Hebrews 11

Ilonggo (Maayong Balita nga Biblia (2012))

← Chapter 10 Jump to: Chapter 12 →

1Ang pagtuo amo ang pagsalig sang mga butang nga aton ginalauman, ang kasigurohan sang mga butang nga indi naton makita.

2Tungod sang ila pagtuo, ang mga katawhan sadtong una nga mga panag-on ginpakamaayo sang Dios.

3Tungod sa pagtuo, mahangpan naton nga ang kalibutan gintuga paagi sa pulong sang Dios. Aton man nahibaluan nga ang mga butang nga sarang makita nahimo halin sa mga butang nga indi makita.

4Tungod sa pagtuo, si Abel nagdulot sa Dios sang halad nga mas maayo pa sang sa kay Cain. Paagi sa iya pagtuo, ginkilala sia sang Dios subong nga matarong nga tawo, tungod kay ang Dios gid amo ang nagbaton sang iya mga dulot. Paagi sa iya pagtuo, si Abel bisan nga patay na, nagahambal pa gihapon.

5Tungod sa pagtuo, si Enoc wala mapatay kundi gindala sia sa Dios, kag wala na sing may nakakita sa iya, tungod kay ang Dios nagdala sa iya pa ibabaw. Ang kasulatan nagasiling nga sang wala pa si Enoc gindala pa ibabaw, nakapahamuot sia sa Dios.

6Wala sing tawo nga makapahamuot sa Dios kon wala sia sing pagtuo. Kay ang bisan sin-o nga nagapalapit sa Dios dapat magtuo nga may Dios, kag nagahatag sia sing balos sa mga nagapangita sa iya.

7Tungod sa pagtuo, si Noe nakabati sang mga paandam sang Dios nahanungod sang palaabuton nga mga butang nga indi niya makita. Gintuman niya ang Dios, kag naghimo sia sang arka nga paagi sini, sia kag ang iya panimalay naluwas. Sa sini nga paagi, ginkondenar ang kalibutan, kag si Noe ginbaton sang Dios paagi sa pagtuo.

8Tungod sa pagtuo, si Abraham nagtuman sang pagtawag sang Dios sa iya, kag nagkadto sia sa duta nga ginsaad sang Dios nga ihatag sa iya. Ginbayaan niya ang iya kaugalingon nga duta nga wala makahibalo kon diin sia makadto.

9Paagi sa pagtuo nag-estar sia nga daw isa ka dumoluong sa duta nga ginsaad sang Dios sa iya. Nag-estar sia sa mga tolda subong nga si Isaac kag si Jacob amo man. Nagbaton man sila sang amo man nga saad sa Dios.

10Kay si Abraham nagpaabot sang isa ka siudad nga ginplano kag ginpatindog sang Dios, ang siudad nga ang iya mga sadsaran malig-on.

11Tungod sa pagtuo, si Abraham nangin-amay, bisan pa nga tigulang na gid sia kag si Sara mismo indi naman makapamata. Nagsalig sia nga ang Dios magatuman sang iya ginsaad.

12Bisan nga makabig sia nga daw patay na, sa sini nga tawo naghalin ang mga kaliwat nga subong kadamo sang mga bituon sa langit, kag subong man kadamo sang balas nga indi maisip sa baybayon.

13Ini tanan nga mga tawo nagtuo sa Dios tubtob sa tion nga nagkalamatay sila. Wala nila mabaton ang mga ginsaad sang Dios sa ila, pero gikan sa malayo ila nakita kag ginpaabot ini, kag ginkilala nila nga mga dumoluong sila kag mga umalagi diri sa duta.

14Ang mga nagahambal sini nga mga butang nagapahayag sing maathag nga ginapangita nila ang banwa nga ila gid kaugalingon.

15Wala na nila pagdumdoma ang banwa nga ila ginbayaan, kay kon amo ini ang ila ginhimo, kuntani may kahigayunan pa sila sa pagbalik.

16Sa baylo, naghandom sila sang labi pa kaayo nga banwa, ang langitnon nga banwa. Gani ang Dios wala mahuya nga tawgon nila sia nga ila Dios, tungod kay nakaaman sia para sa ila sang isa ka siudad.

17Tungod sa pagtuo, si Abraham naghalad sang iya anak nga si Isaac, sang gintilawan sia sang Dios. Bisan sia ang ginsaaran sang Dios, si Abraham handa sa paghalad sang iya bugtong nga anak.

18Ang Dios nagsiling sa iya, “Paagi kay Isaac magagikan ang imo mga kaliwat nga akon ginsaad.”

19Nagpati si Abraham nga ang Dios makasarang sa pagbanhaw kay Isaac—gani, kon hambalon gid man si Abraham nagbaton liwat kay Isaac halin sa kamatayon.

20Tungod sa pagtuo, si Isaac nagsaad sing palaabuton nga mga kaayuhan kay Jacob kag kay Esau.

21Tungod sa pagtuo, sa wala pa mapatay si Jacob ginbendisyunan niya ang tagsa ka anak ni Jose, kag nagsimba sia sa Dios nga nagapanukod sa iya sungkod.

22Tungod sa pagtuo, sang madali na lang mapatay si Jose naghambal sia nahanungod sang paghalin sang mga taga-Israel sa Ehipto, kag nagpamilinbilin sia nahanungod sang ila pagahimuon sa iya mga tul-an.

23Tungod sa pagtuo, ang mga ginikanan ni Moises nagtago sa iya sa sulod sang tatlo ka bulan sa tapos sia matawo. Nakita nila nga gwapo sia nga bata, kag wala sila mahadlok sa paglapas sang sugo sang hari.

24Tungod sa pagtuo, sang daku na si Moises, wala sia magpasugot nga tawgon sia nga bata sang anak nga babayi sang hari.

25Ginpasulabi niya ang pag-antos upod sa mga tawo sang Dios sang sa magpangalipay sa sala sa malip-ot lamang nga tion.

26Ginkabig niya nga ang pag-antos tungod sa Cristo mas maayo pa sang sa tanan nga mga manggad sa Ehipto, kay ginapaabot niya ang palaabuton nga balos.

27Tungod sa pagtuo, ginbayaan ni Moises ang Ehipto nga wala mahadlok sa kaakig sang hari. Indi na gid sia magbalik, subong nga daw nakita niya ang indi makita nga Dios.

28Tungod sa pagtuo nagsugod sia sa paghiwat sang Piesta sang Pascua kag nagsugo sa pagwisik sang dugo sa mga pwertahan, agod nga ang Anghel sang Kamatayon indi magpatay sang panganay nga mga lalaki sang mga Israelinhon.

29Tungod sa pagtuo, nakatabok ang mga taga-Israel sa Mapula nga Dagat nga daw pareho lang sang mamala nga duta. Sang magpangahas ang mga Ehiptohanon sa pagtabok, ginlapawan sila sang tubig, kag nagkalalumos.

30Tungod sa pagtuo, ang mga pader sang Jerico narumpag, sa tapos makamartsa ang mga Israelinhon sa palibot sini sa sulod sang pito ka adlaw.

31Tungod sa pagtuo, si Rahab, ang babayi nga nagbaligya sang iya dungog, wala mapatay upod sa mga wala magtuman sa Dios, kay ginbaton niya sing mainabyanon ang mga espiya sang Israel.

32Padayunon ko pa bala ang pagsugid sini? Kulang ang akon tion sa pagsugid nahanungod kay Gideon, Barak, Samson, Jepte, David, Samuel kag sang mga propeta.

33Paagi sa pagtuo nagpakig-away sila batok sa tanan nga mga pungsod kag nagdaog sila. Naghimo sila sing matarong kag nabaton nila ang ginsaad sang Dios. Napakipot nila ang mga baba sang mga leon,

34napalong nila ang nagadabadaba nga mga kalayo, kag nalikawan ang kamatayon sa espada. Mga maluya sila pero nanginmabakod. Mga isganan sila sa inaway, kag ginpangdaog nila ang mga hangaway sang mga dumoluong.

35Paagi sa pagtuo, ang mga babayi nagbaton liwat sang ila napatay nga mga pariente. Ang iban nagkalamatay sa daku nga mga pag-antos nga wala magbaton sang kahilwayan, agod mabanhaw sila sa isa ka mas maayo pa nga kabuhi.

36Ang iban ginyaguta kag ginpangbunal, kag ang iban ginpanggapos kag ginpangbilanggo.

37Ginpangbato sila, ginpang-utod sang lagari, ginpamatay sa espada. Nagdalangdalang sila nga nagabayo sang panit sang mga karnero kag mga kanding, mga imol sila, ginhingabot, kag ginpintasan.

38Ang kalibutan indi bagay para sa ila! Nag-alaplaag sila sa mga desierto kag sa mga kabukiran, nga nagaestar sa mga kweba, kag sa mga gikab sang duta.

39Ini sila tanan nagapahamuot sa Dios tungod sang ila pagtuo! Pero wala pa nila mabaton ang ginsaad sang Dios,

40tungod kay ang Dios may plano nga mas maayo pa para sa aton. Ang tuyo sang Dios amo nga maagom lamang nila ang pagkahimpit kon kita kaupod na nila.

← Chapter 10 Jump to: Chapter 12 →