Israel nagsumpa, “Indi ko gid pagkalipatan ang ila malaut nga mga buhat.

8Gani, magalinog ang duta, kag ang tanan nga nagaestar sa sini magalalaw. Pagatay-ugon ang bug-os nga pungsod, kag magaawas ini kag magahubas kasubong sang Suba sang Nilo.

9Sa sina nga adlaw ang adlaw matunod sa udto, kag ang duta magadulom bisan sa kaadlawon. Ako, ang Ginoo nga Gamhanan, naghambal sini.

10Bayluhan ko ang inyo mga piesta sing mga paglalaw, kag bayluhan ko ang inyo masadya nga mga kalantahon sing mga panalambiton. Pabayuan ko kamo sing sako kag pakiskisan ko ang inyo mga ulo. Manginkaangay kamo sang mga ginikanan nga nagalalaw sa ila bugtong nga anak nga lalaki. Ina nga adlaw manginmapait tubtob sa katapusan.

11“Ang tion magaabot nga akon padalhan sing gutom ang duta. Ang mga tawo pagagutomon, pero indi sang kalan-on, pagauhawon, pero indi sang tubig. Pagagutomon kag pagauhawon sila sang pulong sang Ginoo. Ako, ang Ginoo nga Gamhanan, naghambal sini.

12Ang mga tawo magadalangdalang halin sa Patay nga Dagat pakadto sa Mediteraneo kag dayon naglibot halin sa naaminhan pa nasidlangan. Magapangita sila bisan diin sang pulong sang Ginoo, pero indi sila makakita sini.

13Sa sina nga adlaw ang matahom nga pamatan-on nga mga babayi kag ang pamatan-on nga mga lalaki magakalipong sa kauhaw.

14Nagasiling ang mga nagasumpa sa ngalan ni Asima, ang diosdios sang Samaria, ‘Sa nagakabuhi ang dios ni Dan,’ ukon ‘Sa nagakabuhi ang dios sang Beerseba’—yadto nga mga tawo magakapukan kag indi na gid makabangon liwat.”

← Chapter 7 Jump to: Chapter 9 →