Malachi 1

Ilonggo (Maayong Balita nga Biblia (2012))

Jump to: Chapter 2 →

1Amo ini ang mensahe nga ginhatag sang Ginoo kay Malaquias nga iya ihambal sa mga tawo sang Israel.

2Ang Ginoo nagasiling sa iya mga tawo, “Ginahigugma ko kamo sa gihapon.” Pero nagasabat sila, “Sa ano bala nga paagi nga ginpakita mo ang imo paghigugma sa amon?” Nagasabat ang Ginoo, “Si Esau kag si Jacob mag-utod, pero ginhigugma ko si Jacob kag ang iya mga kaliwat,

3kag gindumtan ko si Esau kag ang iya mga kaliwat. Ginlaglag ko ang mga kabakuloran ni Esau kag ginpatumbayaan ko ang duta sa talunon nga mga sapat.”

4Kon ang mga kaliwat ni Esau nga amo ang mga Edomnon magsiling, “Ang amon mga banwa ginpanglaglag, pero amon ini patindugon liwat.” Dayon ang Ginoo sang mga hangaway magasabat, “Pabay-i nga patindugon nila ini liwat, kay akon ini liwat laglagon. Pagatawgon ini sang mga tawo nga ‘Ang malaut nga pungsod’ kag ‘Ang pungsod nga naakigan sang Ginoo sa wala sing katapusan.’”

5Makita ini sang mga tawo sang Israel kag magasiling sila, “Ang Ginoo gamhanan bisan sa gwa sang duta sang Israel!”

6Ang Ginoo sang mga hangaway nagasiling sa mga pari, “Ang isa ka anak nagatahod sa iya amay, kag ang isa ka ulipon nagatahod sa iya agalon. Ako ang inyo amay, ngaa bala wala ninyo ako ginapasidunggan? Ako ang inyo agalon, ngaa bala wala kamo nagatahod sa akon? Ginatamay ninyo ako, pero nagapamangkot kamo, ‘Sa ano bala nga paagi kami nagtamay sa imo?’

7Sa sini nga paagi: sa inyo paghalad sa akon altar sang mga kalan-on nga nadagtaan. Kag karon nagapamangkot kamo, ‘Sa ano bala nga paagi kami wala magtahod sa imo?’ Sugiran ko kamo, sa inyo di-pagtahod sang akon altar.

8Sang pagdala ninyo sang bulag ukon masakiton ukon piang nga sapat nga ihalad sa akon, matarong bala ina? Tilawi abi ninyo ang paghatag sing subong sini nga sapat sa inyo gobernador! Malipay bala sia sa inyo, ukon magahimo bala sia sing maayo para sa inyo?”

9Karon, kamo nga mga pari, tilawi ninyo ang pagpakitluoy sa Dios nga magmaayo sia sa aton. Indi niya pagsabton ang inyo pangamuyo, kag inyo gid ina sala.

10Ang Ginoo sang mga hangaway nagasiling, “Maayo pa kuntani nga ang isa sa inyo magsira sang mga pwertahan sang Templo, agod indi na kamo magpasiga sang kalayo nga wala sing pulos sa akon altar. Wala ako malipay sa inyo kag indi ko pagbatunon ang inyo mga ginahalad sa akon.

11Ang mga katawhan sa bug-os nga kalibutan nagapasidungog sa akon. Bisan diin nagasunog sila sing insyenso para sa akon, kag nagadulot sila sing putli nga mga halad sa akon. Tanan sila nagapasidungog sa akon!

12Pero ginapakahuy-an ninyo ako sa inyo pagsiling nga ang akon altar nadagtaan, kag ginahikayan ninyo ang mga kalan-on nga ginahalad didto.

13Nagasiling kamo, ‘Daw ano ka makatalaka ini tanan!’ kag ginapusnga ninyo ang inyo ilong sa akon. Ginadala ninyo ang kinawat nga hayop subong inyo halad sa akon, ukon indi gani piang kag masakiton. Nagahunahuna bala kamo nga batunon ko ini gikan sa inyo?

14Ang pagpakamalaut mangin sa dayaon nga nagahalad sa akon sang isa ka hayop nga nadagtaan, nga may yara man lang nga maayo nga hayop sa iya panong nga iya ginsaad nga ihatag sa akon! Kay ako ang Ginoo sang mga hangaway, amo ang gamhanan nga Hari, kag ang mga katawhan sang tanan nga mga pungsod nagakahadlok sa akon.”

Jump to: Chapter 2 →