Malachi 3

Ilonggo (Maayong Balita nga Biblia (2012))

← Chapter 2 Jump to: Chapter 4 →

1Ang Ginoo sang mga hangaway nagasabat, “Magapadala ako sang akon manugbalita nga magaaman sang dalan para sa akon. Dayon sa hinali ang Ginoo nga inyo ginapangita magaabot sa iya Templo. Ang manugbalita nga inyo ginahandom nga makita magaabot kag magapahibalo sang akon kasugtanan.”

2Pero sin-o bala ang sarang makaagwanta sa sadto nga adlaw kon mag-abot sia? Sin-o bala ang mabuhi kon magpahayag sia? Manginkaangay sia sang maisog nga habon ukon sang kalayo nga nagatunaw sang metal.

3Magaabot sia sa paghukom kaangay sang platero nga nagatunaw kag nagapapuraw sang pilak. Subong nga ang platero nagapapuraw sang pilak kag bulawan, ang mensahero sang Ginoo magapapuraw man sang mga pari, agod magadala sila sa Ginoo sang nagakabagay nga mga dulot.

4Dayon ang mga dulot nga pagadalhon sa Ginoo sang mga tawo sang Juda kag Jerusalem manginkahalamut-an sa Ginoo subong sang una.

5Ang Ginoo sang mga hangaway nagasiling, “Kadtuan ko kamo sa paghukom sa inyo, kag magasaksi ako sa gilayon batok sa mga manugbabaylan, batok sa nagapanginlalaki ukon nagapanginbabayi, batok sa mga nagasaksi sing kabutigan, batok sa mga nagapangdaya sa mga sweldo sang ila mga sinuholan, kag batok sa mga nagapamintaha sa mga balo, sa mga ilo kag mga dumoluong, kag batok sa mga wala nagatahod sa akon.

6“Ako amo ang Ginoo, kag wala ako nagabaylo. Gani kamo nga mga kaliwat ni Jacob, wala pa mawala sing bug-os.

7Ginlapas ninyo ang akon mga kasugoan kag wala ninyo ini pagtumana subong sang ginhimo sang inyo mga katigulangan sang una. Magbalik kamo sa akon, kag ako magabalik sa inyo. Pero nagapamangkot kamo, ‘Ano bala ang himuon namon agod makabalik kami sa imo?’

8Mamangkot ako sa inyo, matarong bala sa tawo ang pagpangawat sa Dios? Indi, pero ginakawatan ninyo ako. Nagapamangkot kamo, ‘Sa ano nga paagi? Sa mga ikapulo kag sa mga halad.

9Pakamalauton kamo tanan, tungod kay ang bug-os nga pungsod nagapangawat sa akon.

10Dalha ang tanan ninyo nga mga ikapulo sa akon Templo, agod may madamo nga pagkaon sa akon balay. Tilawi ninyo ako kag makita ninyo nga akon abrihan ang mga bintana sang langit kag iula ko sa inyo sing bugana ang tanan nga maayo nga mga butang.

11Indi ko pag-ipakaon ang inyo mga patubas sa mga sapatsapat, kag padamuon ko ang mga bunga sang inyo mga ubas.

12Dayon ang mga katawhan sang tanan nga mga kapungsoran magatawag sa inyo nga malipayon, tungod kay ang inyo duta manginmaayo nga lugar nga pagaestaran.

13Ang Ginoo nagsiling, “Naghambal kamo sing malain nga mga butang nahanungod sa akon, pero nagapamangkot kamo, ‘Ano bala ang ginhambal namon nahanungod sa imo?’

14Nagasiling kamo, ‘Wala sing pulos ang pag-alagad sa Dios. Ano ang pulos sa paghimo sang iya ginsiling, ukon sa pagpakita sa Ginoo sang mga hangaway nga nagapangasubo kita sang aton ginhimo?

15Suno sa aton makita, ang mga tawo nga bugalon amo ang malipayon. Indi lamang nagauswag ang mga nagahimo sing malaut, kundi ila pa ginatilawan ang Dios paagi sa ila malaut nga mga ginahimo kag wala man sila maano.’”

16Dayon ang mga tawo nga nagakahadlok sa Ginoo naghambalanay, kag nagpamati ang Ginoo kag nabatian niya ang ila ginsiling. Sa iya atubang may libro nga ginsulatan sang mga lista sang mga nagakahadlok sa Ginoo kag nagatahod sa iya.

17Ang Ginoo sang mga hangaway nagasiling, “Sila mangin-akon mga tawo. Sa adlaw nga akon gintalana, sila mangin-akon gid. Magakaluoy ako sa ila subong sang pagkaluoy sang mga ginikanan sa mga kaanakan nga nagaalagad sa ila.

18Makita ninyo sa liwat ang kinatuhay sang mahanabo sa matarong kag sa malaut, ang kinatuhay sang tawo nga nagaalagad sa akon kag sang isa nga wala nagaalagad sa akon.”

← Chapter 2 Jump to: Chapter 4 →