Hebrews 1

Ilonggo (Maayong Balita nga Biblia (2012))

Jump to: Chapter 2 →

1Sang una nga panahon ang Dios naghambal sa aton mga katigulangan paagi sa mga propeta sa madamo nga mga beses kag sa nanarisari nga mga paagi.

2Pero sa sining ulihi nga mga inadlaw naghambal sia sa aton paagi sa iya Anak. Paagi sa iya gintuga sang Dios ang bug-os nga kalibutan, kag sia man ang ginpili sang Dios nga manginmanunubli sang tanan nga mga butang sa katapusan.

3Sia ang nagapakita kon daw ano ka makatilingala ang Dios, kag sia ang matuod nga laragway sang kinaugali sang Dios. Ginapadayon niya ang tanan nga butang sa sining kalibutan paagi sa iya gamhanan nga pulong. Sang mapatawad niya ang mga tawo sang ila mga sala, nagpungko sia sa tuo sang Dios nga Labing Gamhanan didto sa langit.

4Ang Anak nanginlabaw pa sang sa mga anghel, subong nga ang ngalan nga ginhatag sang Dios sa iya labaw pa sang sa ila mga ngalan.

5Kay ang Dios wala gid magsiling sa bisan isa sang iya mga anghel: “Ikaw ang akon Anak, karon nga adlaw ako nangin-imo Amay.” Kag wala man sing anghel nga ginsingganan sang Dios: “Ako mangin-iya Amay, kag sia mangin-akon Anak.”

6Pero sang buot na ipadala sang Dios ang iya panganay nga Anak sa kalibutan, nagsiling sia: “Ang tanan nga mga anghel sang Dios dapat magsimba sa iya.”

7Amo ini ang ginsiling sang Dios nahanungod sa mga anghel: “Ginahimo sang Dios ang iya mga anghel subong sang mga hangin kag ginahimo niya ang iya mga alagad subong sang mga dabdab sang kalayo.”

8Pero ang Dios nagsiling nahanungod sa Anak: “Ang imo ginharian, O Dios, wala sing katapusan! Nagagahom ka sing matarong sa imo ginharian.

9Ginahigugma mo ang katarungan kag ginadumtan ang kalautan gani nga ang Dios, ang imo Dios, nagpili sa imo kag naghatag sa imo sing kalipay sang kadungganan nga labaw pa sang sa ginhatag niya sa imo mga kaupdanan.”

10Nagsiling man sia: “Ikaw, O Ginoo, ang nagtuga sang duta sa ginsugoran kag ang imo mga kamot amo gid ang naghimo sang mga kalangitan.

11Sila tanan mawala, pero ikaw magapadayon, magadaan sila subong sang mga bayu.

12Pagapiuron mo sila subong sang kunop, kag pagailisan sila subong sang mga bayu. Pero ikaw amo man sa gihapon, kag wala sing katapusan ang imo kabuhi.”

13Ang Dios wala gid magsiling sa bisan isa sang iya mga anghel: “Pungko ka sa akon tuo, tubtob mahimo ko ang imo mga kaaway nga tulongtungan sang imo mga tiil.”

14Gani, ano gid bala ang mga anghel? Sila mga espiritu nga nagaalagad sa Dios, kag ginapadala niya sa pagbulig sa mga magabaton sang kaluwasan.

Jump to: Chapter 2 →